20
Sheba Ral A Tho
1 Culai ah Benjamin mi Bikri ih fapa Sheba an timi pa pakhat a um ih amah cu mi hlotlau zet a si. Cule Sheba cun tawtawrawt tum tahrat in,
“David hnenah covo kan nei lo,
Jesse fapa ziang òhahnem lo!
Israel mi pawl, tlungthluh uh,”
tiah a au ciamco.Ref 20:1 2 Siang 12:16; 2 San 10:16;
2 Curuangah Israel mi pawl cun David cu an tlansan ih Bikri ih fapa Sheba hnenah an feh. Sikhalsehla Judah mi pawl cun David cu an duh thotho ih Jordan tiva ihsin Jerusalem tiang an thlun.
3 David cu Jerusalem a siangpahrang inn ah a feh ih a inn kilkhawitu dingih a retta mi a nusun pahra pawl cu a lak ih palik a kilter. An òulmi hmuahhmuah cu a pek thluh. Asinan an hnenah a it lo. An thih ni tiangin a dang tein a ret hai ih nuhmei bangin an um.Ref 20:3 2 Sam 16:22;
4 Siangpahrang in Amasa a ko ih, “Judah mi pawl cu hmunkhat ah ko thluh awla, tipsun ah hitawkah ra uh,” tiah a ti.
5 A ti vekin Amasa cu a feh ih Judah mi pawl cu a ko. Asinan siangpahrang ih ni a tin ni ah Amasa cu a kir lo.
6 Curuangah siangpahrang in Abishai a ko ih, “Absalom hnak hman in Sheba in harsatnak in pe sawn ding a si hi! Curuangah ka ralkap pawl fehpi awla Sheba cu va dawi uh. Culo ahcun kulhmi khuapi hrekkhat a la pang dingih kan kut sung ihsin a luat pang ding,” tiah a ti.
7 Curuangah Joab ih milai pawl, Kereth mi, Peleth mi le ralkap dang pawl tla in Abishai cu an thlun. Sheba dawi ding ahcun Jerusalem ihsin an suak.
8 Cule Gibeon ih a ummi lungto tumpi an thlen tikah Amasa thawn an tong aw. Joab cu a ralthuam a hruk ih a ralnam cu a kawm sungah a than ih a taikhap ah a thlaih. Hmai ah a suak ih cutikah a ralnam cu a tla.
9 Cule Joab in Amasa hnenah, “Ka rual, na dam maw?” a ti ih hnam zik vekin a vorhlam kut in Amasa ih khahmul a hei kaih.
10 Joab ih ralnam a ken kha a thei lo ih Amasa cu a ralring lo. Curuangah Joab in Amasa cu a pum ah a sun ih a sungril pawl cu leilung ah a suak thluh. Sunsal hman òul lo in hmakhat teah Amasa cu a thi.
Cule Joab le a nau Abishai cun Sheba cu an dawi vivo.
11 Amasa ih ruak kiangah cun Joab ih ralkap pakhat a ding ih, “David le Joab a òantu hmuahhmuah in Joab thluh uh,” tiah a au.
12 Lamzin laifangah Amasa ih ruak cu a thisen thawn ciah aw in a um. Cumi a hmutu pohpoh cu an colhta òheu ruangah Joab ih ralkap pa in Amasa ih ruak cu lamzin ihsin hramlak ah a dir ih puan pakhat a khuh.
13 Cutiih lamzin ihsin a ruak an dirh hnuah Sheba dawi dingah an zate in Joab cu an thlun.
14 Israel miphun umnak ram hmuahhmuah pal phahin Sheba cu a feh vivo ih Abel Beth Maakah timi khuapi ah a va thleng. Bikri miphun pawl an kokhawm aw ih a cuih khuapi ahcun an hei thlun.
15 Cun Joab ih ralkap pawl khal an thleng ve ih a cuih khuapi cu an kulh. An khuapi kulhnak phardawl cu tlu seh tiah Joab ih ralkap pawl cun phardawl hnuai ih leilung cu an lai ciamco. Cule phardawl lan theinak dingah a leng ihsin leilung in an khahsilh.
16 A cuih khuapi sungah cun nunau fim pakhat a um ih khuasung ih phardawl parih sin, “Ngai hnik uh, ngai hnik uh! Joab cu hinah ratter hram uh; a hnenih thusim ka duh,” tiah a au.
17 Joab cu a va feh ih, “Joab na si maw?” tiah a rak sut.
“Ka si,” tiah Joab in a ti.
“Bawipa, rak ngai hnik aw,”
tiah anih in a ti.
“Ka ngai ko,” tiah Joab in a ti.
18 Cutikah nunaunu in, “Hlanlaipi ihsin, “Abel ah feh uhla thu cu a cat ding,” tiah an rak ti òheu ih an ti vekin a cat ngaingai òheu.
19 Kan khua hi remawknak khua le an zohsomi khuapi a si ih, Israel ram sungah hin mi kilkhawitu nu bangtuk a si. Ziangahso cubangtuk khua cu a siatsuah na tum? Pathian ih ta a simi cu na siatbal ko sawh ding maw?” tiah a ti.
20 Cutikah Joab in, “A si lo. Nan khuapi cu ka siatsuah hrimhrim lo ding.
21 Kan tummi khal a si lo. Efraim tlangpar rammi Bikri ih fapa Sheba an timi in siangpahrang David cu a do ruangah a si. Cupa pakhat cu in rak pe uhla hih khua ihsin ka kir ding,” tiah a ti.
Cule nunaunu cun, “Cupa ih lu cu phardawl tlun ihsin na hnenah kan rak hlon mai ding,” tiah a ti.
22 A feh ih a ruahnak hmuahhmuah cu khuasungmi pawl a va sim. Sheba ih lu cu an tan ngaingai ih Joab ih hnenah phardawl tlun ihsin an vun hlon. Joab in tawtawrawt a tum ih, a ralkap pawl thawn a cuih khuapi cu an taan ih an khua ah an tlung. Joab cu siangpahrang hnenah Jerusalem ah a kir.
David Kuthnuai Ih Bawi Pawl
23 Joab cu Israel ralkap pawl hotu a si. Jehoiada ih fapa Benaiah cu siangpahrang David ih inn kilvengtu Kereth mi le Peleth mi pawl hotu a si.
24 Adoniram cu leiram an òuanter mi pawl hmuahhmuah hotu a si; cule Ahilud ih fapa Jehoshafat cu sungòuan a si.
25 Sheva cu zung cazipi a si. Zadok le Abiathar cu puithiam an si ih,
26 Jair khuami Ira khal David ih puithiam pakhat a si ve.