4
Ishbosheth An That
1 Hebron ah Abner an that a si, ti kha Saul fapa Ishbosheth in a theih tikah a thin a phang ngaingai ih Israel mi hmuahhmuah khal an thin a nuam lo.
2 Midang an siim tikih an hotu bawi pahnih Ishbosheth in a nei ih an hmin ah Baanah le Rekhab an si. Anmah cu Benjamin miphun, Beeroth khua Rimmon ih fapa an si. Beeroth cu Benjamin ram sungah siar cih a si.
3 Beeroth ih a rak um hmasatu pawl cu Gittaim ah an tlan ih cutawk minung ah an cangta.
4 Cun Saul ih fapa Jonathan in fapa pakhat a nei ih a hmin cu Mefibosheth a si. Saul le Jonathan an thihnak thu Jezreel ihsin a ra than tikah Mefibosheth cu kum nga a kim. Amah a umtu nu in a lak ih a tlanpi. Asinan zamrang tukin a tlanpi ruangah a thlak pang ih Mefibosheth cu a ke pahnih in a bai ta.Ref 4:4 2 Sam 9:3;
5 Rekhab le Baanah cu Ishbosheth ih inn lamah an feh ih sun ah an va thleng. Ishbosheth cu sunih a colh laifang a si.
6 A sangka kiltu nunaunu cu sangvut a hrik rero lai ah a ih a hmu ih a it that. Cutiih a ihthat lai ah Rekhab le Baanah cu a thup tein an vung lut.
7 Innsung an thlen ve tein Ishbosheth ihnak khaan sungah an lut ih a ihthat laifangah Ishbosheth cu an sun ih an that. A lu an tan ih an lak hnuah zanvar Jordan Phairawn in an feh ih Hebron khua ah an thleng.
8 Ishbosheth ih lu cu David hnenah an fehpi ih a hnenah, “A lo raltu le a thah a lo tumtu Saul ih fapa Ishbosheth ih lu cu hihi a si. Tuih sun ah Bawipa Pathian in Saul le a tesinfa pawl parih phulaknak cu siangpahrang na hnenah a lo pek a si,” tiah an ti.
9 Cutikah David in, “Òihphannak hmuahhmuah sung ihsin i runtu a nungmi Bawipa ih hmin in siat ka serh a si!
10 Ziklag ah ra tahrat in Saul ih thihnak thu i ra simtu cun thuòha ka phur tiah a ruat. Asinan amah cu ka kai ih ka that. Thuthang a rak ken ruangih hlawhman ka pekmi cu thih a si.Ref 4:10 2 Sam 1:1-16;
11 Mawhnak nei lomi amah ih inn sungih a it laimi rori a va thattu misual pawl ih hrangah cun ziangtlukin so a har sinsin ding. Ishbosheth nan thah ruangah atu rori ah nan parah phu ka lak dingih lei parah hin nan ci ka hmit thluh ding,” a ti.
12 David in thu a pekih a ralkap pawl in Rekhab le Baanah cu an that ih an kut le an ke pawl an tan ih Hebron ih tili kiangah an thlai. Cun Ishbosheth ih lu cu an lak hnuah Hebron ahcun Abner ih thlan ah an phum.