SOLOMON HLA
(The Songs of Solomon)
Thuhmaihruai
Solomon Hla timi hi Hla lakih Hla òha bik (The Song of Songs) tiah Hebru Baibal sungah a um. Solomon Hla timi hi neta lam ih an kawhnak hmin a si. Ziangah Solomon Hla an run ti tile Hebru Baibal an nganmi sungah Solomon hmin a tel vivo (1:1,5; 3:7, 9, 11; 8:11, 12) ruangah a si. Solomon ih phuahmi hla khal a si thei; culole Solomon upatnak ih an phuahmi hla khal a si thei. Kan thei fiang lo.
Hi hla hi fala tlangval duhawknak hla khawlkhawmmi a si. A tam bik ahcun mipa in nunau a lehmi hla le nunau in mipa a lehsalnak hla an si.
Hi hla hi Judah mi pawl cun Pathian le milai kan pehzom awkdan langtertu zuk a si tiah an zum. Cun Khristian pawl khalin Khrih le a kawhhran pehzom awkdan zuk a si an ti ve. Asinan ‘Pathian’ timi òongfang a um lo ih ‘Khrih’ asilole ‘Khristian’ timi òongfang khal a tel lo. Hebru mi (Israel mi) le Judah mi pawl ih fala-tlangval ngainak hla a si, tiah Baibal thiamtu pawl tam deuh in an zum.
1
Hla lakih hla òha bik, Solomon ih phuahmi hlamawi pawl.Ref 1.1 2 Siang 4:32;
Hla Fingkhatnak
Nunau
Na hmur in i hnam aw,
I ngainak cu sabitti hnakin
a thlum sawn.
Nang cu a hmui in na hmui,
Zihmui bangin na hmin a thang.
Nunau zokhal nang ngai lo in
um thei hlah hai.
I hruai awla kan tlanhlo ding;
Ka bawipa si awla
na umnak khaan ah i fehpi aw.
Hmunkhat ah nuam tlang uh si;
Diriam in kan duhawknak sungah
kan ciah aw ding.
Nunau hmuahhmuah in
an lo ngai hi an mawh lo.
Jerusalem leengrual tla,
Dum hman ningna mi mawi ka si;
Kedar deuthlam bang ka dum nain,
Solomon inn
puanzar iang in ka mawi.
Ka dum ruangah i iai hlah uh,
Ni ih i eet ruangah hin;
Ka òa le pawl ka parah
an thinheng in,
Sabit dum ah hna in òuanter;
Zutmet awknak caan hman nei lo in.
I sim hnik law, nang ka ngai aw;
Khui ah simaw na tuurual na khalh?
Khui ah simaw an colh ding
sun ni ling ah?
Ziangahso tuukhal dang pawl ih
tuurual lakah,
Ka lo hawl rero ding?
Mipa
Nunau lakih duh thla leeng bik,
Nang in a hmun na thei lo maw?
Feh awla tuurual pawl thlun aw;
Tuukhal pawl ih thlamte kiangah
Na me hrangah tlimno hawl aw.
 
Ka ngai bikmi nang cun,
Rang nu pakhat in;
Faro rangleng hnuktu rangcang tampi
lung a thawhter bangin,
Valrual thinlung na thawhter hai.
 
10 Mawi tuk aw khua na sawm,
Ai sam na biang tlunah;
Man sung lungbang na hngawng tlunah
tlai sialso tein.
11 Hmanseh na hrang òaang orh
sui òhi tuah uh si,
Ngun khuut hlawn thil thawn.
Nunau
12 Tintling tlunah, zau maw ka bawi,
Ka zihmui rimthaw in a zeel.
13 Ka lungduh cu
mura rimthaw bang hmui,
Ka siang òaangcung par a zau ah.
14 Ka lungduh valpa cu
ram pangpar iang,
An sim Engedi sabit hmuan
parmawi khi bang.
Mipa
15 Mawi sersi ee, ka duh bik cu,
Huhnunnak na mit ah ni bang tle.
Nunau
16 Ka lungduh cem, valno lakah,
na piang hlei ce!
Nuam cuang hlei in lung i ngamter,
Zaunak tintling,
hramhring hmang in.
17 Kan inn kaan ah sidar thing,
A siling ah farthing si ngai.