22
“U le nau, pale hna, nan hmaiah kaa runvennak bia ka chim laimi hi ngai hmanh u,” a ti.
Hebru holh in bia a chim ti an theih cun an dai chinchin. “Judah mi ka si i Silisia peng Tarsas khua kek ka si. Asinain hi khualipi ah hin Gamaliel kut tangah, kan pupa hna phung kha rialrep ngaiin cawnpiakmi ka si i nihin i nanmah bantuk te hin Pathian leiah aa biatak ngaimi ka si ve. Hi Lam a zulmi hna hi thi lakin ka hrem hna i nu he pa he hri khih in thong thlak dingah ka chanh hna. Cucu tlangbawi zik le khawngsil upa hna kha a ka hngaltu an si. An sinin Judah unau hna pek dingah ca ka lak i cuka i a ummi Khrihfa hna zong khih i dantat awkin Jerusalem i ratpi dingin Damaskas ah ka kal.
Damaskas ah ka kal i ka phanh dengmang tikah chun hrawngah khin van in a cer ngaimi ceu nih hlauhsaphak in ka velchum vialte a run ceuh. Vawlei ah ka tlu i, ‘Saul, Saul, zeicahdah na ka hrem?,’ a ka timi aw pakhat ka theih. Cun kei nih cun, ‘Ahodah na si, Bawipa?,’ tiah ka leh. Cun anih nih, ‘Keimah cu Nazareth khuami Jesuh, na ka hremmi cu ka si,’ a ti. Ka hawile nih cun ceu cu an hmuh ko nain ka sinah bia a chimmi aw cu an thei lo. 10 Cun ka thawh i, ‘Zeidah ka tuah lai, Bawipa?,’ ka ti. Bawipa nih cun, ‘Tho law Damaskas ah va kal; cuka ah cun zeizong vialte na tuah hnga dingmi chimh na si lai,’ a ti. 11 Cu ceu nih cun a ka cerh tuk ruangah khua ka hmu kho lo i ka sin i a ummi hna nih ka kut in an ka hruai i Damaskas ah cun kan lut.
12 Ananias timi pa pakhat phung ningin aa pumpemi le cuka i a ummi Judah mi hna nih an chimthiam ngaimi cu 13 ka sinah a ra i ka pawngah a hung dir, ‘Unaupa Saul, khua hmu cang,’ a ti. Cun, cu caan te ah cun khua ka hmu colh i amah cu ka hmuh. 14 Anih nih cun, ‘Kan pupa hna Pathian nih a duhmi hngalh awk le Miding Pa hmuh awk le a aw theih dingin an thim; 15 na hmuhmi le na theihmi vialte kong hi mi vialte sinah amah ca in theitu na si lai. 16 Cucaahcun zeidah na hngah. Tho law amah min au in baptisma ing law na sualnak hna cu i òawl,’ a ka ti.
17 Jerusalem i ka kir tikah biakinn chungah thla ka cam i mangcanghlan in ka um, 18 amah cu ka hmuh i, ‘I khulranh law Jerusalem in chuak zokzok, zeitintiah ka kong na chimmi hi an cohlang lai lo’, a ka ti. 19 ‘Bawipa, sinakok kip ah nangmah an zummi hna cu thong ah ka thlakter hna i ka velh hna kha anmah nih an hngalh. 20 Na bia theitu Steven thi a luan ah khan keimah zong an pawngah ka dir ve ko i ka hna a tla ve i a thattu hna puan kha ka putpiak hna,’ ka ti. 21 Cun anih nih, ‘Chuak, zeitintiah lam hlatpi i Jentail mi hna sinah kan thlah lai,’ a ka ti,” tiah a ti.
22 Cu a chim tiang kha cu an ngaih ko; cu hnu cun an aw an i hlerh i, “Mah bantuk mi cu vawlei in hlo ko, zeitintiah nun awk a tlak lo,” tiah an au. 23 Cuti an au i an puan an hlerh i leidip van i an vorh ah khan 24 thonghaotu ralbawi nih ralkap umnak i luhpi in zeicahdah amah ralchan in cuti an au kha hngalh duh ah tuk i kherhlai dingin nawl a pek. 25 Sihmanhsehlaw tuk awkah saphaw hri in an khih tikah khan a pawng i a dir komi zahaotu ralbawipa sinah khan Paul nih, “Rom mi, sual phawt rih lomi, tuk hi na caah a phung a si maw ka chim hnek?,” a ti. 26 Cu bia cu ralbawi nih a theih tikah thonghaotu ralbawi sinah cun a va kal i, “Zeitindah na tuah lai? Mah pa hi Rom mi a si òung!” a va ti. 27 Cucaah ralbawi cu Paul sinah a va kal i, “Rom mi maw na si?! a ti. 28 Anih nih, “Ka si,” a ti. Thonghaotu ralbawi nih, “Hi Rom mi sinak hi kei nih cun tangka tampi in ka rak cawk,” tiah a leh. Pawl nih, “Kei cu Rom mi hrimhrim in hrin ka si,” a ti. 29 Cucaah bia a hal hngami hna kha an i zukphiak zau; Paul cu Rom mi a si i hri in a khih kha an hun hngalh tikah, thonghaotu ralbawipa zong cu a thin a phang.
30 Sihmanhsehlaw a thaizing ah cun zeiruang set ah dah Judah mi nih sual an puh hnga ti kha hngalh a duh i a hri khihmi a phoih hnuah tlangbawi upa hna le khawngsil upa dihlak kha pumh awkin nawl a pek hna i Paul cu a vun chuahpi i an hmaiah a dirter.