14
Jonathan In Ralòha Zet In A Do
1 Nikhat cu Jonathan in a hriamnam kengtu tlangvalpa ih hnenah, “Filistin pawl ih riahnak lamah kan va feh hnik pei,” tiah a ti. A cuih thu cu Jonathan in a pa a sim lo.
2 Saul cu Gibeah kiangte Migron khua ih tale kung tumpi hnuai ah a riak. A hnenah ralkap zaruk an um.
3 Cun puithiam òaangthlaih angki a kengtu cu Ahitub ih fapa Ahijah a si; Ahitub cu Ikhabod ih unau a si ih Ikhabod cu Finehas ih fapa a si. Finehas cu Shiloh khua ih Bawipa ih puithiam Eli ih fapa a si. Cutawkih a ummi ralkap pawl cun Jonathan a feh zo ti kha an thei lo.
4 Filistin ralkap pawl ih riahnak ah feh dingin Jonathan ih a zawh dingmi tlangkawn ih khatlam veve ah a zum zetmi lungtumpi pahnih an um. Lungto pakhat ih hmin cu Bozez an ti ih a dang pakhat cu Seneh an ti.
5 Bozez cu lamzin saklam, Mikmash lamah a um ih, Seneh cu lamzin ih thlanglam, Geba lam kapah a um.
6 Jonathan in tlangvalpa ih hnenah, “Pathian awi lo Filistin ralkap pawl ih riahnak ah kan va feh pei. Pathian in, in bawm men ding. In bom ngaingai ahcun ziangtlukih mi malte kan si hmanah kan neh thotho hai ding. Bawipa ih in bomnak cu zohman in an kham thei zik lo,” tiah a ti.
7 Tlangvalpa cun, “Na tummi cu tuah ko aw; na hnenah ka thinlung zate in ka òang a si,” tiah a ti.
8 Cutikah Jonathan in, “A òha! Kan va feh pei ih in rak hmu hai seh.
9 “In rak hngak uh, nan hnenah kan ra ding,” in ti a si ahcun hitawk ihsin kan hngak ding.
10 “Kan hnenah hung uh,” in ti a si ahcun kan hung feh pei; ziangahtile “Hung uh,” in tile cu Pathian bomnak in kan neh ding ti langnak a si,” tiah a ti.
11 Cule Filistin mi pawl ih hmuh dingin an lang awter ih cutikah Filistin mi pawl cun, “Zoh hnik uh, an relhnak lungkua sungin Hebru mi a hrekkhat an ra pawt zo khi,” tiah an ti.
12 Cule Filistin ralkap pawl cun Jonathan le a hriamnam kengtu tlangvalpa cu, “Hinah hung hnik uh. Thu lo sim ding kan nei a si,” tiah an ti.
Cutikah Jonathan in a tlangvalpa hnenah, “I thlunzang aw. Pathian in nehnak in pe zo a si,” tiah a ti.
13 Jonathan cu bokvak in a hung vak ih tlangvalpa cun a thlun vivo. Jonathan in Filistin pawl cu a nam ih a vuak thlak ih tlangvalpa in a that vivo hai.
14 Hmaisabik ih an thahnak hmun inn hmun tia tluk ah Jonathan le a tlangvalpa in Filistin mi pawl kul tluk an that a si.
15 Filistin mi hmuahhmuah in an thin a phang ngaingai ih ralvengtu ralkap le riahnak ih a ummi ralkap pawl tla an khur òheh. Leilung tiangin a hnin ih Filistin mi pawl cu òih le khur in an buai ciamco.
Filistin Mi An Neh
16 Benjamin ram, Gibeah khua ih Saul ih ralvengtu pawl in Filistin mi suk le so ih an tlan rero kha an hmuh tikah,
17 Saul in, “Ralkap pawl, siar aw hnik uh; a kim lo nan um maw!” tiah a ti. An siar awk tikah Jonathan le a hriamnam kengtu tlangvalpa an um lo ti kha an thei.
18 Cutikah Saul in puithiam Ahijah hnenah, “Puithiam òaangthlaih angki cu hinah rak keng aw,” tiah a fial. Ziangahtile Israel mi hmaiih puithiam angki kengtu cu amah a si.
