25
1 A peng i rianòuan awk i a ratnak in ni thum hnuah Festas cu Sisaria in Jerusalem ah a hung kal.
2 Tlangbawi upa hna le Judah upa hna nih Paul sual an puhnak cu an rak chimh;
3 Jerusalem i kalpi dingin zaangfah an hal i lam in rak bawh i thah kha an timh.
4 Festas nih Pawl cu Sisaria thong ah an chiahnak le, cun amah zong kal tuan aa timhnak kha a chimh hna.
5 “Cucaah, nanmah lak i upa nawl ngeimi nih ka zul hna seh law cu pa cu sualnak a ngeih a si ahcun taza va cuai ko hna seh,” a ti hna.
6 An sinah a tam bik ni riat in ni hra tluk a cam hnuah Sisaria ah cun a vung kal i a thaizing ah biaceihnak ah a òhu colh i Paul rak chuahpi awkin nawl a pek hna.
7 A rat tikah Jerusalem in a rungmi Judah hna nih cun an but i sualpuhnak biafak tampi an chim nain bia pipa ah an chuahter kho lo.
8 Paul nih amah runvennak ah hitihin a ti, “Judah phung a si zongah, biakinn a si zongah ka buar lo i Sizar zong a lungfahnak ka tuah lo.”
9 Festas nih Judah mi hna lungton a duh caah “Jerusalem ah kal i sual an in phawtnak hi keimah hmaiah ceih na duh maw?” a ti.
10 Paul tu nih cun, “Sizar biaceihnak hmaiah ka dir lai, cuka ah cun ceih awk hrim ka si; Judah mi hna cungah zeihmanh sualnak ka tuah lo cu nangmah hrimhrim nih na hngalh tuk ko.
11 Thil òhalo a tuahtu ka si i cu ka tuah ruangah thih ka tlak ahcun thihnak in luat awk ka kawl lo; sual an ka puhnak ah hin zeihmanh a um lo ahcun ahohmanh nih an sinah nan ka chan kho lai lo. Sizar siangpahrang sinah azu ka khan,” a ti.
12 Cun Festas nih ruahnak a petu hna he an i ceih hnuah, “Sizar sinah azu na khan caah Sizar sinah na kal lai,” a ti.
13 Cun ni tlawmpal a liam hnuah siangpahrang Agrippa le Bernis cu Festas hung don dingin Sisaria ah an ra.
14 Ni tampi an cam caah Festas nih Paul bia kha siangpahrang hmaiah a chuahpi.
15 “Feliks nih thongtla a chiahtakmi mi pakhat a um; Jerusalem i ka vung kal lioah tlangbawi upa hna le Judah khua upa hna nih a kong an ka chimh i amah kha sualphawtter an ka duh.
16 Ka lehnak hna cu, sual puhmi cu a puhtu he hmaitonh tein an i ton hlanah cun ahohmanh sual phawt cu Rom phung a si lo, sual an puhnak ah khan aa runven caan a ngeih awk a si ka ti hna.
17 Ka sin i an rat tikah rauhter loin a thaizing ah biaceihnak ah ka òhu colh i amah cu ka auhter hna.
18 Sual puhtu hna cu an dir i ka ruahnak tluk in biasual an chuahpi lo.
19 An biaknak zumhning le mipa pakhat Jesuh timi cu a thi i a nung òhan ko, tiah Paul nih a timi kong tu ah almi an ngei lehlam.
20 Cucu zeitindah ka kherhlai lai ti awk ka hngalh lo caah Jerusalem ah kal i cuka i a biaceih cu a duh le duh lo kha ka hal.
21 Sihmanhsehlaw Paul nih Sizar ceih te awkin thongchung i um ko awk kha a hal caah Sizar sin i ka kuat khawh hlan paoh thongchung i chiah ko awkin nawl ka pek,” a ti.
22 Agrippa nih Festas sinah, “Mah pa cu keimah hrim nih a bia theih ka duh,” a ti. “Thaizing ah na theih te ko lai,” a ti.
23 A thaizing ah Agrippa le Bernis cu rumra keng ngai in an ra i bia ngaihnak innpi ah cun thonghaotu ralbawi le khua upa mithmai ngei deuh hna he an lut. Cun Festas nawl peknak in Paul cu an rak chuahpi.
24 Cun Festas nih, “Siangpahrang Agrippa le kan sinah a rak chuakmi vialte hna Jerusalem le hika i Judah mi vialte nih amah hi nun awk a tlak ti lo tiah an au lengmang i an ka nawl hnawhchanmi pa cu nan hmuh.
25 Sihmanhsehlaw thih tlak in a sualmi zeihmanh ka hmuh lo ca le amah zong nih Sizar sinah azu a khan caah, a sin kuat awk cun ka ruah.
26 Sihmanhsehlaw ka bawipa sinah a kong òial awk fiangfai in zeihmanh ka ngei lo. Cucaah, na hmaiah ka rak chuahpi, ka siangpahrang Agrippa, nangmah hmai hrimhrim ah ka ratpi; biahal hnuah òial awk cu ka ngei te lai hih.
27 Zeitintiah thongtla pakhat hei kuat òung i sual an puhnak chim awk set um lo cu sullam a ngei hnga lo,” tiah ka ruah.