4
Thukamnak Thingkuang An Long
1 A cuih caan ah Filistin mi pawl do dingah Israel mi pawl cu an pok. Israel ralkap pawl cu Ebenezer ah an riak ih Filistin ralkap pawl cu Afek ah an riak.
2 An tim awk thluh hnuah Filistin pawl in Israel pawl cu an do ih nasa zet ih an do awk hnuah Israel mi cu an neh ih minung thawngli tluk an that.
3 A luatmi ralkap pawl cu an riahnak hmun an thlen tikah Israel mi hruaitu pawl in, “Ziangahso Filistin pawl ih in neh dingah Pathian in a tuah? Pathian kan hnenih a feh venak dingah le kan ral pawl ih kutsung ihsin kan luatnak dingah kan feh pei ih Shiloh ihsin Bawipa ih Thukam Kuang cu kan lak pei,” tiah an ti.
4 Curuangah Shiloh ah mi an thlah ih cherub timi thlanei ramsa lem pahnih karlak ah tohkham parih a totu Ziangkimtithei Bawipa ih Thukam Kuang cu an va lak. Cunah cun Eli ih fapa pahnih Hofni le Finehas khal an tel ve.Ref 4:4 Suah 25:22;
5 Thukam Kuang an thlenpi tikah Israel mi pawl cu an au ciamco ih an au tuk ruangah leilung tiangin a hnin òheh.
6 Cutiih an au cu Filistin mi pawl in an theih tikah, “Hebru mi pawl an riahnak ih an au ciamco cu ngai hnik uh! Ziangso an duhnak a si?” tiah an ti aw. Cule Bawipa ih Thukam Kuang Hebru mi pawl ih riahnak ah a thleng zo a si, ti an theih tikah,
7 an thin a phang ih, “An riahnak ah khawzing pakhat a ra thleng zo. Curuangah kannih cu kan cem a si. Hibangtuk thil cu kan thei dah keel lo.
8 Hibangtuk ih huham a neimi khawzing pawl ih kutsung ihsin zoso in runsuak thei ding? Nelrawn ih Izipt mi pawl a that thluhtu cu hi khawzing pawl hi an si.
9 Curuangah Filistin mi pawl, nan ral òha uh! Pacang bangin do uh. Culole kan sal an si vekin anmah Hebru pawl ih sal ah kan cang tengteng ding. Curuangah pacang vekin do uh!” tiah Filistin mi pawl an au ciamco ve.
10 Cule Filistin mi pawl cun ralòha zet in an do. Israel mi pawl cu an sung ih an inn lamah an tlan thluh. Mi tampi an thi: Israel ralkap thawng sawmthum an thi a si.
11 Bawipa ih Thukam Kuang khal Filistin mi pawl in an long ih Eli ih fapa Hofni le Finehas khal an that.
Eli Thihnak
12 Ral an doawknak hmun ihsin Benjamin hrin mi pakhat cu Shiloh lamah a tlan ih cuih ni ah a va thleng. A riahsiatnak langnak ah a hnipuan a thlek ih a lu ah leivut a phulh aw.
13 Eli cu lamzin kiangah tohkham parah khawruahhar zet in a to. Pathian Thukam Kuang thu a ruah tikah a helhkam ngaingai. Culai ah raltlan pa cun khuasung ah thu a rung than ih khuasung mi pawl cu lung phang in an òap ciamco.
14 Cuih thawmvang cu Eli in a theih tikah, “Ziang thawmvang so a si?” tiah a sut. Ral tlan pa cu zamrang in Eli hnenah thuthang sim dingin a va tlan.
15 Eli cu kum sawmkua le kum riat a si zo ih khua a hmu nawn lo.
16 Cutikah ral tlan pa cun, “Raldonak hmun ihsin ka luat ih tuih sun ah hitawk tiang ka ra tlan a si,” tiah a ti.
Cutikah Eli in, “Ziang a cang, ka fapa?” tiah a sut.
17 Cupa cun, “Filistin mi pawl in, in neh ih Israel mi pawl cu an tlan òheh. Kan sung thla rori a si. Cuih tlunah na fapa pahnih Hofni le Finehas khal an thi; Pathian Thukam Kuang khal in long a si,” tiah a sim.
18 Cutiih Thukam Kuang thu a vun sim ve tein Eli cu kotka kiangih a tohkham ihsin dunglam ah a ril. A tar tuk zo ih tlunah a khiing khal a rit tuk ruangah a rilhnak ah a hngawng a kiak ih a thi. Eli cu Israel mi pawl hotu kum sawmli sung a òuan a si.
Finehas Ih Nupi A Thi
19 Eli ih fapa Finehas ih nupi cu fa a vun ih, a nithla a kim zik thlang. Cule Pathian Thukam Kuang cu Filistin mi pawl in an long ih a pasal ih pa Eli le a pasal Finehas tla an thi ti a theih tikah ruah lopi in a pum a na ih fa a hring.
20 Amah cu nauhrin natnak ihsin a thihzik zawng ah a tuamhlawmtu nunaunu in, “Na thinphang hlah aw; fapa na hring a si,” tiah a ti. Asinan Finehas ih nupi cun zianghman a sawn lo; zianghman ti theimi a nei nawn lo.
21 A fapa cu Ikhabod tiah hmin a sak, a tican cu, “Pathian ih sunlawinak in Israel a tlansan a si,” tinak a si. A sim duhmi cu Pathian ih Thukam Kuang an lonnak le a rang Eli le a pasal Finehas an thihnak thu a si.
22 “Pathian ih Thukam Kuang an lon ruangah Pathian ih sunlawinak in Israel cu a tlansan zo a si,” tiah a ti.