13
1 Antiok khua Khrihfabu chungah profet le cawnpiaktu hna tlawmpal an um. Cu hna cu Barnabas, Simeon, (Niger an timi), Sairin mi Lusias, Mangki Herod tlangchuak Manaen le Saul hna an si.
2 Thla an cam i rawl an ulh lioah Thiang Thlarau nih, “Barnabas le Saul hi rian ka thiahmi hna òuan awkah a dang tein ka thleipiak hna u,” a ti.
3 Cucaah rawl ulh le thlacam hnuah an cungah an kut an chuan i an thlah hna.
4 Cucaah Thiang Thlarau nih a thlah hna bantukin Seleukia ah an vung kal i cuka cun Saipras tikulh ah tilawng in an kal.
5 Salamis an phanh tikah Judah hna sinakok ah Pathian bia an chim. Johan an i bawmhter.
6 Tikulh cu a dihlak in Pafos khua tiang an òol dih i cu khua ah cun Judah mi profet deu mitlehthiam Bar-Jesuh an va hmuh.
7 Ramuk Serzias Paulus, mifim ngai pa sinah a um. Ramuk nih cun Pathian bia theih duh ah Barnabas le Saul cu a inn ah len a sawm hna.
8 Sihmanhsehlaw mitlehthiam Elimas (cucu a Grik min a si) nih cun ramuk cu zumhter lo a duh caah a rak doh hna.
9 Asinain Paul ti zongin an auhmi Saul, Thiang Thlarau in a khatmi nih cun dengteo in a zoh i hitihin a ti.
10 “Nangmah khuachia fa, dinnak vialte ral, hlenthawinak le leirawinak lawngin a khatmi pa, Bawipa lam ding kawiter hi na ngol lai lo maw?
11 Atu zohhmanh, Bawipa kut cu na cungah a phan cang, na mit a caw lai i caan tlawmpal chung cu ni ceu na hmu lai lo,” a ti. Chikkhatte ah chum le mui nih a zelh i a kut in a hruaitu dingmi kawl ah a vak.
12 Cun ramuk nih cun thil a hmuh tikah a zumh; zeitintiah Bawipa cawnpiaknak ah cun a khuaruah a har.
13 Cun Paul le a hawile hna cu Pafos khua in tilawng in an i thawh i Pamfilia ram Perga khua an phan. Johan nih Jerusalem leiah a kir tak hna;
14 asinain Perga cu an hei lonh i Pisidia ram Antiok ah an va phan.
15 Sabbath ni ah sinakok ah an kal i an òhu. Phung le profet cauk rel dih hnuah sinakok uktu hna nih mi an thlah i, “Unau hna, mi hna caah hin forhhaihnak biachim awk nan ngeih ahcun chim u,” an va ti hna.
16 Cun Pawl cu a dir i kut vaih in bia a chim Israel mi hna le cun nannih Pathian a òihzahmi hna zong, ngai hmanh u.
17 Hi Israel hna Pathian nih hin kan pupa hna cu a rak thim hna i Izipt ram i an rak um lioah khan mi lianngan ah a ser hna i a òhawnnak kut in a chuahpi hna.
18 Kum sawm li chung ramcar ah khan lungsau ngaiin a hruai hna.
19 Cun Kanaan ram chung miphun phun sarih a hloh hna hnuah an ram cu kum zali le kum sawm nga ca in ro ah a pek hna.
20 Cu hnu cun profet Samuel tiang kha biaceihtu a pek hna.
21 Cun siangpahrang pakhat an hal; Pathian nih Benjamin hrinsor chungmi Kish fapa Saul cu kum sawm li chung ca in a pek hna.
22 Cun a phuah hnuah David kha an siangpahrang ah a ser; amah kong cu hitihin a chim; ‘Jesse fapa David, ka lung duhmi ka hmuh i ka fialmi paoh a tuah lai,’ a ti.
23 Amah hrin chung cun a biakam bantuk khan Israel mi hna caah Khamhtu Jesuh cu a pek cang hna.
24 Amah rat hlanah Johan nih Israel mi vialte sinah sual ngaihchihnak baptisma kong a rak chim hmasa.
25 Johan nih a rian a lim zuahmah ah khan, “Aho a si tiah dah nan ka ruah? Kei cu amah cu ka si lo. Ka hnuah a ra laimi pakhat i a kedan hri phoih awk hmanh ah kei cu ka tlak lo,” a ti.
