15
Israel Mi In Amalek Pawl An Do
1 Samuel in Saul hnenah, “Pathian minung Israel mi pawl uktu siangpahrang si dingih hriak lo culhtu dingah Bawipa in i thlah zo. Curuangah Bawipa ih simmi cu ngai aw.Ref 15:1 1 Sam 10:1;
2 Izipt ram ihsin Israel mi pawl an suah lai ah, Israel mi a rak dodaltu Amalek mi pawl cu Ziangkimtithei Bawipa in hrem a tum a si.Ref 15:2 Suah 17:8-14; Daan 25:17-19;
3 Feh uhla Amalek mi pawl cu va do uh. An neihmi hmuahhmuah siatsuah thluh uh. Zianghman zuah hlah uh; mipa, nunau, nauhak le a suak pekte naute tiangin that thluh uh. Caw, tuu, kalauk le laak pawl khal that thluh uh,” tiah a ti.
4 Curuangah Saul in a ralkap pawl a ko ih Telaim ah an khawm aw. Israel ihsin ralkap thawng zahnih le Judah ihsin ralkap thawnghra an ra.
5 Cule Saul le a ralkap pawl cu Amalek khuapi lam ahcun an feh ih tiva car sung ihsin ral an bawh.
6 Saul in Ken mi pawl hnenah, “Izipt ram ihsin Israel mi pawl an suah lai ah Israel mi parah nannih cu nan rak òha a si. Amalek mi pawl hnenih kan lo thah cih thluh lonak dingah Amalek mi pawl cu tlansan uhla fehsuak uh,” tiah ralrinnak a pek. Curuangah Ken mi pawl cu an suak.
7 Saul in Amalek mi pawl cu Izipt ram nisuahnak lam Havilah ihsin Shur tiang a neh thluh.
8 Amalek siangpahrang Agag cu a nung in a kai ih midang pawl cu a that òheh.
9 Saul le a ralkap pawl in Agag ih nunnak cu an zuah ih, a òha bikmi tuu le caw, tuufaate le caw faate pawl le a òha an timi pohpoh cu an that lo. Òhathnemnak nei lomi le man nei lomi hmuahhmuah cu an that thluh.
Saul Cu Pathian In A Hnong
10 Bawipa in Samuel hnenah thu a simsal ih,
11 “Saul hi siangpahrang ih ka canter cu ka siir aw ngaingai. A dung i tun ih ka thupek a thlun lo a si,” tiah a ti. Samuel cu a thin a heng ngaingai ih zanvarte Bawipa ih hnenah thla a cam.
12 A thaizing zingpit ah Saul tong dingin a feh. Saul cu amah ih hmin hngilh lonak dingah lung a dawlnak Karmel khua ah a feh ih cuih hnuah Gilgal ah a feh a si, ti thu cu Samuel in a thei.
13 Cun Samuel cu Saul hnenah a va thleng ih Saul cun a rak cibai ih, “ Bawipa in lo thluasuah hram seh, Samuel. Bawipa ih thupekmi ka thlun ko a si,” tiah a ti.
14 Cutikah Samuel in, “Cuti asile ziangtinso tuu a meekmi le caw a paw mi ka theih rero?” tiah a sut.
15 Saul in, “Amalek mi pawl hnen ihsin ka ralkap pawl ih an lakmi a si. Tuu siseh, caw siseh, a òha bikmi cu Bawipa na Pathian hrangih thawinak pek dingah an ret ih a dang cu kan that thluh a si,” tiah a ti.
16 Samuel in, “Cawl hrih awla mizan ah Bawipa ih thu i simmi ka lo sim pei,” tiah a ti.
“I sim hnik aw,” tiah Saul in a ti.
17 Cutikah Samuel in, “Nangmah cun zianghman ka si lo tiah na ruat aw ding nain Israel miphun pawl hotu na si. Bawipa in Israel siangpahrang ah hriak a lo culh a si.
