6
Thukam Kuang An Kuatsal
1 Bawipa ih Thukam Kuang cu Filistin ram ah thla sarih a um hnuah,
2 Filistin mi hotu pawl in an puithiam le pol pawl an ko ih, “ Bawipa ih Thukam Kuang hi ziangtinso kan tuah ding? A umnak hmunih kan kuatsal asile ziangthawn so kan kuat ding?” tiah an sut.
3 “Israel mi Pathian ih Thukam Kuang cu nan kuatsal asile nan mawhnak ngaidamnak dingah Pathian hnenah laksawng nan pek pei ih cumi thawn nan kuat pei. Laksawng tel lo in Thukam Kuang cu nan kuat lo pei. Laksawng thawn nan kuat kirsal asile nan dam dingih Pathian in ziangahso in rak hrem ti cu nan thei ding,” tiah an ti.
4 “Ziang laksawng so kan pek ding?” tiah an sut. Cutikah annih in, “Sui ih tuahmi khuaihli hma zuk panga le zinghnam zuk panga, Filistin lal pakhat hrangah zuk pakhat ciar in nan pek pei. Ziangahtile hremnak cu nan zate le Filistin lal panga in nan tuar a si.
5 Nan khua le nan ram a siatsuahtu khuaihli hma zuk le zinghnam zuk pawl cu nan tuah pei ih Israel mi pawl ih Pathian hnenah nan sualnak nan phuang pei. Cutiih nan tuah asile nanmah, nan khawzing le nan ram ih hremnak nan tuarnak ihsin a lo luatter men ding.
6 Ziangahso Faro le Izipt mi bangin mi lungruh nan si duh rero? Izipt ram ihsin Israel mi pawl an suahter hlan lo Izipt mi pawl tla cu Pathian in a duhduh in a puahcok rero hai ti nan hngilh lo pei.
7 Curuangah cawleng a thar pakhat le leng a hnuk dah lomi cawpi pahnih in ngaihtuah uh. Cuih caw cu lengah barh uhla an faate pawl kha caw inn ah khum uh.
8 Bawipa ih Thukam Kuang kha la uhla cawleng parah ret uh. Cule nan mawhnak ngaidamnak dingah Pathian hnenih nan pekmi sui zuk pawl cu thingkuang dangin a cuih Thukam Kuang kiangah ret uh.
Cun cawleng cu amah tein mawngtu lo in feh seh.
9 Cule a feh cu zoh uh. Beth Shemesh khua lamih a feh a si ahcun kan parih siatsuahnak a thlentertu cu Israel mi pawl ih Pathian a si, ti a lang ding. Asinan Beth Shemesh khua lamih a feh lo a si ahcun natnak petu cu Israel mi pawl ih Pathian a si lo; kan vansiat ruangah a si men, ti kan thei ding,” tiah an ti.
10 Puithiam le pol pawl ih sim vekin an tuah thluh. Cawpi pahnih cu an hruai ih cawleng ah an barh ih caw faate pawl cu caw inn ah an khum.
11 Pathian Thukam Kuang cu an lak ih, sui ih tuahmi khuaihli hma zuk le zinghnam zuk pawl an retnak thingkuang thawn cawleng sungah cun an ret.
12 Cutikah caw pawl cu an feh ih khuilam hmanah pial lo tein Beth Shemesh khua lamah ding tein an feh vivo. An feh phah ah an paw rero. Filistin mi ih lal panga in Beth Shemesh khua ramri tiang an hei thlun.
13 Beth Shemesh khuami pawl cu phairawn ah sangvut an at lai rero. Khua an hun cuan ih Thukam Kuang an hmuh tikah an lung a awi ngaingai.
14 Beth Shemesh khuami Joshua ih lo sungah cawleng cu a ra thleng ih lungto tumpi kiangah a cawl. Cuih khuami pawl cun zanthing ih tuahmi leng cu an satbal ih caw pahnih cu an that ih Bawipa ih hnenah mei-ur thawinak ah an pek.
15 Levi mi pawl in Bawipa ih Thukam Kuang le sui ih tuahmi zuk pawl retnak kuang cu an cawi ih lungto tumpi parah cun an ret. A cuih ni ah Beth Shemesh khuami pawl in mei-ur thawinak le thawinak dangdang tla Bawipa ih hnenah an pek.
16 Filistin mi lal panga cun Beth Shemesh khuami pawl ih thiltuah mi cu an zoh òheh hnu a cuih ni thotho ah Ekron ah an kirsal.
17 Filistin mi pawl in an khuapi panga: Ashdod, Gaza, Ashkelon, Gath le Ekron hrangah, khuakhat ah pakhat ciar in, sui in tuahmi khuaihli hma zuk panga cu Bawipa ih hnenah an mawhnak ngaidamnak dingah an pek.
18 Cuih tlunah Filistin mi lal panga ih ukmi kulhmi khuapi siseh, kulh lomi khuate siseh, lal pakhat ukmi khua pawl cu sui ih tuahmi zinghnam zuk pakhat ciar an pek fawn. Bawipa ih Thukam Kuang an retnak, Beth Shemesh khuami Joshua lo sungih a ummi lungto tumpi cu cutawkih a cangmi thutheihpitu ah atu tiangin a um lai a si.
19 Beth Shemesh khuami pawl in Thukam Kuang sung an bih ruangah Bawipa in mi hrekkhat cu a that. Minung sawm sarih an thi a si. Cutiih mi tampi Bawipa in a thihter ruangah cuih khuami pawl cu an riah a sia ngaingai.
Kiriath Jearim Khua Ah Thukam Kuang
20 Curuangah Beth Shemesh khuami pawl in, “Hi Bawipa, a thianghlim mi Pathian ih hmaiah zoso a ding thei ding? Kan hnenih a um nawn lonak dingah khuitawkah so kan kuat ding?” tiah an ti.
21 Cule Kiriath Jearim khuapi ah mi an thlah ih, “Filistin mi pawl in Bawipa ih Thukam Kuang cu an rak khirh. Rung lak hram uh,” tiah thu an cah.