14
Tuufa Le A Minung Pawl
1 Cule ka hun zoh ih Zion Tlangah Tuufa a din ka hmu; amah thawn hmunkhat ah mi thawngza le thawng sawmli le thawngli an um ih cupawl cu amah ih hmin le a Pa ih hmin an cal ih nganmi an si.Ref 14.1 Ezk 9:4; Thup 7:3;
2 Cule vancung ihsin aw pakhat ka thei ih cuih aw cu tilian tlasuar awn le khuari ring zet awn vek a si. Òingòang tum thiammi pawl ih an òingòang tum aw bangtuk khal a si.
3 Minung thawngza le thawng sawmli le thawngli pawl cu siangpahrang tohkham le thilnung pali le upa pawl hmaiah an ding. Hla thar an sak ih cuih hla cu anmah lawng ih zir theimi a si. Mi hmuahhmuah sung ihsin anmah lawng tlen cia mi an si.
4 Anmah cu mi thianghlim an si, nunau thawn a pawl aw dah lomi an si ih a himmi an si. Tuufa fehnak kipah an thlun. Mi hmuahhmuah lak ihsin tlenmi an si ih, thlairah hmaisabik bangtukin, Pathian le Tuufa hnenah hlan hmaisabikmi an si.
5 Thuphan an per dah lo; mawhnak zianghman an nei lo.Ref 14.5 Zef 3:13;
Vancungmi Pathum
6 Cule van ah a zam reromi vancungmi pakhat ka hmu. Amah cu leilungtlun miphun kip, hrin kip, òong kip le ram kip hnenah kumkhua ih a hmunmi Thuthangòha thantu a si.
7 Aw ring zet in, “Pathian upat uhla a maksaknak thangòhat uh! Ziangahtile miphun kip an thu rel caan a thleng zo. Van le leilung, tifinriat le cerhtiput hmuahhmuah a tuahtu kha bia uh!” tiah a ti.
8 Vancungmi pahnihnak in pakhatnak cu a thlun ih, “A nasa zetmi Babilon cu a siat zo, a siat ngah zo a si. A tisa hiarnak sabitzu kha mi hmuahhmuah a pek ih, a ritter òheh a si,” tiah a ti.Ref 14.8 Isa 21:9; Jer 51:8; Thup 18:2;
9 Vancungmi pathumnak in a hmaiih a zammi vancungmi pahnih kha a thlun ih aw ring zet in, “Zokhal sahrang le milem a bia ih a hminsinnak a cal ah asilole a baan ah a neitu cu,
10 Pathian thinhennak khuathai sungih thletmi a thinhennak sabitzu hran cu a in ding. Cuih zu a intu cu vancung mithiang pawl le Tuufa hmaiah meisa le kaat mei-alh sungih hremnak an tuar ding.Ref 14.10 Isa 51:17; Sem 19:24; Ezk 38:22;
11 Anmah hremnak meisa khu cu cat lo in tlunah a kai ringring. Sahrang le a lem a betu le a hmin hminsinnak a neitu hrangah cun sun ah siseh, zan ah siseh, hnangam teih colhdamnak caan an nei nawn lo,” tiah a ti.Ref 14.11 Isa 34:10;
12 Hibangtuk caan ah Pathian minung pawl, Pathian thukham a thluntu le Jesuh hrangah rin tlak zet ih a nungtu pawl in thinsau in tuar theinak an neihmi an langter a òul ngaingai.
13 Cule vancung ihsin aw pakhat ka thei ih, “Himi hi ngan aw. Bawipa zum cingte ih a thitu pawl cu mi lungawi an si,” tiah a ti. Cutikah Thlarau in, “A si ngaingai! Annih cu an hnaòuan khunghar ihsin an cawl thlang ding a si; ziangahtile an òuanmi in a thlun hai ding,” tiah a ti.
Leilungtlun Rawlkhawm Caan
14 Cule ka hun zoh ih a raangmi mero ka hmu; cuih mero parah cun a lu ah sui ih tuahmi siangpahrang lukhuh a khum ih a kut ah a hriam zetmi favah a kengtu Milai Fapa bangtuk ka hmu.Ref 14.14 Dan 7:13;
15 Biakinn sung ihsin vancungmi pakhat a ra suak ih mero parih a totu hnen ahcun aw ring zet in, “Na favah cu fangahnak ah hmang aw, ziangahtile a caan a kim zo; leilungtlun rawlkhawm a cu zo,” tiah a ti.Ref 14.15 Joe 3:13;
16 Cule mero parih a totu in leilungtlun ah a favah cu a vun hawi ih leilungtlun fang cu a khawm.
17 Cule a dang vancungmi pakhat vancung biakinn ihsin a ra suak ka hmu; anih khal a hriam zetmi favah a nei ve.
18 Cule a dang vancungmi pakhat, meisa tlun thuneitu, biakòheng ihsin a ra suak. Favah hriam zet a neitu vancungmi hnenah napi in a au ih, “Na favah hmang awla leilungtlun sabit hmuan ih sabit pawl hlep thlang aw; ziangahtile sabit an hmin zo a si,” tiah a ti.
19 Cutiin vancungmi in a favah cu leilung ah a vun hawi ih sabit hri ihsin sabit rah a hlep ih Pathian thinhennak sabit rialnak sungah a vun thlak.
20 Sabit rah cu khuapi lengih a ummi sabit rialnak ah an rial ih sabit rialnak sung ihsin thisen a luang; cuih thisen cu peng zahnih tiang a luang ih rang kakharh tiang a thuk.Ref 14.20 Isa 63:3; Òah. 1:15; Thup 19:15;