16
Mizuangzam Mo
1 Bawipa bia cu ka sinah a ra i,
2 “Mipa, Jerusalem hi a ziaza fihnung a simi cu hngalhter tuah.
3 Mah hihi Bawipa Pathian nih a sinah a chimmi bia cu a si, tiah chim: ‘Kanaan ram hi na pupa chuahkehnak ram a si i khika ah nangmah zong hi hrin na si; na pa cu Amor mi a rak si i na nu cu Hit mi a rak si.
4 Zeitindah na chuah ah hin tuah na rak si ti ahcun, na chuah ah hin na laihri tan na rak si lo, kholhnak ding ti zong chiahpiak na rak si lo i kholh na si lo, cite thuh awk na rak simi kha thuh na si lo i nau hlawmnak puan zongin hlawm na si fawn lo.
5 Ahohmanh nih zei ah an in rel lo caah hi thil hi pakhat hmanh an in tuahpiak lo, ahohmanh nih an in zaangfah fawn lo; na chuah ni ah khan nangmah hnawmhne lakah vawlei ah khan hrilh na rak si ko.
6 Cu tikah kei cu na pawngah khan ka rak i chawk i na thi chung i na ke na rak chaih len ko kha kan hmuh; na thi chung i na um lioah khan kan chawnh i, nung tuah, kan ti.
7 A hring zungzalmi thing, lo lak i a ummi thingkung bantukin kan cawngh i na nung i na òhang. Na hung ngaknu, na hnuk hna cu an hung bom i na sam cu an hung sau, sihmanhsehlaw taklawng na si ko rih i na lang ko rih.
8 “Cun na pawngah ka ra òhan i va ngeih cu na si cang ti kha kan hmuh. Ka puan cu kan zawnh i na taklawng cu kan huh. Cun kan hamnak kha ka fehter i nupi ah kan òhit i keimah ta ah na cang, tiah Bawipa Pathian nih a ti.
9 Cu tikah ti in kan kholh i na thi kha ka òawl i chihriti kan thuh.
10 Òamhmi puan kha kan aihter i saphaw kedan kan danhter; puan hmangòhia khan kan thuamh i pu puan kha kan aih.
11 Hlawn caah kutkhih kan khih i na hngawng ah òhi kan oih;
12 hnartonh kan tonh, hnatonh kan tonh i suiluchin kan chinh.
13 Na hlawn cu sui le ngun an si, na thilthuam cu puan hmangòhia le pu le òamhmi puan an si. Na rawl ah changvut le khuaihliti le oliv chiti an si i na hun i dawh ngaingai i siangpahrangnu na hung si.
14 Naa dawh minthannak cu khuazakip ah a thang, zeicahtiah keimah nih kan thuamhnak sunparnak nih cun naa dawhnak cu a tlinter, tiah Bawipa Pathian nih a ti.
15 “Sihmanhsehlaw naa dawhnak cu naa zum ciammam i na minthannak cu hlawhhlannak ah na hman i khualtlawngmi kip kha na rak i duh hna.
16 Na thilthuam kha naa lak hna i òheng kha dawh ngaiin naa ser i naa òamh i cuka ah cun nu le pa sualnak kha na tuah; naa dawh ruangah amah ta si awkah amah he cun na sual.
17 A òha ngaingaimi hlawn sui le ngun kan pekmi kha na lak i cucu pa siasal ah na ser hna i cu he cun nu le pa sualnak na tuah.
18 Annih cu òamhmi puan khan na khuh hna i ka chiti le ka zihmui kha na pekchanh dih hna.
19 Kan pekmi rawl, changvut, chiti le khuaihliti, nangmah kan cawmnak kha na lak i an hmaiah cun rim thaw thawinak caah na hun hna. Mah hihi Bawipa Pathian bia hrimhrim a si.
20 “Fanu, fapa na ka hrinpiakmi hna kha na lak hna i hi siasal hna hmaiah hin an rawl caah rai ah na thawi hna. Hlawh na hlannak nakin mah hihi a hme deuhmi thil a si maw?
21 Sihlah! Nangmah nih ka fale cu na thah hna i mei in na khangh hna i na siasal hna sinah cun na pek hna.
22 Fih a nungmi zuanzamnak na tuahmi vialte hna ruangah hin hlanlio kong kha na philh i taklawng le pumro in na rak um i na thi chung i na ke na rak chaih len ko lio kha na hngal ti lo.
