29
Filistin Mi In David An Hnong
Filistin mi pawl in an ralkap pawl cu Afek ah an khawm ih, Israel mi pawl cu Jezreel Phairawn ih cerhti kiangah an riak. Filistin lal panga pawl cu an ralkap zakhat rual le thawngkhat rual pawl thawn hmailam ah an feh zutzo ih David le a ralkap pawl cun dunglam ihsin Akhish thawn an thlun. Filistin ralbawi pawl in, “Hi Hebru mi pawl hi hitawkah ziangso an tuah ve?” tiah an sut.
Cutikah Akhish in, “Hi pa hi Israel siangpahrang Saul ih ralbawi David a si. Ka hnenih a umnak a rei nawn thlang. Ka hnenih a rathlen thokin tuih sun tiangah thilsual a tuahmi zianghman ka hmu lo,” tiah a ti.
Sikhalsehla Filistin ralbawi pawl cu an thin a heng ih Akhish hnenah, “Hi pa cu umnak khua na pekmi ah kirtersal aw. Kan hnen ahcun fehter hrimhrim hlah. Ziangahtile ral kan do tikah kanmah siatsuahtu kanmah ih ral riangri ah a cang pang ding. A bawipa thawn an remawk salnak ding ahcun kan ralkap pawl ih luhlohnak cu amah ih hrangah lamzin òha bik a si! Thungai ti ahcun, nunau pawl ih an laam phah ah:
“Saul cun a thawng a sawm in a that;
David cun a thawng a za in a that,” tiih hla an phuahmi kha amah David hi a sisi!” tiah an ti.Ref 29:5 1 Sam 18:7; 21:11;
Akhish in David cu a ko ih a hnenah, “A nungmi Bawipa ih hmin salin ka lo sim: Ka hrangah rin tlak ngaingai na si ih ka hnenah feh tahrat in ral do ve cila ka duh zet. Ka hnenih na rathlen thok ihsin na mawhnak ka hmu hrih lo. Asinan Filistin lal dang pawl in an lo duh lo. Curuangah dai tein va kir aw; an thinhennak ding zianghman tuah hlah aw,” tiah a ti.
Cutikah David in, “Ziangso ka sual? Na hnen ka thlen ih na hna ka òuan thok ihsin, bawipa, ka mawhnak zianghman na hmu lo. Ziangahso ka bawipa le ka siangpahrang nangmah thawn ka feh lo ding? Ziangahso na ral pawl do lo in ka kir men ding?” tiah a el ciamco.
Akhish in, “David, nang cu Pathian ih vancungmi tluk ih a felmi na si, ti ka thei ko. Sikhalsehla Filistin ralbawi pawl in ral donak ah kan hnenah feh hlah seh, tiah an lo ti zo. 10 Curuangah Saul siangpahrang taan tahrat in ka hnenih a rami hmuahhmuah nan zate in thaizing khua a van ve tein nan kir ding,” tiah a ti.
11 Curuangah David le a milai pawl cu Filistin ram ih kir dingah a thaizing zingpit in an pok. Filistin ralkap pawl cu Jezreel lamah an feh.