19
Joab In David A Kawk
1 Siangpahrang David cu a òap ringring ih a fapa Absalom ngai in a um tiah Joab an va sim.
2 Cule siangpahrang cu a fapa a thih ruangah mithi ngai in a um, ti kha David ih ralkap hmuahhmuah in an theih tikah an zate hrangah a cuih ralneh ni cu riahsiatnak ni riangri ah a cang.
3 Ralkap pawl an kir tikah, ral an sung hnu ih ningzak ih a tlanmi ralkap bangin, khuapi sungah cun thawthang nei lo in an lut.
4 Siangpahrang cu a hmai a hup aw ih, “Absalom, ka fapa! Ka fapa Absalom ka fapa,” tiah napi in a òap zok rero.
5 Cutikah Joab cu siangpahrang inn ah a feh ih a hnenah, “Nangmah le na fapa pawl le na fanu pawl le na nupi pawl le na nusun pawl ih nunnak a humhimtu ralkap pawl cu tuih sun ah an ning na zahter a si.
6 A lo duhdawtu pawl cu na hua ih a lo huatu pawl sawn cu na duh. Na ralbawi pawl siseh, na ralkap pawl siseh, na hrangah zianghman kan si lo, tihi fiangten na langter zo. Tuih sun ahhin Absalom nungin kannih sawn hi thi nungla, na lung a kim zet ding, ti cu ka hmu a si.
7 Curuangah feh awla thathawhnak thu malte tal na ralkap pawl hnenah va sim aw. Na sim duh lo asile, Bawipa ih hmin salin ka lo sim: Thaizing ah ralkap pakhat hman na hnenah an um nawn lo ding. Na no lai ihsin tuih ni tiang, na nun sungih na tonmi harsatnak hmuahhmuah lakah cumi cu na hrangah a harsa bik a si ding,” tiah a ti.
8 Cule siangpahrang cu a pok ih khuapi kotka kiangah a va to. Cutawkih a um kha a minung pawl in an theih tikah a hnenah an ra thluh.
A culai ah Absalom hnenih a òangtu Israel mi pawl cu an tlan ih an inn ciar ah an tlung.
9 Cule an ram pumpi ih an rel khawm bikmi cu, “Kan ral pawl kut sung ihsin siangpahrang David in, in hum zo. Filistin pawl kut sung ihsin in luatter ih atu ah Absalom ih ruangah amah hman kan ram sungah a um nawn lo.
10 Absalom cu kan siangpahrang ah hriak kan culh nain raldonak ah a thi zo fawn. Ziangahso siangpahrang David cu kirtersal dingah zotal ih kan tawlrel lo?” tihi a si.
Jerusalem Ah David A Kir
11 Israel mi pawl ih an rel reromi thu cu siangpahrang David in a rak thei. Curuangah puithiam Zadok le Abiathar tla cu Judah mi hruaitu pawl hnenah a thlah ih, “Siangpahrang bawipa a inn ih kirter dingah ziangahso nan taw a tlai?
12 A sungkhat nan si ih amah ih titsa rori nan si. Ziangahso a kirsalnak ding thu ahhin hnufualtu bik nan si? tiah va ti hai uh,” a ti.
13 Cule David in an hnenah, Amasa hnenah sim dingin hitiin a cah, “Nang hi ka sungkhat na si. Atu thok ihsin Joab ih ai ah ka ralkap hotu ah ka lo tuah ding. Ka lo tuah lo asile Pathian in i that seh,” a ti.
14 Cutiih David òongkam a um ruangah Judah mi hmuahhmuah ih thinlung cu, mi pakhat ih thinlung bangin, a her aw thluh ih, “Na kuthnuai ih bawi pawl thawn ra kirsal uh,” tiah David cu an cah.
15 Curuangah David cu a kir ih, tiva khatlam ralih hruai dingah Gilgal ih a rami Judah mi pawl in Jordan Tiva in an rak hmuak.
16 Cule culaifang ah Bahurim khua ihsin Gera ih fapa, Benjamin mi Shimei cu siangpahrang David tong dingah Jordan lam ahcun a vung tlan ve.Ref 19:16 2 Sam 16:5-13;
17 Shimei cu Benjamin miphun ihsin minung thawngkhat thawn an feh. Cun Saul innsang ih hnenum a rak òuantu Ziba cu, a fapa hleinga le a hnenum kul thawn, siangpahrang hlanah Jordan tiva ah a rak thleng.
18 Tiva cu an tan ih siangpahrang ih innsang pawl khatlam ralih hruai bawmtu ah le siangpahrang ih òulmi hmuahhmuah tuahtu ah an cang.
Siangpahrang in tiva a tan zik tikah Shimei cu a hmaiah a bok ih,
19 “Maw siangpahrang bawipa, Jerusalem ihsin na feh ni ih thil ka tisual mi pawl kha cing hram hlah aw. Ka parih thinhennak ah hmang hram hlah awla a ruah khal ruat nawn hram hlah aw.
20 Bawipa ka sual tiih ka theih ruangah sokhaw, saklam miphun hmuahhmuah sungah hmaisabik ih a rung lo tongtu ka sinak cu!” tiah a ti.
David In Shimei A Zangfah
21 Cutikah Zeruiah ih fapa Abishai in, “ Bawipa Pathian in siangpahrang ih a hril zomi a cam ruangah Shimei cu thah tengteng ding a si,” tiah a hun ti.
22 Asinan David in Abishai le a u Joab hnenah, “Zo inso nan ruahnak a lo sut? Ka hrangih hnaihnawhnak petu ah nan cang tum maw si? Atu ah Israel siangpahrang cu keimah ka si ih tuih sun ah Israel mi pakhat hman thah an si lo pei,” tiah a ti.
