26
1 Agrippa nih Paul cu, “Na kong chimnak nawl kan pek,” a ti. Cun Paul nih a kut a zao i aa runvennak cu a chim.
2 “Siangpahrang Agrippa na hmaiah a si hi vanòhat ah kaa rel. Judah mi nih sual an ka puhnak vialte kaa runvennak cu nihin ah hin ka chim lai;
3 zeitintiah nang nih cun Judah mi nunzia le i alhnialnak na hngalh khun caah lungsau tein ka ngaihpiak ko tiah kan nawl.
4 Ka no lio tein ka miphun hna lakah le Jerusalem ah ka nunning cang cu a hramthawk tein Judah mi vialte nih an hngalh.
5 An chim duh ahcun kan biaknak ah a kerkawi bikmi bu ah Farasi mi pakhat in a rak nungmi ka si kha caan saupi an hngalh cang.
6 Atu cu kan pupa hna sinah Pathian nih bia a rak kammi ruahchannak caah tazacuai in ka dir.
7 Cu biakamnak hmuh awk ruahchan cun kan miphun hleihnih hna nih a chunchun a zanzan in lungthin tak tein an biak. Maw siangpahrang cu ruahchannak ruangah cun Judah mi nih sual an ka phawt.
8 Pathian nih mithi a thawhter ti cu nannih nih zeitindah a si kho lo tiah nan ruah?
9 Keimah hrimhrim zong nih hin Nazareth khuami Jesuh min doh cu ka tuah khawh chungin ka tuah awk a si tiah ka rak ruah.
10 Cu bantuk cun Jerusalem ah ka rak tuah. Mithiangmi hna lakin mi tampi cu thong ah ka rak thlak hna lawng si loin tlangbawi upa hna nawl peknak ka ngeih pinah an thah hna zongah khan ka hnatlakpi ve hna.
11 Sinakok kip ah ka hrem tawn hna i an biaknak hlawtter awk kha kaa zuam i an cungah thinhun tuk buin ramdang hna khua tiangin ka va hrem hna.
12 Cu bantuk tuah awk cun tlangbawi upa hna nawl peknak le fialnak he Damaskas ah ka kal.
13 Maw siangpahrang, lam i ka kal lioah cun chunlaicer ah, van in ni nakin a ceu deuhmi ceu pakhat ka hmuh i keimah le ka hawile he kan velchum kha a kan cerh.
14 Kan dihlak in vawlei ah kan tluk dih tikah Hebru holh in aw pakhat nih, ‘Saul, Saul, zeicahdah na ka hrem? Fung zum chuih cu nangmah caah dahkaw a fah,’ a ka ti kha ka theih.
15 Cun kei nih, ‘Ahodah na si, Bawipa?,’ ka ti. Cun Bawipa nih, ‘Keimah cu na ka hremmi Jesuh ka si.
16 Tho law dir, zeitintiah na sin i ka langhnak cu keimah kong na ka hmuhnak le na sinah ka langhter laimi thil kongah ka rianòuantu le biatheitu na si awk caah a si.
17 Ka hei in thlahnak Judah mi le Jentail mi hna sinin kan khamh lai.
18 Keimah an ka zumhnak thawngin an sualnak cu ngaihthiam an si nakhnga le mithiang mi hna he an um òi khawh nakhnga Satan òhawnnak in Pathian sinah muihnak in ceunak ah an i mer khawh nakhnga caah an mit na auter hna lai,” a ka ti.
19 Cuti a si caah maw siangpahrang Agrippa, van in langhnak cu ngaih lo awkah a òha ka ti lo.
20 Damaskas i a ummi hna sinah ka chim hmasa i Jerusalem le Judea ram vialte le Jentail mi hna sin zongah sual ngaihchih in Pathian sinah i mer in an i ngaihchih taktak langhnak he aa tlakmi tuah awk a sinak kha ka chim.
21 Hi ruangah hin Judah mi nih biakinn chungah an ka tlaih i thah an ka zalh.
22 Nihin ni tiang hin Pathian sinin a rami bawmhnak kha ka hmuh caah mi hme le mi ngan hna hmaiah dir in ka chim. Profet hna le Moses nih an chimmi,
23 ‘Khrih nih cun sifahnak a in lai i a thimi hna lakah a tho òhanmi hmasa bik a si lai i ceunak cu Judah mi le Jentail mi an pahnih sinah a chim lai,’ tiah an chimmi hlei in zeihmanh ka chim lo,” a ti.
24 Cuti Paul nih aa runvennak a chim ah cun Festas nih aw thangpi in, “Paul, na molh. Na thiamsannak nih an molhter,” a ti.
25 Sihmanhsehlaw Paul nih, “A ka molh lo, upat tlak Festas, a hmaan taktakmi te ka chim ko.
26 Siangpahrang nih hin a hngalh komi a si caah amah sinah cun zalong tein ka chim; zeitintiah hi thil hi a thli in a kenne ah chim a si lo caah hngalh loin a um lai lo tiah ka zumh.
27 Siangpahrang Agrippa, profet hna kha na zum hna maw? Na zumh ti ka hngalh,” a ti.
28 Agrippa nih, “Caan tawite chungah maw Khrihfa canter na ka timh?,” a ti.
29 Paul nih, “Caan tawi a si zong caan sau a si zongah nangmah lawng hmanh si loin nihin ah ka bia a theimi vialte hna hi keimah bantuk an si awk ka duh; thir cikcin i khih ve awk tu hi cu ka ti lo,” a ti.
30 Cuticun siangpahrang cu a tho. Mangki bawi le Bernis le an sinah a òhumi vialte cu an tho ve;
31 an kal hnuah pakhat le pakhat an i ceih i, “Hi pa nih hin thihtlak le thongtlak awk tlak zeihmanh a tuah lo,” an ti.
32 Agrippa nih Festas sinah, Hi pa nih hin Sizar sinah azu khang hlah seh law cu thlah khawh a si ko hnga,” a ti.