23 Òhat lonak na tuahmi vialte cu na tuah dih hna hnuah, (A! a va poi thiam dah, tiah Bawipa Pathian nih a ti)
24 hmun lawng kip ah khan zaunak na donh hna i òhutdan sang naa ser hna.
25 Lam òeka kip ah khan òhutdan sang cu na ser hna i naa dawhnak cu ningzahnak na phakter, aa chawkmi kip sinah khan na pum cu naa pe i a voi rel cawk loin na sual.
26 A hormi na innpa Izipt he khan sualnak na tuah i sualnak na tuahmi a rel in rel cawk a si lomi nih khan ka thin a ka phawh.
27 “Nangmah cu ka kut kan samhhnawh i na rawl kha kan òhumh. Cun nangmah aan huatu, Filistin minu hna, na zuanzamnak nih a nor cikcekmi hna sinah khan kan chanh.
28 Mah hihi i zat rih loin Assiria mi hna sinah khan na sual òhan hoi, nu le pa sualnak chungah khan na luhpi hna, sihmanhsehlaw naa zaa òhiamòhiam hlei lo.
29 Chawleh chawhrawlnak ram Khaldia ram ah khan nu le pa sualnak cu rel cawk lo na tuah, asinain hi hmanh ah hin naa za hlei fawn lo.
30 “Ka thin na hei ka phawk hringhran dah! tiah Bawipa Pathian nih a ti. Mah hi vialte hi ningzah hngal lomi hlawhhlangnu bantukin na tuah.
31 Lam òeka kip ah khan na zaunak kha na ser hna i hmun lawng kip ah khan na òhutdan kha na ser hna, sihmanhsehlaw hlawhhlangnu sawhsawh bantuk si loin nang nih cun a man lak na duh lo.
32 A va cungin pa aa duhmi nih cun midang sin cun a man a lak tawn.
33 Hlawhhlangnu zong nih a man an lak; sihmanhsehlaw nang nih cun an duhtu kha laksawng tu na pek lehlam hna i nangmah he sualnak tuah awkah vawlei cung khuazakip khan na lem hna.
34 Sualnak na tuahnak ah hin nu dang he cun nan i ralkah: ahohmanh nih an in fuh lo, a man na la hna lo, na pek lehlam hna. Hoi dang he aa ralkah hrimhrimmi na si ko.
Jerusalem Cung I Pathian Biaceihnak
35-36 “Cucaah maw hlawhhlangnu, Bawipa bia cu ngai tuah. Mah hihi Bawipa Pathian bia cu a si: Na luannak ah hin na tlau cang, an duhtu hna he sualnak na tuahnak ah na pum cu naa langh cang. Fih a nungmi na siasal hna le annih sin pek awkah na thahmi ngakchia hna lehrulhnak ah,
37 nangmah duhtu na fuhmi vialte hna, na duhmi vialte hna le na huatmi vialte hna kha, ka pumh hna lai. Annih cu khuazakip in ka pumh hna lai i an hmaiah khan na puan kan phoih dih lai i na takpum cu a dihlak in a lawng piin an in hmuh lai.
38 Va cung pa duh le lainawn in taza kan cuai lai i nahchuah le thinhun in thisen a chuahtu tiin sual kan phawt lai.
39 Cun annih sinah khan nangmah cu kan chanh lai. Annih nih na zaunak donhmi kha an chimh hna lai i na òhutdan sang kha an hrawh hna lai; cun na puan kha an in phoih lai i na hlawn sungsung kha an lak hna lai i taklawng le taklang in an in kaltak lai.
40 Mibu kha an in pumhhnawh lai i lung in an in cheh lai, an vainam in an in sam cikcek lai.
41 Na inn kha an khangh hna lai i nu tampi hmuh hngan ah bia an in ceih lai. Nupa sualnak na tuahmi kha ka donghter lai i nangmah an duhtu hna sinah khan zeitikhmanh ah a man na pe ti lai lo.
42 Khi tikah ka thinhunnak cu ka òhumh lai i ka nahchuahnak cu na sinin aa mer lai.
43 Dai tein ka um lai i ka thin a hung ti lai lo. Na no lio caan kha na philh i na tuahmi thil vialte hin awklokchong in na ka tuah caah kei zong nih na tuahmi thil ruangah na cungah teirul chamnak kha ka tlunter ve, tiah Bawipa Pathian hrimhrim nih a ti.
“Hi ningzahnak hi na tuah lo maw? Fihnungmi thil dang zong na tuah hna lo maw?
