2
1 Kei cu Sharon ramlak in pangpar le
tlangrawnte lili par vek ka si men.
Mipa
2 Hlingbur lakih lili par bang,
lung ka duh nu
a leenghawi lakah si ve ngai.
Nunau
3 Lung ka duh valpa cu
A val hawi lakah,
Tuthing lak um epal kung bang a cuang;
A phenthlam hnuai ah to ningna,
A rah ka hrangah a thlum hlei ce.
4 A puai khaanpi sung i hruai lut,
Duhnak puanzar ka tlun a zaar.
5 Sabit car in ka tha tlungter,
Epal rah in ka zaang damter;
Zuun ngaih vangah,
Ka uai hninghniang.
6 Kehlam kut in i òaangkham ih,
A vorhlam kut in kei i pom.
7 Jerusalem leengrual le tla,
Kan duhawknak kharhmar lo dingin,
Zuanzang tlancak zukneng zaatum,
hminsal in kei thu in kam uh.
Hla Finghnihnak
Nunau
8 Ka duh valpa ih aanka thei ing,
Ra tlan vervo thlua tlang cungin,
Tlangsang kaan in
ka hnenah zuang.
9 Ka tum val zaatum no bang,
No thianthite zukneng a iang;
Cunah dir maw pharson kiangah,
Tukvirh ong in i rak cuan maw,
Ral vanphar tal in tin a bih.
Mipa
10 Aanka i hlan lung ka duh cun,
Duh hniang, ra aw,
Lung ka duh cem ra ta hram aw.
11 Thlatang khawdai a cem zo ih,
Vanrial ruahpi a kang ve zo.
12 Hramlak ah pangpar an par zo.
Hlasak caan cu atu hi a si;
Thuro hlasak ramsung a thang.
13 Theipi rah tla cu an hmin thlang,
Zilthli lakah hmui verver in,
Sabit par rimhmui a zeel aw.
Duh hniang, ra aw,
Lung ka duh cem ra ta hram aw.
14 Lungpi kua sungih a relhmi
Kaiva thuro bangtuk na si.
Iang nei na mithmai zoh ka duh
Na aw thlumte tla theih ka duh.
15 Cinghnia pawl kha kaita hai uh,
A cuih cinghnia fano tla kha;
Sabit hmuan parmawite
an siatsuah ta hlanah.
Nunau
16 I duhtu ih ta cu ka si,
Anih khal ka ta a si ve.
A tuurual cu lili par lakah a kil,
17 Zinglam thlizil nem a hrang ih
Zinglam khawfing a cah tiangin,
Rakir thlang aw, ka duh bikmi,
Bether tlang ih zukneng le
zaathar tla bangin.