18
Absalom An Neh Ih An That
1 Siangpahrang David in a ralkap pawl cu a khawm ih a thawng le a za in a òhen ih anmah hotu bawi a ret vivo.
2 Cule raldo dingah bur thum in a fehter ih bur khatnak cu Joab in a ho; bur hnihnak cu Joab ih nau Abishai in a ho ih bur thumnak cu Git khuami Ittai in a ho. Siangpahrang bawipa in, “Keimah khal ka feh ve ding,” tiah a ti.
3 Cutikah annih in, “Kan hnenah feh ve hlah aw. Kanmah pawl kan tlan thluh, asilole a hrek in that thluh a si hmanah kan ralkap pawl hrangah cun zianghman a dang cuang lo ding. Nangmah pakhat cu kannih pawl thawnghra tluk na si. Hi khua ah na um pei ih bawmtu in kuat thei le a òha sawn ding,” tiah an ti.
4 “A òha bik nan timi cu ka tuah ding,” tiah siangpahrang bawipa in a ti. Cule kotka kiangah a ding ih a ralkap pawl a thawng le a za in an feh cu a zoh.
5 Ralkap pawl hotu Joab, Abishai le Ittai hnenah, “Keimah zawnruat in Absalom cu tuahmawh hram hlah uh,” a ti. Ralkap hotu pawl hnenih David ih thupekmi cu ralkap hmuahhmuah in an thei thluh.
6 David ih ralkap pawl cu Israel ralkap pawl do dingah an feh ih Efraim Tupi sungah an do aw ciamco.
7 Israel ralkap pawl cu David ih ralkap pawl in nasa zet in an neh hai ih a cuih ni ah ralkap thawngkul an thi.
8 Hmunkip le ramkip ah an do aw ih hriamnam ih a thimi hnakin tupi sungih a hloral mi an tam sawn.
9 Cule ruahlopi in David ralkap pawl le Absalom an tong aw. Absalom cu laak a to ih a laak cu sasuapi kung hnuai in a tlan ih thingòek in Absalom cu a lu in a rak awk. A laak cu a tlan suak ih Absalom cu a ke leilung dai lo in a thlai aw.
10 David ih ralkap pakhat in Absalom cu a hmuh tikah, “Bawipa, sasua kung parah Absalom a thlai aw ka hmu,” tiah Joab a va sim.
11 Cutikah Joab in, “Absalom e! Thungai maw? Ziangahso cutawkah cun na thah lo? That cila keimah hrimhrim in ngun tangka fanghra le taikhap pakhat cu ka lo pe ding nain,” tiah a ti.
12 Sikhalsehla cupa cun, “Tangka thawngkhat i pek khalle siangpahrang ih fapa cu ka kutzung hman in ka dai lo ding. Siangpahrang bawipa in, “Keimah zawnruat in Absalom cu nan tuahmawh hram lo pei,” tiah nangmah le Abishai le Ittai hnenih thu a lo pek cu ka thei thluh a si.
13 Cun a cuih thu thlun lo in Absalom cu that ningna siangpahrang in a thei leh thotho dingih cutikah nang in i òan ngam ding ka zum lo,” tiah a ti.
14 Cutikah Joab in, “Nang thawn biak awk cu tikcu cem men a si,” a ti ih feipi pathum lak tahrat in sasuapi kungih a nungin a thlai aw mi Absalom ih thinhna ah a sun.
15 Cule Joab ih ralkap pahra in Absalom cu an vun kulh ih an that.
16 Cutikah an raldo bang dingah Joab in tawtawrawt a tumter ih a ralkap pawl cu Israel pawl an dawinak ihsin an rakir òheh.
17 Absalom ruak cu an lak ih tupi sungih khur thukpi pakhat sungah an hlon ih a parah lungto vun liailiai in an peng. Israel ralkap pawl cu an tlan ih an inn ciar ah an tlung.
18 Absalom cu a hmin sawngtu dingih fapa a neih lo ruangah a nunlai ah Siangpahrang Phairawn timi ah lungdawl pakhat a dawl. A cuih lungdawl cu amah ih hmin suangin hmin a sak ih atu tiangin Absalom Lungdawl tiah an tita.
