23
Mibu Chungin Chuahmi Hna
1 “A tilmu a kekmi siseh, a chiaòha tan a simi siseh, ahohmanh Bawipa mi hna aa pummi chungah cun an lut lai lo.
2 “Lakfa cu Bawipa mi hna aa pummi chungah a lut lai lo; chan hra tiang hmanh in a tefa hna nih Bawipa mi hna aa pummi chungah cun an lut lai lo.
3 “Ammon mi siseh, Moab mi siseh, ahohmanh Bawipa mi hna aa pummi chungah cun an lut lai lo; chan hra tiang hmanh in cu miphun a simi hna cu Bawipa mi hna aa pummi chungah cun zungzal in an lut lai lo; Ref 23.3-5: Neh 13.1-2
4 zeicahtiah Izipt ram in nan chuah tikah lampi ah changreu le ti in an in dong hna lo i, Mesopotamia ram Pethor in Beor fapa Balaam kha nannih chiatserh awk caah an ruaih. Ref 23.4: Nam 22.1-6
5 Asinain Bawipa nan Pathian nih Balaam cu a bia a ngai lo; Bawipa nan Pathian nih Balaam chiatserhnak cu nan ca i thluachuahnak ah a canter, cucu Bawipa nan Pathian nih an dawt hna caah a si. Ref 23.5: Nam 23.7§24.9
6 Nan nunchung vialte anmah he i remnak le an rumnak kha zeitikhmanh ah nan kawlpiak hna lai lo.
7 “Edom mi cu nan hua hna lai lo, zeitintiah annih cu nan unau an si; Izipt mi cu nan hua hna lai lo, zeitintiah an ram ah mipem nan rak si.
8 An tefa hna cu chan thum ri in Bawipa mi hna aa pummi chungah cun an lut kho lai.
Thianhhlimhnak Phungbia Hna
9 “Nan ral hna kha doh awkah nan kal i nan riah tikah, thil òhalo vialte kha nan ulh dih lai.
10 Nan lakah ahohmanh zan i amah chungin thil a chuakmi ruangah thurhnawm in a um ahcun, riahhmun lengah a chuak lai, riahhmun chungah a rung lut lai lo,
11 sihmanhsehlaw zanlei a rung si tikah ti in aa kholh lai i ni a tlak tikah riahhmun chungah a lut lai.
12 “Riahhmun lengah hmun pakhat nan ngei lai i cu ka ah cun nan kal tawn lai;
13 cun nan thilri sinah fung zum nan ngei lai i, leng i nan òhut tikah cu fung cun khor nan cawh lai i nan i mer lai i nan ek cu nan chilh lai.
14 Bawipa nan Pathian cu nanmah kha khamh awk le nan ral hna kha nan kut chungah pek awkah nan riahhmun chungah aa chawh caah, nan lakah a thurhnawmmi thil zeihmanh a hmuh i an mertak hna nakhnga lo, nan riahhmun cu a thianhlim awk a si.
Umtu Khuasaknak Phungbia Hna
15 “A bawipa sinin nan sinah a zammi sal cu a bawipa sinah nan pe òhan lai lo;
16 nan lakah, nan khua pakhatkhat chung i a duh bikmi hmun aa thimmi ahcun, nanmah sinah a um lai; nan hrem lai lo.
17 “Israel mi fanu hna lakah biaknak hlawhhlang an um awk a si lo; Israel mi fapa hna lak zongah biaknak hlawhhlang an um awk a si lo. Ref 23.17: Lev 19.29
18 Biakamnak man peknak caah hlawhhlan man siseh, uico si man siseh, Bawipa nan Pathian inn chungah nan ratpi lai lo, zeitintiah hi hna pahnih cu Bawipa caah fihnung an si.
19 “A miak in nan unau sinah, tangka miak siseh, rawl miak siseh, a miak um dingmi thil cawihmi paohpaoh cu, nan coih lai lo. Ref 23.19-20: Exo 22.25; Lev 25.36-37; Deu 15.7-11
20 Ramdangmi tu cu a miak in nan cawih khawh hna lai; co awkah nan va luhhnawhmi ram chung i nan thil tuahmi kip ah Bawipa nan Pathian nih thluachuah an pek hna nakhnga, nan unau hna cu miak um in nan cawih hna lai lo.
21 “ Bawipa nan Pathian sinah biakamnak nan tuah tikah rau loin nan pek lai, zeitintiah Bawipa nan Pathian nih an hal hrimhrim hna lai i nan caah sualnak a si sual lai. Ref 23.21: Nam 30.1-16; Mat 5.33
22 Sihmanhsehlaw biakamnak tuah kha nan i sum ahcun, nan caah sualnak a si lai lo.
23 Nan kaa in a chuak cangmi cu nan tuah hrimhrim lai, zeitintiah nan kaa in nan i kammi cu Bawipa nan Pathian sinah nanmah lungtho tein nan kammi a si.
24 “Nan innpa mitsur dum chungah nan kal tikah nan duh tawk in mitsur tlai cu nan ei lai, sihmanhsehlaw nan sei chungah cun zeihmanh nan khumh lai lo.
25 Nan innpa rawl dir lio lak i nan kal tikah a vui cu nan sih khawh lai, sihmanhsehlaw a dir liomi rawl nan innpa ta cu faah in nan hlep lai lo.