17
Ahithofel Le Hushai In Absalom Ruahnak An Pek
1 Cun Ahithofel in Absalom hnenah, “Ralkap thawng hleihnih ka hril pei ih tuih zan tengteng ah David cu ka dawi ding.
2 A baang zet laifangah le a thin a nauzet laifangah ka do pei. A thin a phang dingih a milai pawl cu an tlan thluh ko ding. Culaitak ah siangpahrang amah lawng ka that ding.
3 Cule mothar a pasal hnenih a kir bangin a milai hmuahhmuah cu na hnenah ka run kirpi thluh ding. Thah na duhmi cu minung pakhat lawng a sisi. Midang pawl cu an him thluh ko ding,” tiah a ti.
4 Cumi an theih tikah ruahnak òha zet a si, tiah Absalom le Israel hruaitu pawl in an ruat.
5 Cule Absalom in, “Hushai ko hnik uh, anih simmi kan ngai ve pei,” a ti.
6 Hushai cu a ra ih Absalom in Ahithofel ih simmi hmuahhmuah cu Hushai hnenih a sim òheh hnuah, “Ahithofel ih ruahnak hi kan thlun pei maw? Nang na ruahnak ziangtinso a si?” tiah a sut.
7 Cule Hushai in, “Tuih òum Ahithofel ih ruahnak a lo pekmi cu a òha lo a si.
8 Na pa David le a ralkap pawl cu raldo òhang cia an si ih tupi sungih a faate an lonmi savom vekin òihnung ngaingai an si, ti cu nangmah in na thei thluh ko. Na pa cu raldo òhang cia a si ruangah zan ahcun a ralkap pawl hnenah a riak lo.
9 Atu fangah cun lungpuk sungah maw, hmundang ah maw a relh ding. Cule David in na minung pawl a nam dingih cu ve tein cuih thu a theitu hmuahhmuah in, “Absalom ih ralkap pawl cu an cem zo ee!” tiah an au ciamco men sawn ding.
10 Cutikah cun kiosa vekih òih nei lo ral òha bik pa hman a thin a khur ko ding; ziangahtile Israel ram sungah cun zokhal in na pa cu raldo thiam zet a si, ti an thei òheh ih a ralkap pawl khal raldo cak zet an si, ti kha an thei òheh a si.
11 Kei ih ruahnak cu hitiin a si: Israel ram khatlam zim Dan ihsin khatlam zim Beersheba tiang Israel mi hmuahhmuah tifinriat kiangih vunnel zat a simi cu kokhawm hai awla nangmah rori in raldonak ahcun ho aw.
12 Khuitawkih a um khalle David cu kan hawlsuak dingih a theih man hlanah zan daitla bangin kan nam ding. Amah siseh, a milai pawl siseh, pakhat hman an luat lo ding.
13 Khua pakhatkhat sungih a luh khalle kan milai Israel pawl in hridai an keng pei ih, a cuih a relhnak khua cu lungto pakhat hman tang nawn lo tiangin horkuam ah kan dirsiat thluh ding,” tiah a ti.
14 Cutikah Absalom le Israel mi pawl in, “Hushai ih ruahnak cu Ahithofel ih ruahnak hnakin a òha sawn,” tiah an ti. Absalom parih siatnak thleng dingah Ahithofel ih ruahnak òha cu Bawipa in a phelhsolh a si.
David A Luat
15 Cule Absalom le Israel hruaitu pawl hnenih a ruahnak a simmi le Ahithofel ih ruahnak pekmi pawl hmuahhmuah cu Hushai in puithiam Zadok le puithiam Abiathar hnenah a sim thluh.
16 Cule Hushai in, “Atu zamrang uh! David hnenah thu hei cah uhla hramlak ih tiva tannak hmunah cun zankhat hman rak riak nawn hlah seh. Amah siseh, a milai pawl siseh, kaih le thah an tuar lonak dingah zamrang tein Jordan tiva tan in rak tlan hai seh,” tiah a ti.
17 Abiathar fapa Jonathan le Zadok fapa Ahimaaz cu khuasung ah lut ngam lo in Enrogel ihsin an hngak ringring. Hnenum fala pakhat in khuasung ih thil a cangmi le thuhla cu a va sim òheu ih cuih hnuah annih in siangpahrang David an va sim sin òheu.
18 Asinan veikhat cu nauhakpa pakhat in a hmu hai ih cupa cun Absalom a va sim. Cutikah Jonathan le Ahimaaz cu an tlan ih Bahurim khua ih pakhat pa ih inn ah an va thleng. Cupa cun a inn kiangah khur pakhat a nei ih a cuih khur sungah cun an lut.
19 Cule cupa ih nupi in khur cu a khuh òheh hnuah zohman ih theih lo dingin a cuih khur parah fang a pho.
20 Absalom ih milai pawl an ra ih cunu cu, “Khuiahso Ahimaaz le Jonathan an um?” tiah an sut.
Anih in, “Tiva an hei tan zo,” tiah a ti.
An hawl nain an hmuh lo ruangah Jerusalem ah an kirsal.
21 An feh hnuah Ahimaaz le Jonathan cu khur sung ihsin an suak ih David hnenah an feh ih thu hmuahhmuah an va sim. Ahithofel ih a phiarnak thu cu an sim ih David cu, “Zamrang tein pok awla tiva khatlam ralah feh aw,” tiah an ti.
22 Curuangah David le a milai pawl cu Jordan tiva an tan ih khawfing a cah tikah khatlam ralah an suak thluh.
23 A ruahnak pekmi an thlun lo kha Ahithofel in a hmuh tikah laak a to ih a khua ah a tlung. A innsang hnenih ro a cah hnuah amah le amah a awk that aw. Cuticun Ahithofel cu a thi ih a pa ih thlan ah an phum.
24 Absalom le a ralkap pawl cu Jordan tiva an tan ih khatlam ral an thlen tikah David cu Mahanaim khua a rak thleng zo.
25 (Absalom in Joab ih ai ah Amasa cu a ralkap pawl hotu ah a ret. Amasa cu Ishmael mi Jether ih fapa a si; a nu cu Nahash ih fanu Abigail a si ih Joab ih nu Zeruiah ih unau a si.)
26 Cule Absalom le a minung pawl cu Gilead ah an riak.
27 David cu Mahanaim khua a thlen tikah Ammon ram Rabbah khua ih ummi, Nahash ih fapa Shobi le Lodebar khuami Ammiel ih fapa Makhir le Gilead ram Rogelim khuami Barzillai pawl in an rak hmuak.
28 Kheng le tlak beel le ihphah le puan tla an rak keng. Cun David le a ralkap pawl ih hrangah sangvut sang, barli sang, vaiphawt, vaikan, be, mawòol,
29 khuaitizu, thawphat, cawhnawi-ha, tuu sa le cawsa pawl an rak keng ih ei dingah an pek. Hramlakah David le a ralkap pawl cu an bang dingih an rilrawng in an ti a haal zet ding, ti an thei.