26 Unau hna, Abraham chungkhar hna le Pathian a òihzahmi nannih zong hi khamhnak kong cu kan dihlak sinah a phan cang.
27 Jerusalem a ummi hna le an uktu hna nih amah cu an hngalh lo hleiah sabbath ni fate an rel lengmangmi profet bia zong an hngalthiam lo i an thah, cu nih cun hi thil hna hi an tlinter.
28 Thih tlakin a cungah sualnak zeihmanh an hmu lo nain thah awkah Pilat kha an hal.
29 Amah kong ah rak òialmi an tlinh dih hnuah vailam cun an òhumh i thlan ah an vui.
30 Sihmanhsehlaw Pathian nih thihnak cun a thawhter.
31 Galilee in Jerusalem ah a sin i a rami hna sinah khan ni tampi chung aa langhter, cu hna cu atu ah hin zapi sinah theihtertu an si.
32 Kan pupa sinah Pathian nih a rak kamhmi hna thawngòha cu kan rak in phorh hna.
33 Cucu a fale kan sinah Jesuh a thawhter nakin a tlinter cang; salm a pahnihnak zongah khan hitihin a rak i òial:
‘Nangmah cu ka fapa na si,
Nihin ah hin fa ah kan canh!’ tiin.
34 Thutnak ah kir òhan ti loin thihnak in a thawhter òhannak ah hitihin a chim:
‘A thiangmi le ahmaanmi David thluachuahnak kan pek lai’
35 Cucaah salm dang ah hitihin a chim fawn rih;
‘Na Mithiang Pa cu na thutmanter lai lo’, a ti.
36 David tu nih cun amah chan ah Pathian duhnak a rak tlinh hnuah a thi, a pupa hna sinah an vui i a ciam;
37 sihmanhsehlaw Pathian nih a thawhter mipa cu a ciam lo.
38 Cu a si caah cun u le nau hna, nan sinah hngalhter si ko seh. Cu pa thawng cun sual ngaihthiamnak cu nan sinah phuan a si cang
39 Moses phung nih an luatter khawh hna lonak vialte khan a zummi paoh cu amah thawng cun luatter nan si cang.
40 Cu a si caah profet nih a rak chimmi
41 ‘Zohhmanh, zomhtaih a hmangmi hna
Nan khuaruahhar u law loral ko u;
Zeitintiah nan chan ah hin rian ka òuan ko,
Kan òuanmi cu mi nih an in chimh hna hmanh ah
Nan zum bal hnga lo’
timi hi nan cungah a tlunnak hnga lo i ralring ko u,” a ti hna.
42 Pumhnak in an chuahpah ah khin a hmai sabbath ni i cu thil hna cu ra chim òhan dingah an nawl hna.
43 Sinakok i an i pumhnak a hung dih tikah Judah mi tampi le Judah mi le Judah biaknak ah a lung aa thleng i aa pumpe taktakmi tampi nih Paul le Barnabas cu an zulh hna i annih nih Pathian vel chungah cun um peng ko awk an rak forh hna.
44 A hmai sabbath ni ah cun a khuapi bantukin Pathian bia ngaih awkah cun an i pum.
45 Sihmanhsehlaw Judah mi hna nih mi runpi cu an hmuh hna tikah an nah a chuak tuk i Paul biachimmi cu an al i an vawlhpamh.
46 Paul le Barnabas nih cun ralòha ngaiin, “Nanmah sinah Pathian bia chim hmasa awk cu a herh ko nain nannih nih nan phenhei i nuncanghmunhnak hmu tlak lo ah nan i chiah caah, zohhmanh u, Jentail hna sinah kan i mer lai.
47 Cuti tuah awk cun Bawipa nih,
‘Jentail hna ceunak caah kan chiah hna
Van hram deng tiang khamhnak nan phorh khawh nakhnga;
tiah nawl a kan pek,”
48 Cucu Jentail mi hna nih an theih tikah an i lawm i Pathian bia cu an thangòhat i nuncanghmunhnak hmuh awkah thim ciami hna paoh nih an zumh.
49 Cuticun Bawipa bia cu cuka hrawng vialte ah cun a thang dih.
50 Sihmanhsehlaw Pathian lei ah aa pumpemi hmaizah tlak nu hna le khua hruaitu upa hna kha Judah mi nih an tuk hna i Paul le Barnabas cu an hrem hna i an peng lengah an òhawl hna.
51 Cucaah an ke i leidip an khawn hnawh hna i Ikonium ah an kal.
52 Zultu hna cu lunglawmhnak le Thiang Thlarau in an khat.