1 Siasal hunhmi rawl kong ah “Hngalhnak cu kan ngei cio ko,” rak timi cu kan hngalh. “Hngalhnak,” cu aa chawreu, asinain dawtnak nih cun mi a sersiam. 2 Pakhatkhat nih ka hngalh pah ko tiah aa ruah ahcun a hngalh awk khan in a hngal rih lo tinak a si. 3 Sihmanhsehlaw Pathian a dawmi pa cu Pathian nih a hngalh.

4 Cu a si caah siasal hunhmi rawl einak kongah “Siasal cu nunnak taktak a ngeimi a si lo,” ti le “Pathian cu pakhat lawng a si,” ti kan hngalh. 5 Zeitintiah “khuazing,” timi tampi le “bawipa,” tampi cu van le vawlei ah an um ko hnga, a um zong an um liangluang taktak ko; 6 asinain kannih caah cun Pathian pakhat lawng, zeizong thil vialte sertu kan Pa a si i amah caah a nungmi kan si, cun Bawipa pakhat Jesuh Khrih a um i amah thawng cun zeizong vialte ser an si i kannih zong amah thawng cun kan nung.

7 Sihmanhsehlaw cu hngalhnak cu kan dihlak in kan ngei lo, mi cheu hna nih atu tiangin siasal bia tawnmi an si caah an eimi cu siasal thawinak rawl hunh khan in an ei tawn; an chiaòha thleidannak a der caah cu rawl nih cun a kan thurhhnawmh tiah an i ruat. 8 Rawl nih cun Pathian sinah kan hmai a hngalter lai lo. Kan ei lo zongah kan chia hlei lai lo, kan ei zongah kan òha hlei lai lo. 9 Ruahnak nan ngeihmi ruangah a derthawmmi hna tlukrilhnak a si nakhnga lo tu i ralring u. 10 Hngalhnak a ngeimi nangmah cu siasal biakinn ah rawl hunhmi na ei kha a chiaòha thleidannak a derthawmmi nih an hmuh ahcun ei ve awkah a lung a zuanter lai lo maw? 11 Cuti a si ahcun na hngalhnak ngeihmi cu Khrih an caah a thimi, a derthawmmi Khrihfa unau hna caah hrawktu a si lai. 12 Cu bantukin unau hna cungah na sual i an chiaòha thleidannak a derthawm lioah an lung na fahter hna ahcun Khrih cungah na sual a si. 13 Cucaah rawl nih ka unau a tlukter hna ahcun ka unau hna tluk lo awkah thawinak sa cu kan ei bal ti lai lo.