9
Saul In Samuel A Tong
Benjamin ram ah Kish an timi pa pakhat a um. Amah cu Abiel ih fapa a si. Abiel cu Zeror ih fapa a si. Zeror cu Bekorath ih fapa a si. Bekorath cu Afiah ih fapa a si ih Afiah cu Benjamin phun a si. Kish cu milian le mi ih upat mi a si. Kish in Saul timi fapa a nei. Saul cu a sanòhat laifang a si ih a piang zet fawn. Israel mi pawl hmuahhmuah lakah a piang bik a si ih midang hnakin pi khat a sang fawn.
A pa Kish ih laak hrekkhat pawl cu an vakhlo ih curuangah a pa in, “Kan hnenum pakhat hruai awla kan laak pawl va hawl uh,” tiah Saul cu a fial. Curuangah Efraim tlangpar ram le Shalishah ram ah an feh ih an hawl nain an hmu lo. Shaalim peng sungah a ram pumpi in an hawl nain laak cu an um lo. Cuih hnuah Benjamin ram sungah an hawl ih an hmu cuang lo. Zuf peng sung an thlen tikah Saul in, “Kan tlung thlang pei. Ziangahtile laak thu ruat lo in ka pa in kanmah riangri tla in helhkamter pang ding,” tiah a hnenumpa hnenah a ti.
Cutikah a hnenumpa in, “Um hrihhnik; hih khua ahhin Pathian ih minung pakhat a um ih mi in an upat zetmi a si; ziangahtile a simmi hmuahhmuah a dik òheu. A hnenah kan va feh pei ih kan laak pawl umnak tla in sim thei men ding,” tiah a ti.
“Kan va feh asile ziangso kan pek ding? Kan zaal sungah rawl a um nawn lo, zianghman pek ding kan neih ual lo,” tiah Saul in a ti.
A hnenumpa in, “Ngun tangka fangkhat ka pai ih cumi ka pek pei. Kan laak pawl an umnak in sim ding,” tiah a ti.
Culai ahcun mi pakhat in Pathian hnenih sut duhmi a neih tikah, “Hmutu hnenah kan feh pei,” tiah a ti òheu. Ziangahtile cuih san ahcun profet cu hmutu tiah an rak ko. 10 Cutikah Saul in, “Na ruahnak a òha a si. Kan feh pei,” a ti ih Pathian ih minung pa umnak khua ahcun an feh. 11 An khuataw so an soh rero laifangah tidai khai dingih a rami fala pawl an tong. “Nan khuasung ih hmutu a um maw?” tiah fala pawl cu an sut.
12 Fala pawl cun, “A um sokhaw! Nan hlan deuh teah a ra thleng. Zamrang uhla nan hei man ding. Khuasung mi pawl in tuih sun tlang parih biakòheng ah khawrai thawinak an pek ding. 13 Khuasung nan luh ve tein tlang parih rawl ei ding a feh hlanah nan tong ko ding. Tlang parih amah a thlen lo ahcun misenpi pawl rawl an ei lo ding; ziangahtile khawrai thawinak cu amah in thla a cam hmaisa dingih cuih hnu lawngah senpi cu rawl an ei ding. Atu ah feh uhla hmakhat teah nan tong ko ding,” tiah an ti.
14 Cuticun an feh ih khuasung an luh zawng ah Samuel cu biaknak hmun ih feh dingin a ra suah kha an hmu.
15 Saul a thlen ni ih a mizan sun ah Bawipa in Samuel hnenah, 16 “Thaisun atu tikcu ah Benjamin phun ihsin mipa pakhat na hnenah ka rak thlah ding. Ka minung Israel pawl uktu ah amah cu hriakculh awla Filistin pawl ih kut ihsin a humhim hai ding. Ka minung pawl ih tuarnak le zonzaihnak ka hmu zo ih bomnak dilih an aihramnak ka thei zo a si,” tiah a ti.
17 Samuel in Saul cu a hmuh tikah, Bawipa in Samuel hnenah, “Ka lo timi cu hi pa hi a si. Ka minung pawl amah in a uk ding,” tiah a ti. 18 Cule Saul cu Samuel hnenah kotka kiangah a va feh ih, “Khuiahso hmutu pa ih inn a um, i sim hram aw,” tiah a va ti.
19 Cutikah Samuel cun, “Keimah hi hmutu cu ka si. Biaknak hmunah ka hmaiah feh aw. Tuih sun ah nan pahnih in ka hnenah rawl nan ei ding. Thaizing ah nan thusuh duhmi hmuahhmuah ka lo let pei ih cuih hnuah nan fehnak dingah ka lo thlah leh ding. 20 An hlohnak ni thum a si zomi nan laak pawl cu helhkam duh hlah uh, ziangahtile an hmu zo. Sikhalsehla Israel mi pawl ih an òul zetmi cu zoso a si? Nangmah na si! Nangmah le na pa ih hrin pawl nan si,” tiah a ti.
21 Saul in, “Kei cu Benjamin phun ka si; Israel miphun lakah phun fate bikmi ka si. Cun kan phunkhat sungah kannih sung cu santlai lo bik sung kan si fawn. Curuangah ziangtinso hitiin ka hnenah na òong?” tiah a ti.
22 Cutikah Samuel in Saul le a hnenumpa cu rawl einak khaan tumpi sungah a hruai ih, an sawmmi minung sawmthum tluk an tonak cabuaipi ih lu lamah a toter. 23 Cule Samuel in rawl suang pa ih hnenah, “A dangte ih ka lo rettermi sa kha rak keng aw,” tiah a ti. 24 Cule rawl suang pa cun sacawn le a kopmi thau pawl a hun suah ih Saul ih hmai ahcun a ret. Samuel in, “Himi cu nangmah hrangih retmi a si. Ei aw, ka sawmmi pawl thawn ei tlang dingah na hrangih retmi a si,” tiah a ti. Cuticun cuih ni ah Saul cu Samuel hnenah rawl a ei. 25 Biaknak hmun ihsin khuasung ih an vung kirsal tikah inn diphun parah Saul ih ihnak an tuah ih, cutawkah Saul cu a it. 26 Zingpit ah an tho ih Samuel in Saul cu a hun ko ih, “Tho awla na fehnak ding zinah ka lo thlah ding,” a ti. Saul cu a tho ih Samuel thawn hmunkhat ah an feh. 27 Khawhnar an thlen tikah Samuel in, “Na hnenumpa hi hmaiah rak fehter aw,” tiah Saul cu a ti. Hnenumpa cu hmaiah a rak feh. Cutikah Samuel in, “Malte in tangta hrih awla Pathian ih òongmi ka lo sim ding,” tiah a ti.