23 Cun Shimei hnenah, “Zohman in an lo that hrimhrim lo ding,” tiah siatserh in thu a kam.
David In Mefibosheth A Zangfah
24 Cun Saul ih fapa sin Mefibosheth khal siangpahrang tong dingah a feh ve. Jerusalem ihsin siangpahrang a tlan ih nehtu bangin a ra kirsal hlan lo, Mefibosheth in a ke a kholh lo, a khahmul a met lo ih a hnipuan khal a sawp lo.Ref 19:24 2 Sam 9:1-13; 16:1-4;
25 Mefibosheth cu Jerusalem ihsin a feh ih siangpahrang hnenih a thlen tikah siangpahrang cun, “Mefibosheth, Jerusalem ihsin ka suah tikah zianghrangah na feh ve lo?” tiah a sut.
26 Mefibosheth in, “Maw siangpahrang bawipa, nangmah ih i theih vekin kei cu ka ke a zeng. Na hnenih feh ve dingah ka laak i dam sak aw, tiah ka hnenumpa ka fial nain i rak bum a si.
27 Cuih tlunah na hnenah i rak zuarthlai fawn. Sikhalsehla nang cu Pathian ih vancungmi bangtuk na si ih a dik na timi cu tuah ko aw.
28 Thungai ih kan tile ka pa ih sungkhat pawl hmuahhmuah cu nangmah siangpahrang bawipa ih thah thluh tlak kan si, asinain na cabuai ih rawl ei thei dingah i rak tuah. Curuangah siangpahrang bawipa, na hnen ihsin zangfahnak khal dil ngam ding ka si nawn lo,” tiah a ti.
29 Cutikah siangpahrang in, “Na sim ding zianghman a um nawn lo. Saul ih leiram le thilri hmuahhmuah cu Ziba thawn nan òhen aw pei, tiah ka ruat cat zo a si,” a ti.
30 Mefibosheth in, “Bawipa, a zate in amah in nei thluh seh. Ka bawipa nangmah nungdamte ih na kir thei hi ka hrangah a tawk tuk zo,” tiah a ti.
David In Barzillai A Zangfah
31 Jordan tiva khatlam ralih siangpahrang hei thlah ve dingah Gilead mi Barzillai khal Rogelim ihsin a rung ve.Ref 19:31 2 Sam 17:27-29;
32 Barzillai cu a tar zet thlang; kum sawmriat a si. Milian zet a si ih Mahanaim ih siangpahrang a um lai ah a rak cawmtu amah a si.
33 Siangpahrang in a hnenah, “Jerusalem ah i rak thlun awla ka lo kilkhawi ding,” a ti.
34 Asinan Barzillai in, “Reipi ka nung nawn lo ding. Ziangahso Jerusalem ahcun ka lo thlun rero ding?
35 Kum sawmriat ka ti zo ih nun khal hi ka hrangah man a nei nawn lem lo. Ka ei ka in mi khal hi a thawtnak ka thei nawn lo ih nunau siseh, mipa siseh, hlamawi an sakmi tla ka thei nawn lo. Siangpahrang bawipa, nangmah ka lo zonzaihter lak men ding.
36 Cuti lawmmam ih na zangfahnak co dingah ka tlak hrimhrim lo. Curuangah Jordan tiva ral malte tiang lawng ka lo thlahta pei.
37 Cule i kirter awla kan khua ih ka nu le ka pa ih thlan kiangah ka nunnak cu cem ve men seh. Cun hinah ka fapa Khimham a um; siangpahrang bawipa, na hnenah fehpi awla a òha na tinak vekin run zoh aw,” tiah a ti.
38 Cutikah siangpahrang bawipa in, “Khimham cu ka fehpi pei ih na duhnak vekin ka zoh ding. Cun i dilmi pohpoh cu ka lo tuah sak thluh ding,” tiah a ti.
39 Cule David le a milai pawl hmuahhmuah cu Jordan tiva an hei tan. David in Barzillai cu a hnam ih thluasuah a pek. Cuih hnuah Barzillai cu a inn ah a tlung.
Judah Le Israel Thu An El Aw
40 Judah mi hmuahhmuah le Israel mi a hrek pawl in siangpahrang cu an kil ih Jordan tiva cu a tan hnuah Gilgal ah a feh. Cule Khimham khalin a thlun.
41 Cutikah Israel mi hmuahhmuah cu siangpahrang hnenah an feh ih, “Siangpahrang bawipa, na minung pawl siseh, na innsang le nangmah siseh, ziangruangah so kan unau Judah mi pawl in anmah ih tabul vekin an lo ham ih Jordan tiva ral tiang an lo kil ringring?” tiah an ti.
42 Judah mi pawl in, “Ziangahso kan tuah lo ding? Siangpahrang bawipa cu kan phunpi a sisi. Ziangahso cuih ruangih nan thin a heng? Amah in rawl in dar ah maw nan ruat? Laksawng in òhen ah maw nan zum?” tiah an sawn.
43 Cule Israel mi pawl in, “Amah thawn phunkhat nan si khalle siangpahrang David hi nanmah hnakin ham theinak let hra in kan nei a si. Ziangahso in hmuhsuam? Thungai ih kan tile, siangpahrang kirtersal dingih a tawlrel hmaisatu cu kanmah kan si!” tiah an ti.
Asinan Israel mi pawl ih òongkam hnakin Judah mi pawl ih òongkam cu a hrang deuh ngaingai.