10
Saul Cu Samuel In Hriak A Culh
1 Cule Samuel in olif hriak palang khat a lak ih Saul ih lu parah a toih ih Saul cu a hnam hnuah, “ Bawipa in a miphun Israel pawl uktu dingah nangmah cu hriak a lo culh a si. A minung pawl na uk dingih an ral pawl ih kutsung ihsin na luatter ding. Amah ih minung pawl uk dingah Bawipa in a lo hril zo a si, ti theihthiamnak cu hibangtuk in a si ding:
2 Tuih sun kan òhen awk hnuah Benjamin ram sungih a ummi Zelzah khua ih Rachel ih thlan kiangah mi pahnih na tong ding. Nan hawl reromi laak pawl cu an hmu zo ih na pa cu laak hrangah helhkam nawn lo in nangmah a lo helhkam ih, “Ka fapa hrangah ziangso ka tuah ding?” tiah atu le atu mi a sut leuhleuh, tiah an lo sim ding.
3 Cutawk ihsin na feh dingih Tabor an timi hmunih sasuapi kung na thlen tikah Bethel khua ah Pathian hnenih saserh thawinak pe dingah a fehmi pacang pathum na tong ding. Pakhat pa cun me faate pathum a hruai dingih, pahnihnak pa in sang zawlthum a keng ding. A pathumnak pa cun savun thawl khatin sabitti a keng ding.
4 An lo cibai dingih sang zawlhnih an lo pe ding. Cumi cu na rak sang pei.
5 Cule Filistin ralkap pawl ih riahbuk umnak Gibeah khua ih a ummi Pathian Tlangah na feh pei. Khuasung vung luhnak hnar ah, tlangpar biakòheng ihsin profet burpi, òingòang le khuang, phirivau le tingrisit pawl tum phahin a rung tlungmi na tong ding. Anmah tla cu profet òong in an òong dingih an laam an au phahphah ding.
6 Cule Pathian ih thlarau in a lo kai ve ding; anmah bangtukin profet òong in na òong ve ding; na laam na au phahphah ve dingih mi phundangpi ah na cang ding.
7 Cubangtuk ih na parih a kim òheh tikah Pathian ih a lo hruainak bangtukin tuah aw.
8 Ka hlanah Gilgal ah na rak feh pei. Cutawkah ka lo tong ding, mei-ur thawinak le remawk thawinak pawl tla Pathian hnenah ka pek ding. Ka ra thlen hlan lo ni sarih sung i hngak awla cuih hnuah na tuah dingmi ka lo sim ding,” tiah Samuel in a ti.
9 Saul cu feh dingih a vung her awk lai ah Pathian in Saul cu thinlung thar a pek. Samuel ih a simmi hmuahhmuah kha cuih ni ah a kim òheh.
10 Saul le a hnenumpa cu Gibeah an thlen tikah profet pawl in an rak tong. Pathian ih thlarau in Saul cu a kaiih profet pawl bang in profet òong in a òong ih a laam a au phahphah ve.
11 A hlanih a rak theitu pawl in Saul khal cutiih a um cu an hmuh tikah, “Kish fapa hi ziang a cang a si pei? Saul khal profet a cang zo maw si?” tiah pakhat le pakhat an ti aw.
12 Cutawk khua ih a ummi pacang pakhat in, “Midang profet pawl teh, an pale pawl profet an si ciar maw si?” tiah a ti. Cuticun, “Saul khal profet a cang zo maw si?” tihi òongnak ah an hmang òheu.Ref 10:12 1 Sam 19:23, 24;
13 Saul cu profet pawl vekih a laam le a au a reh tikah tlang parih biakòheng ah a feh.
14 A paseu in Saul le a hnenumpa cu, “Khuiahso nan si?” tiah a rak sut.
Cutikah Saul in, “Kan laak pawl kan hawl. Kan hmuh lo tikah Samuel kan va tong,” tiah a ti.
15 “Samuel in ziangso a lo sim?” tiah a paseu in a sutsal.
16 “Laak pawl cu an hmu zo a si, tiah in sim,” tiah a ti. Siangpahrang na cang ding tiih Samuel ih a simmi pawl cu a paseu hnenah a sim lo.
Saul Cu Siangpahrang An Canter
17 Israel mi pawl cu Mizpah ah, Bawipa ih hnenah, Samuel in a kokhawm.
18 Samuel in an hnenah, “ Bawipa, Israel ih Pathian in, “Izipt ram ihsin ka lo suahter ih Izipt mi pawl le a lo hremtu pawl ih kut sung ihsin ka lo luatter a si.
19 Keimah cu nan harsatnak le nan zonzaihnak sung ihsin a lo runtu nan Pathian ka si. Sikhalsehla tuih sun ah kei cu in hnong ih siangpahrang in dil. Curuangah nan phun ciar le nan hrin ciar in ka hmaiah hin ding hnik uh,” a ti,” tiah a sim.
20 Cule an phunhnam ciar in phunkhat hnu phunkhat Samuel in hmailam ah a suahter hai ih Bawipa in Benjamin phun a hril.
21 Cun Benjamin phun sung ihsin hrinkhat hnu hrinkhat Samuel in a dinter tikah Matri ih hrin kha Bawipa in a hril. Cule Matri ih hrin pawl cu an mipum in hmailam ih an ra suah tikah Kish ih fapa Saul a hril. Asinan Saul cu an hawl ih an hmu lo.
22 “Midang hril ding an um maw?” tiah Bawipa cu an sut.
Cutikah Bawipa in, “Khinah Saul a um ko; thilri lakah a relh a si,” a ti.
23 Curuangah an va tlan ih Saul cu mipi hmaiah an rak suahpi. Midang lakih a din tikah midang hnakin pi khat in a sang deuh.
24 Cutikah Samuel in, “Pathian ih a hrilmi cu hi pa hi a si. Kanmah lakah amah bangtuk zohman kan um lo,” tiah a ti.
Cutikah mi hmuahhmuah in, “Siangpahrang a san sauseh!” tiah an au hluarhlo.
25 Siangpahrang ih covo le òuanvo pawl cu Israel mi pawl hnenah Samuel in fel tein a simfiang ih cazual sungih a ngan hnuah a cuih cazual cu hmun thianghlim ah a ret. Cuih hnuah misenpi cu an inn ciar ah a tlunter.
26 Saul khal Gibeah ih a inn ah a tlung ve. Pathian ih an thinlung a tong ngahmi micak le ralòha zet hrekkhat pawl in Saul cu a inn ah an thlun.
27 Asinan mi hlolak hrekkhat cun, “Hi pa cun ziangtinso in run thei ding?” tiah an ti. Saul cu an nautat ih laksawng khal an pe duh lo.