22
Puithiam Pawl An That
1 Gath khua ihsin David a tlansal ih Adullam khua kiangih a ummi lungkua ah a thleng. Cutawkah a um ti kha a unau pawl le a sungkhat pawl in an theih tikah a hnenah an va feh.Ref 22:1 Saam 57 le 142 Thulu.
2 Hremnak a tuarmi le leiba a neimi le lungkim lonak a neimi hmuahhmuah tla cu a hnenah an va feh ih anmah pawl hotu ah a cang. An zate in minung zali hrawng an si.
3 Cun David cu Moab ram, Mizpah khua ah a va feh ih Moab siangpahrang hnenah, “Pathian in ka hrangih a tumtahnak fiang teih ka theih hlan lo cu na hnenah hin ka nu le ka pa ra um thei hram hai sehla tiah zangfah ka lo dil,” tiah a ti.
4 Curuangah David in a nu le a pa cu Moab siangpahrang hnenah a taan ih lungkua ih a relh sung hmuahhmuah Moab siangpahrang hnen ahcun an um.
5 Cule profet Gad cu David hnenah a ra ih, “Hitawk hmunah um nawn hlah. Zamrang in Judah ram ah feh aw,” tiah a ra ti. Curuangah David cu Hereth tupi sungah a feh.
6 Saul cu Gibeah khua ah a um ih nikhat cu a feipi kengin tlang parih tuumkung hnuai ah a to. A kuthnuai ih bawi pawl in an kil òhepòhep. Cule David le a milai pawl umnak kan thei, tiah Saul cu an ra sim.
7 Cutikah Saul in a kuthnuai bawi pawl hnenah, “Benjamin mi pawl, i ngai uh! David in lo le sabit hmuan in pe dingih a ralkap sungah thawngkhat hotu le zakhat hotu ralbawi ah in tuah thluh ding, tiah nan ruat maw si?
8 A cuih ruangah maw siatsuah dingah in phiar ciamco? Ka fapa rori David hnenih a òan ih thukamnak a tuah tla zohman in, in sim lo. Zohman in, in ninghanpi hrimhrim lo. Ka sungsuak ka fapa rori in a forh ruangah ka minung a simi David in atu ah keimah thah theinak tikcu lawnglawng a hawl ti tla zohman in, in sim dah lo,” tiah a hrang ciamco.
9 Saul ih kuthnuai bawi pawl hnenah Edom mi Doeg a rak ding ve ih anih in, “Nob khua ih a ummi Ahitub ih fapa Ahimelek hnenih David a feh ka hmu.
10 David hrangah Ahimelek in Bawipa ih hnenah thla a cam ih rawl tla a pek ih Filistin mi Goliath ih ralnam khal a pek a si,” tiah a ti.Ref 22:9, 10 Saam 52 Thulu.
11 Cutikah Saul siangpahrang in puithiam Ahimelek le Nob khua ih puithiam a òuan vemi a sungkhat pawl hmuahhmuah cu a ko ih a hnen ahcun an ra.
12 Cule Saul cun, “Ahitub ih fapa Ahimelek ka thusimmi hi ngai hnik!” tiah a ti.
Ahimelek in, “Ka lo ngai a si, bawipa,” tiah a ti.
13 Cule Saul in, “Ziangahso David le nangmah in kei hi in phiar rero? Ziangahso David cu rawl le ralnam na pek ih Pathian hnenih thla na cam sak? Atu ah David cu keimah i ral ih tikcu òha lawng a bawh a si,” tiah a ti.
14 Cutikah Ahimelek in, “Na kuthnuai ih bawi hmuahhmuah lakah David bangtuk rin tlak zoso a um? Na maakpa rori a si, nangmah a lo kilvengtu ralkap pawl ih bawi a si; cun na kuthnuai mi hmuahhmuah in an upat thluh a si.
15 A hrangih thla ka cam cu atu hi a hmaisabik a si lemlo. Asinan nangmah siatsuah dingih phiar thu ahcun keimah siseh, ka sungkhat siseh, in puh hrimhrim hlah. Hi thu cu samphang tia hman ka theihmi a um lo,” tiah a sawn.
16 Cutikah siangpahrang in, “Ahimelek, nangmah le na sungkhat pawl cu ka lo that òheh ding,” a ti ih,
17 a kiangih a dingmi ralkap pawl hnenah, “ Bawipa ih puithiam pawl hi that òheh uh. David thawn in phiar ih David a tlan zo ti khal an thei ringring nain in sim duh lo a si,” tiah thu a pek. Asinan Pathian ih puithiam pawl thah ding cu an duh lo ih ralkap pawl cu an kut hman an hawi duh lo.
18 Curuangah Saul in Doeg cu, “Nangmah in puithiam pawl hi that òheh aw,” tiah a fial ih, a fial vekin Doeg cun a that òheh. Cuih ni ah Bawipa Pathian ih puithiam pawl sawmriat le panga a that a si.
19 Cuih tlunah puithiam khua an ti òheumi Nob khuasung ih a ummi minung hmuahhmuah khal thatthluh dingin Saul in thu a pe ruangah mipa siseh, nunau siseh, nauhak siseh, naute suakpek siseh, caw, laak le tuu pawl tiangin an that thluh a si.
20 Asinan Ahimelek ih fapa pawl sungah Abiathar an timi pa cu a luat ih David hnenah a tlan suak.
21 Pathian ih puithiam pawl cu Saul in a that thluh a si, tiah David cu a va sim.
22 Cutikah David in, “Nikhat ih Doeg ka hmuh tikah khan Saul a va sim tengteng ding, tiah ka zum tho a si. Curuangah Abiathar, na sungkhat pawl an thih thluh cu keimah ih ruangah a si.
23 Ka hnenah hin um awla na thinphang hlah aw. Nangmah le keimah thah ding cu Saul ih duhbikmi a si. Asinan ka hnen ahcun na him ko ding,” tiah Abiathar cu a ti.