14
Jerusalem Le Miphun Dang Pawl
1 Bawipa in thu a òhennak ding ni cu a nai zo. Cule Jerusalem khua an ram dingih an lonmi thilri pawl cu na mithmuh ah an zem ding.
2 Bawipa in miphun hmuahhmuah Jerusalem do dingah a ko khawm ding. Khuapi cu an lak ding, inn thilri pawl an long dingih nunau pawl an kaihrem ding. Minung a hrek cu sal ah an kai ding, asinain a dang pawl cu khuapi ihsin khui hmanah an hruaihlo lo ding.
3 Cule Bawipa cu a vung feh dingih cuih miphun pawl cu, khuahlan lai ih a rak do vekin, a do ding.
4 Cutikah Jerusalem ihsin nisuahnak lam Olif Tlang parah Bawipa cu a ding ding. Cule Olif Tlang cu nisuahnak lam ihsin nitlaknak lam ih a fehmi phairawn kaupi in òhenhnih ah a òhen ding. Tlang ih hrek cu saklam ah a òhawn dingih a dang hrek cu thlanglam ah a òhawn ding.
5 Olif Tlang òhenhnih ih a òhentu cuih phairawn ihsin nan tlansuak ding. Judah siangpahrang Uzziah san lai ah ling a rak hnin ih nan pu le nan pa pawl an rak tlansuak vekin nan tlan ve ding. Bawipa ka Pathian cu a ra dingih a mithiang hmuahhmuah a rak hruai ding.
6 Cuih caan a thlen tikah khawsik le vurtlak ti a um lo ding.
7 Khawthim tikhal a um nawn lo ding. Zan hmanah sun khawvang lawng a um ding. Ziangtikah cuvek in a si ding, ti cu Bawipa lawng in a thei.
8 Cuih ni a thlen tikah cun Jerusalem ihsin nunnak tidai a luang ding; tidai hrek cu Tipi Thi ah a luang dingih a hrek cu Mediterranean tifinriat ah a luang ding. Òhal tilo, fur tilo kum letsuak in a luang ringring ding.Ref 14.8 Ezk 47:1; Joh 7:38; Thup 22:1;
9 Cule Bawipa cu leilung pumpuluk ih siangpahrang a si ding. Mi hmuahhmuah in Pathian tiah an biak dingih amah ih hmin keel in an thei ding.
10 Hi leiram cu a zate in saklam ah Geba ihsin thlanglam ah Rimmon tiang hmun rawn ah tuah òheh a si ding. Jerusalem cu a kiangkap ram hnakin a sang cuang ding. Hi khuapi cu Benjamin kotka ihsin hlanlai ih kotka an rak umnak Akil Kotka timi tiang a kau ding; cule Hananel innsang ihsin siangpahrang sabit rialnak hmun tiang a si ding.
11 Cutawkah mipi pawl cu humhimnak le thlangamnak thawn an um dingih siatsuahnak zianghman an phang lo ding.Ref 14.11 Thup 22:3;
12 Bawipa in Jerusalem a dotu miphun pawl parah tuksumza natnak a thlengter ding. An nung cungin an taksa a òawt ding; an mit le an lei pawl tla an òawt òheh ding.
13 Cutikah Bawipa in an thin phangter in an lung a buaiter dingih mi hmuahhmuah in an kiangih a ummi milai pohpoh kai tahrat in pakhat le pakhat an thawi aw ciamco ding.
14 Judah mi pawl in Jerusalem an òan dingih ral an do ding. Miphun tampi ih thilri le lennak cu an long ding: Sui, ngun le hnipuan ticawk lo in an lak ding.
15 An ral pawl riahhmun ih a ummi òilva hmuahhmuah: Rang pawl, laak pawl, kalauk pawl le laak faate pawl par khalah tuksumza natnak a thleng ve ding.
16 Cule Jerusalem a dotu miphun pawl sungin a tangsun pawl cu Ziangkimtithei Bawipa cu siangpahrang a si tiih biak dingah le Puanthlam Puai tuah dingah kumtinte Jerusalem khua ah an feh ding.Ref 14.16 Pui 23:39-43;
17 Ziangkimtithei Bawipa cu siangpahrang a si tiah biak ding a eltu le a feh duh lotu leilungtlun ih miphun pakhatkhat an um ahcun an ram ah ruah a sur lo ding.
18 Izipt mi pawl in Puanthlam Puai an tuah duh lo ih an feh duh lo a si ahcun Jerusalem feh a eltu le Pathian a bia duh lotu pawl parih tuksumza natnak Bawipa ih a thlentermi cu an parah a thleng ve ding.
19 Izipt mi siseh, miphun dang siseh, Puanthlam Puai an tuah duh lo a si ahcun cubangtuk hremnak cu an parah a thleng ding.
20 Cutikah cun rangleng hnuktu rang pawl parih thlaih mi darkhingte par hmanah “ Bawipa ih ta, a thianghlimmi a si,” tiah ngan òheh a si ding. Biakinn sungih rawl suannak beel pawl cu biakòheng hmaiih kheng pawl vekin bungbeel thiang an si ding.
21 Jerusalem le Judah ram pumpi sungih a ummi beel pohpoh cu Ziangkimtithei Bawipa biaknak hrangah a dang tein ret an si ding. Cuih beel cu thawinak a petu pawl in an pekmi thawinak sa suannak ah an hmang ding. Cuih ni a thlen tikah Ziangkimtithei Bawipa ih Biakinn sungah thil zuartu le thil leitu pakhat hman an um nawn lo ding a si.