19 Puithiam Ahijah hnenih Saul a òong rero lai ah Filistin ralkap pawl cu an riahnak ahcun an buai sinsin. Curuangah Saul in Ahijah hnenah, “Na aizing cu bangta hrih aw,” tiah a ti.
20 Cule Saul le a ralkap pawl cu hmakhat teah Filistin mi do dingah an feh. Filistin pawl cu an buaituk thlang ih an minung khal thei aw nawn lo in anmah le anmah an that aw rero.
21 Filistin pawl hnenih a rak òangtu Hebru mi pawl tla Saul le Jonathan an hmuh tikah an hnenah an letawsal.
22 Cun Efraim tlangram ah a tlan ih a relhmi Israel ralkap pawl tla Filistin mi an sung ti an theih tikah Saul le Jonathan hnenah an òangsal ih Filistin mi pawl cu an do.
23 A cuih ni ah Israel cu Bawipa in a runsuak ih Israel mi pawl in Bethaven khua lan tiang an hei dawi a si.
Ral An Do Hnu Ih Thil A Cangmi
24 Saul in, “Ka ral pawl parih phu ka lak hlan lo, tuih sun ah zohman rawl nan ei lo pei. Nan ei asile nan buarsual a si ding,” tiah siatcam in thu a pek. Curuangah cuih ni cu Israel mi pawl an ril a rawng ngaingai ih an òaamsawl thluh. Sunvu zianghman an ei lo.
25 Tupi sung an thleng ih cutawkah khuaitizu tampi a um.
26 Tupi sung cu khuaitizu in a khat nain Saul ih siatcamnak an òih ruangah zohman in an ei ngam lo.
27 Sikhalsehla Jonathan in a pa ih siatcamnak cu a theih lo ruangah a kenmi fung cun khuaithlar cu a dawt ih khuaitizu malte a ei. Cuticun a rilrawn cu a òha deuh.
28 Cumi a hmuh tikah ralkap pa pakhat in, “Zokhal rawl kan ei lo ruangah tha kan nei nawn lo a si. Na pa in, “Tuih sun ih rawl a eitu cu siatserh siseh, ” a ti ruangah kan ei ngam lo a si,” tiah a sim.
29 Cutikah Jonathan in, “Kan minung parah ka pa in thil òha lo ngaingai a tuah a si. Zoh hmen uh, khuaitizu ka ei ruangah ka òha deuh ngaingai a si.
30 Tuih sun Filistin pawl an neh ih rawl an lon mi hmuahhmuah kha lak tahrat in ei hai sehla ziangtlukin an hrangah a òhahnem ding. Ziangtlukin so Filistin mi an that tam sinsin ding, ruathnik hmen uh,” tiah a ti.
31 A cuih ni ah Israel mi pawl in Filistin mi pawl cu Mikmash ihsin Aijalon tiang an nor. Israel mi cu an ril a rawn ruangah an òaamsawl thluh.
32 Curuangah ral pawl ih ta an lonmi tuu le caw pawl cu a hmunah an that ih an sa cu a thi thawn an ei ciamco.
33 Cule Saul hnenah, “Na ralkap pawl in a thi thawn sa an ei ciamco ih Bawipa ih hmaiah an sual a si,” tiah mi in an sim.
Cutikah Saul cun, “Kan miphun zuarthlaitu nan si,” tiah a au. Cuih tlunah, “Lungto tumpi hinah rak hril uh,” a ti.Ref 14:33 Sem 9:4; Pui 7:26, 27; 17:10-14; 19:26; Daan 12:16, 23; 15:23;
34 “Mi hmuahhmuah hnenah va feh uhla an caw le an tuu pawl hinah rak keng dingin va sim uh. Sa cu a thi thawn an ei lonak dingah le Bawipa ih hmaiah an sual lonak dingah an òilva cu hinah ra that hai sehla ei hai seh,” tiah a ti. Curuangah a cuih zan cu an zate in an caw an rak keng ih cutawkah cun an that.