44 Phungthlukbia a hmangmi pawl nih an in thawh lai i, ‘Nu ang,’ an in ti lai.
45 A va le a fale hna a fihmi na nu fanu hrim na si ko. An vale le an fale a fihmi hna na unau hna i unau nu hrim na si ko. Nannih cu nan dihlak in nan nu cu Hit mi a si i nan pa cu Amor mi a si.
46 Na u nu cu na chak i a fale he a ummi Samaria kha a si; na nau nu cu na thlanglei ah a fale he a ummi Sodom kha a si.
47 Anmah umtuning in um ve in thil fihnung kha na tuah ve lo maw? Anmah nak hmanh in òhalo deuh in na um dengmang.
48 Bawipa Pathian nih, na nau nu Sodom le a fale hna nih khan nangmah le na fale hna nih nan tuah bantuk hin cun an tuah bal lo, tiah ka nun bangin ka ti. Na naunu Sodom òhat lonak cu hihi a si:
49 Amah le a fanu hna cu chawva le rawl tampi an ngeihmi kha an i porhlaw i hnangam le nuam ngaiin an um i sihmanhsehlaw misifak le mirethei kha an bawm bal hna lo.
50 An ruam a hung kai i ka hmai i fihnung a simi thil kha an tuah i na hmuh bang hin ka hlonh hna.
51 Samaria nih hin sualnak leiah na cheu an banh lo; amah nakin thil fihnung tam deuh na tuah i cu na tuahmi thil fihnung he zohchih ahcun na unau nu cu a sual lo ko a lo.
52 Na unau nu hna nih an hmuh awk a si tiah na ruahmi òumchuknak cu na in hrim awk a si lai. Annih sualnak nakin nang na sualnak kha fih an nun tuk deuh caah nangmah he tahchunh ahcun annih cu a sual lo bangin an lang ko; cucaah atu cu ningzahnak le òumchuknak cu na in hna lai i na unau nu hna cu a sual lomi kha na lawhter ko hna lai.
53 “Sihmanhsehlaw Sodom le a fanule hna le Samaria le a fanule hna kha an van òhatnak cu ka pek òhan hna lai i cu caan ah cun nangmah zong na van òhatnak kha kan pek òhan ve lai.
54 Na ningzahnak cu na in lai i na tuahmi thil vialte ruangah khan hmaichiatnak na hmuh lai caah, annih caah cun hnangamnak na si lai.
55 Sihmanhsehlaw na unau nu Sodom le a fanu hna le na unau nu Samaria le a fanu hna kha hlanlio an sining an si òhan tikah nangmah le na fanule hna cu hlanlio nan sining ah khan nan kir òhan ve lai.
56 Naa porhlawt khawh lioah khan cun na unau nu Sodom kong kha tampi na thei in tampi na chim lo mei kha,
57 na òhat lonak a langh hlanah khan cun? Sihmanhsehlaw atu cu amah bantukin Edom fanu hna le an pawngkam i a ummi vialte hna ca le, na velchum i a ummi Filistin mi fanu hna, nangmah an serhsattu hna caah khan, nihsawh awkah na cang cang.
58 Atu cu nangmah zong na zuanzamnak le fih a nungmi na ziaza theitlai kha na ing ve cang lai. Mah hihi Bawipa bia hrimhrim a si,” tiah a ti.
Zungzal Hmunmi Biakamnak
59 Mah hihi Bawipa Pathian bia a si. Aa thawh i, “Nangmah nih biakamnak kha na hrawh i chiatsernak kha zei ah na rel lo caah na hmuh awk hnga a sining in na cungah ka tuah lai.
60 Sihmanhsehlaw na no lio i nangmah he ka tuahmi biakamnak kha ka philh lai lo i zungzal in a hmun laimi biakamnak cu nangmah he ka ser lai.
61 Cun na rak tuahmi kha na hun hngalh òhan hna lai i na unau nu hna kha, a cang deuh he a no deuh he na hmuh hna tikah na ning a zak lai. Zeicahtiah annih cu na fanu si dingah nangmah kha kan pek hna lai i na biakamnak lengah a ummi an si lai lo.
62 Cuticun ka biakamnak cu nangmah sinah ka fehter lai i Bawipa ka si kha na hngalh lai.
63 Na tuahmi vialte kha kan ngaihthiam dih hnuah cun, na lung a pem lai i na ning a zak lai i na lung a ar lai i voi khat hmanh na kaa na ang òhan ti lai lo. Mah hihi Bawipa Pathian bia hrimhrim a si,” tiah a ti.