Absalom Thih Thu David An Sim
19 Cule Zadok ih fapa Ahimaaz in, “ Bawipa Pathian in siangpahrang bawipa cu a ral kut ihsin a hum ruangah ka va tlan pei ih a cuih Thuthang Òha cu ka va sim pei,” tiah Joab hnenah a ti.
20 Joab in, “A si lo, tuih sun ahcun ziang thuthang hman na sim lo pei. Na than duh asile ni dang ah na than leh pei; ziangahtile siangpahrang ih fapa a thih ruangah tuih sun ahcun na sim lo pei,” a ti.
21 Cule Ethiopia mi sal pakhat pa ih hnenah, “Feh awla na hmuh mi hi siangpahrang va sim aw,” tiah Joab in a fial. Joab ih hmaiah upatnak pek in a kun ih zamrang in a tlan.
22 Cutikah Ahimaaz in, “Ziangtiih a va can khalle hih thu cu ka va sim thotho ding,” tiah a ti.
Joab in, “Ziangahso a cuih thuthan cu na duh? A cuih thu na than ruangah zianghman laksawng na ngah cuang lo ding,” a ti.
23 “Ziang a si khalle ka feh thotho ding,” tiah Ahimaaz in a ti.
Cutikah Joab in, “Cuti asile feh aw,” a ti ih Ahimaaz cu a feh. Ahimaaz cu Jordan Phairawn zin in a tlan ih Joab ih a thlahmi Ethiopia mi salpa cu a lan.
24 David cu khuapi kotka pahnih karlak ah a rak to. Ralvengtu pa cu khuapi an kulhnak hruang parah a kai ih kotka tlun zawn ah a ding. Khua a cuan ih mi pakhat a ra tlan rero kha a hmu.
25 Siangpahrang cu a ko ih a vun sim. Siangpahrang in, “Amah pakhat lawng asile thuòha a rak keng a si ding,” a ti. Thu phurtu pa cu a ra nai deuhdeuh.
26 Cule ralvengtu pa in midang pakhat a ra tlan rero kha a hmu lala. Kotka kiltu pa a vun ko ih, “Zoh hnik, midang pakhat a ra tlan rero,” tiah a vun sim.
Cutikah siangpahrang bawipa in, “Anih khal thuòha a rak keng a si cu!” a ti.
27 Ralvengtu pa in, “A hmaisa pa ih tlan zia ka zoh tikah Ahimaaz a bang,” tiah a ti. Siangpahrang in, “Ahimaaz cu miòha a si ih thuòha a rak keng a si cu,” a ti.
28 Ahimaaz in siangpahrang hnenah, “Thu òha a si,” tiah a auh. Cule a hmaiah a bok ih, “Siangpahrang bawipa, nangmah a lo dodaltu hmuahhmuah tlunih nehnak a lo petu Bawipa na Pathian cu thangòhat si ko seh,” a ti.
29 Siangpahrang in, “Absalom a dam maw?” tiah a sut.
Cutikah Ahimaaz in, “Bawipa, na ralbawi Joab in i thlah tikah thu a hnok tuk ih ziang a cang ti ngaingai cu ka thei lo,” tiah a ti.
30 “Khinah va ding hrih aw,” tiah siangpahrang in a ti ih Ahimaaz cu hlat nawn ah a va ding.
31 Cule Ethiopia mi pa cu a ra thleng ve ih siangpahrang cu, “Maw siangpahrang bawipa, thuòha ka rak keng a si. A lo dodaltu pawl ih tlunah Bawipa Pathian in tuih sun ah nehnak a lo pek a si,” tiah a ti.
32 “Absalom a dam maw?” tiah siangpahrang in a sut.
Cutikah Sudan mi pa cun, “Maw bawipa, Absalom bangtukin na ral pawl le a lo dodaltu hmuahhmuah cu si hram hai seh,” tiah a ti.
33 Cutikah siangpahrang David cu a riah a sia ngaingai ih kotka tlunih thlam sungah a hung kai ih a kai phah ah, “Maw ka fapa Absalom, Absalom ka fapa! Nangmah ih ai ah keimah sawn hi rak thih tak ding ee, Ka fapa! Maw Absalom, ka fapa,” tiah a òap.