35 Saul in biakòheng a dawlih Bawipa hrangih a dawlmi hmaisabik a si.
36 Cule Saul in a ralkap pawl hnenah, “Kan vung feh pei ih zan ah Filistin mi pawl kan vung do pei. Zinglam khawvang tiang kan vung siim dingih kan vung that thluh hai ding,” tiah a ti.
“A òha bik na timi poh cu tuah ko aw,” tiah an ti. Asinan puithiam in, “Pathian kan ron hmaisa hrih pei,” tiah a ti.
37 Curuangah Saul in Pathian hnenah, “Filistin pawl ka do pei maw? Kan do asile kan neh pei maw?” tiah a sut. Asinan cuih ni cu Pathian in a sawn lo.
38 Cutikah Saul in Israel hruaitu pawl hnenah, “Ra hnik uh, tuih sun ah ziang mawhnak so nan tuah, hawl hnik uh.
39 A nungmi Bawipa, Israel Runtu ih hmin in ka lo kam a si: Ka fapa Jonathan hman a mawh a si ahcun thah a si pei,” tiah a ti. Midang cu zianghman an òong lo.
40 Cule Saul in, “Nan zate in khi lamah va ding uh. Kei le ka fapa Jonathan hinah kan ding pei,” a ti.
“Na duh vekin si ko seh,” tiah misenpi in an ti.
41 Cutikah Saul in Bawipa, Israel ih Pathian hnenah, “ Bawipa, ziangahso tuih sun ah zianghman i sawn lo? Bawipa, Israel ih Pathian, atu ah Urim le Thummim in, in run let hram aw. Keimah ih mawh, asilole Jonathan ih mawh a si ahcun Urim in, in let aw. Israel misenpi pawl an mawh a si ahcun Thummim in, in let aw,” tiah a ti. Urim in a run let ruangah Jonathan le Saul cu mimawh an si ih Israel mi pawl cu mawh lo ah an cang.Ref 14:41 Mipum 27:21; 1 Sam 28:6;
42 Cutikah Saul in, “Keimah le ka fapa Jonathan ah zoso a mawh?” tiah a sutsal tikah Jonathan parah a tlu.
43 Cule Saul in Jonathan cu, “Ziangso na tuah sual?” tiah a sut.
Cutikah Jonathan in, “Khuaitizu malte ka ei a si. Thih ding a si ahcun ka thi ko pei cu,” tiah a ti.
44 Saul in, “Nangmah na thih lo ahcun keimah hi Pathian in i run that seh,” tiah siat a cam.
45 Sikhalsehla Israel mi pawl in Saul hnenah, “Israel hrangih ral a nehtu Jonathan a thi ding maw? Thi hrimhrim hlah! A lu parih samphang pakhat hman leilung parah a tla lo pei, tiah a nungmi Bawipa ih hmin in thu kan kam aw. Tuih sun ih a tuahmi cu Bawipa ih bomnak in a tuahmi a si,” tiah an ti. Cutiin Israel mi pawl in Jonathan cu thi lo in an hum suak.
46 Cuih hnu cun Saul in Filistin mi pawl cu dawi nawn lo in a kirsan ih Filistin pawl cu an ram ah an tlung.
Saul Ih Uknak Le A Innsang
47 Saul cu Israel siangpahrang a can hnuah khuazakip ah ral a do. Moab mi pawl, Ammon mi pawl le Edom mi pawl a do ih Filistin mi pawl le Zobah siangpahrang pawl tla a do. Ral a donak tinah nehtu a si ringring.
48 Ralòha zet in ral a do ih Amalek pawl khal a neh. Israel mi a siimtu pawl ih kut ihsin a hum ngah hai a si.
49 Saul ih fapa pawl cu Jonathan, Ishvi le Malkhishua an si. A fanu upa sawn cu Merab a si ih a nauta sawn cu Mikhal a si.
50 A nupi cu Ahimaaz ih fanu Ahinoam a si. A ralkap uktu bawi cu a paseu Ner ih fapa Abner a si.
51 Saul ih pa Kish le Abner ih pa Ner cu Abiel ih fapa an si.
52 Saul in a nunsung hmuahhmuah nasa zet in Filistin pawl a do. Micak le mi ralòha a hmuhmi le a tonmi hmuah in a ralkap ah a lak òheu.