3
Khrih Ah Nun Thar
Cuti Khrih he thawhter òhan nan si cang caah cun Khrih umnak, Pathian a orhlei kam i a òhutnak cunglei thil hna cu kawl deuh u. Nan lungthin cu cunglei thil ah bunh u law vawlei thil ah bunh hlah u. Zeitintiah nan thi cang i nan nunnak cu Pathian ah a ummi Khrih sinah thuh a si cang. Kan nunnak a simi Khrih cu a langh tikah nannih zong amah he sunglawi in nan lang te lai.
Cu a si caah nan chungah vawlei thil a simi nu le pa sualnak, thurhhnawmhnak, taksa duhnak, duhnak chiakha, siasal biaknak a simi hakkauhnak cu that ko hna u. Hi hna ruangah hin Pathian thinhunnak cu a tlung lai. Cu thil hna ah cun nan rak tlongleng i nan rak nung. Sihmanhsehlaw atu cu ingpuannak, thinhunnak, i huatnak, congoihnak te hna cu ngol dih cang hna u law holh phun chia zong nan kaa in chuak hin ti hlah seh. Pakhat le pakhat lih i chim hlah u, zeitintiah sining hlun ziaza khan nan i hlitphuak cang i 10 sining thar, sertu muipu hngalhnak thawngin tharchuah nan sinak kha nan i hruk cang. 11 Hi ah hin Grik, Judah mi, cuarpartan, cuarpartan lo, mipuarhrang, Sithian, sal le a luatmi ti an um lo, sihmanhsehlaw Khrih cu zeizong vialte ah zeizong a si!
12 Pathian mithim, mithiang le dawtmi nan si bantukin zawnruahnak, zaangfahnak, toidornak, lungnemnak le lungsaunak in i thuam ko u. 13 Pakhat le pakhat i ing u law mizeimaw nih a dang cungah lungsi lonak a ngeih ahcun pakhat le pakhat i ngaithiam u. Bawipa nih an ngaithiam hna bantukin nannih zong nan i ngaihthiam awk a si. 14 Cu pinah cun zeizong vialte hmun khat ah rem tein a sihawhter khotu dawtnak cun i thuam ko u. 15 Khrih daihnak nih nan lungthin cu uk ko seh, cu ca dingah cun pum khat ah auh nan si, cun lunglawmh thiam u. 16 Khrih bia cu nan chungah a rumning tein um ko seh. Thangòhatnak hla, Pathian hla le Thlarau hla te hna le fimthiamnak phun kip in i cawnpiak u law i forh hna u. Nan lungtak tein Pathian cu thangòhat u law lunglawmhnak he hla sa u. 17 Khrih thawngin Pathian sinah lunglawmhnak chim in nan tuahmi paoh ah bia in siseh, òuannak in siseh Bawipa Jesuh min in tuah dih ko u.
18 Nupile hna, nan vale nawl ngai ko hna u, cucu Bawipa he aa tlakmi a si. 19 Vale hna, nan nupile daw hna u law an cungah puarhrang hlah u. 20 Fale hna zeizong kong ah nan nu le nan pa bia ngai hna u, zeitintiah cucu Bawipa lungton a si. 21 Pale hna, nan fale thin phok hna hlah u, an lung a der sual lai. 22 Salle hna, zeizong kong ah vawlei cung nan bawile nawl ngai hna u, an hmuh lio le an lunglawmhter awk lawngah si loin Bawipa òihzah buin lungtho tein an bia ngai hna u. 23 Nan rian cu zei a si paoh ah nan bawile ca lawngah si loin Bawipa ca i tuah khan in i biatak ko u. 24 Lawmhman laksawng caah roco ding cu Bawipa sinin nan hmuh lai kha hngal ko u; nan rianhmi cu Bawipa Jesuh Khrih a si. 25 Palhnak a tuahmi nih cun an palh man an hmuh lai, thleidannak zeihmanh a um lo.