18 Cun mi siava Amalek mi pawl that thluh dingah Bawipa in thu a lo pek ih an zate ih na thah thluh hlan lo do dingin fel tein a lo tiam a si.
19 Cuti asinain ziangahso a thu na ngai lo? Ziangahso thilri lonmi pawl cuh dingah zamrang sawn in na pan ih Bawipa ih lungkim lomi cu na tuah?” tiah a ti.
20 Saul in, “ Bawipa ih thu ka ngai ko sokhaw! I fial vekin ka feh ih Amalek siangpahrang Agag lawng a nungin ka rak thlenpi. Midang hmuahhmuah cu ka that òheh a si.
21 Asinan ka ralkap pawl cun an kaihmi lakih tuu le caw òha bik pawl cu an that lo. Gilgal khua ah Bawipa na Pathian hnenih thawinak pek dingah an rak keng sawn a si,” tiah a ti.
22 Cutikah Samuel in, “Khuimi so Bawipa in a duh sawn? Amah ih thu thlun maw, asilole saserh peknak le thawinak so? Tuu a òha bikmi thawn a hnenih raithawi hnakin amah ih thu thlun cu a òha sawn a si. Amah dodal cu polsia dawihmang tluk in a òha lo a si.
23 Puarthau ih nun cu milem biak tluk in a sual a si. Bawipa ih thupekmi na duh lo bangtukin anih khalin siangpahrang ah a lo duh ve lo,” tiah a ti.
24 Cutikah Saul in, “Ka sual zet a si. Bawipa ih thupekmi le nangmah ih thucahmi ka thlun lo. Ka milai pawl ka òih deuh ruangah an duhnak bangin ka thlun.
25 Sikhalsehla Bawipa ka biak theinak dingah ka sualnak cu i ngaithiam hram awla ka hnenah Gilgal ah kirsal aw, tiah zangfah ka lo dil,” a ti.
26 Samuel in, “Na hnenah ka kirsal lo ding. Bawipa ih thupekmi na duh lo ruangah nang khal Israel ih siangpahrang si dingah a lo duh nawn ve lo a si,” a ti.
27 Cule Samuel cu tlung dingin a pok. Asinan Saul in a puan in a kai ih a puan cu a tlek.
28 Cutikah Samuel in, “ Bawipa in tuih sun ah Israel ram uknak cu na hnen ihsin a lak ih nangmah hnakih a òha deuhmi hnenah a pek zo.
29 Israel ih sunloihmi Pathian cu thuphan a per lo ih a thin a thleng aw rero lo. Minung a si lo ruangah a thin a thleng rero lo a si,” tiah a ti.
30 Cule Saul in, “Ka sual zo a si. Asinan Israel mi hmuahhmuah le ka minung hruaitu pawl ih hmai talah hin i upatnak cu langter hram awla Bawipa na Pathian ka biak theinak dingah ka hnenah kir ve hram aw,” tiah a dil ciamco.
31 Curuangah Samuel cu Saul hnenah a kirsal ih Saul cun Bawipa cu a biak.
32 Cutikah Samuel in, “Ka hnenah siangpahrang Agag cu rak hruai uh,” tiah thu a pek. Agag cu lungawi zet in Samuel ih hmai ahcun a ra ih, “Thih ding ka luat zo a si hi!” tiah amahte a ruat.
33 Cule Samuel in, “Na ralnam in nunau tampi cu faate nei lo ih a tuah bangtukin atu ah na nu khal faate nei lo ah a cang ve ding,” a ti. Cutiin Gilgal ih biakòheng hmai rori ahcun Agag cu Samuel in a that ih a satcip òheh a si.
34 Cun Samuel cu Ramah ah a feh ih Saul cu Gibeah ih a inn ah a tlung.
35 Samuel cun a nunsung hmuahhmuah ah siangpahrang Saul cu a tongsal nawn lo; asinain a hrangah riahsia in a um ringring. Saul cu Israel siangpahrang ih a rak tuah ruangah Bawipa Pathian cu a siir aw ngaingai.