29
Judah Siangpahrang Hezekiah
(2 Siang 18:1-3)
1 Hezekiah cu kum kul hluannga a ti in siangpahrang a òuan ih Jerusalem ihsin kum kul hluankua sung a uk. A nu cu Zekhariah ih fanu Abijah a si.
2 A cithlahtu Siangpahrang David bangtukin Bawipa ih lungawinak a tuah.
Biakinn Thianternak
3 Hezekiah siangpahrang a can kum thla khatnak ah Biakinn kotka pawl cu Hezekiah in a ongsal ih a remsal òheh.
4 Cule Biakinn ih nisuahnak lam kap tual ah puithiam pawl le Levi mi pawl a kokhawm ih,
5 “Nannih Levi mi pawl, nan pupa ih Pathian Bawipa ih Biakinn cu nan thianternak dingah nanmah nan thianter aw hmaisa pei. Cuih hnuah Biakinn a borhhlawhtertu thil hmuahhmuah nan hlon thluh pei.
6 Kan pu le kan pa pawl cu Bawipa kan Pathian hmaiah thilsual an tuah ih a riah an siatter. Bawipa cu an hnong ih a umnak hmun an dungtun a si.
7 Biakinn sangka pawl an khar ih an vanmi mei-inn an mitter. Israel Pathian ih Biakinn sungah rimhmui an ur nawn lo; thawinak pawl khal an pe nawn lo.
8 Curuangah Bawipa cu Judah le Jerusalem parah a thin a heng ngaingai ih an parih a tuahmi thil pawl in mi hmuahhmuah tuk a suumter. Cuih thu cu nan thei thluh ko.
9 Kan pale pawl cu raldonak ah an thi ih kan nupi le kan faate pawl sal ah an hruai.
10 “Hiti a si ruangah Bawipa, Israel ih Pathian cu kan parih a thin a heng nawn lonak dingah amah thawn thukam tuah dingin ka ruatcat zo.
11 Curuangah ka faale pawl, daithlang men hlah uh. A hnenih rimhmui urtu dingah le misenpi in Pathian an biak tikah hotu si dingah Bawipa in nanmah hi a lo hril zomi nan si,” tiah a ti.
12-14 A tanglam ih Levi mi pawl hin hnaòuan cu an thok:
Kohath hrin in Amasai fapa Mahath le
Azariah fapa Joel,
Merari hrin in Abdi fapa Kish le
Jehallelel fapa Azariah,
Gershon hrin in Zimnah fapa Joah le
Joah fapa Eden,
Elizafan hrin in Shimri le Jeuel,
Asaf hrin in Zekhariah le Mattaniah,
Heman hrin in Jehuel le Shimei,
Jeduthun hrin in Shemaiah le Uzziel.
15 Himi pawl in an unau Levi mi pawl cu an kokhawm ih an zate in an thianfai awknak an tuah. Cule siangpahrang ih thupek vekin Biakinn cu Bawipa ih Daan pekmi bangtukin an thianfaiter.
16 Puithiam pawl cu Biakinn sungah an lut ih an thianter; a thiang lomi hmuahhmuah Biakinn tualah an suah thluh ih cutawk ihsin Levi mi pawl in Kidron Phairawn ah an fehpi.
17 Hnaòuan cu thla khatnak thla, ni khat ni in an thok ih ni riat ni ah an òheh; Biakinn sungih vung luhnak khaan tla an thianfai òheh. Cule a dang ni riat sung, ni hleiruk ni tiang an òuansal ih Biakinn cu Pathian biaknak hrangih òha dingin an tuah kim òheh.
Pathian Hnenah Biakinn An Hlansal
18 Cun siangpahrang Hezekiah hnenah Levi mi pawl in thu an than ih, “Biakinn cu thawinak pawl urnak biakòheng le beelkheng pawl, sang thianghlim hunnak cabuai le a beelkheng pawl thawn kan thiangfaiter thluh zo.
19 Siangpahrang Ahaz in Bawipa ih hmaiah thilsual a tuah lai ih a lakmi thilri pawl tla kan laksal ih kan thianter thluh zo. Bawipa ih biakòheng hmaiah a zate in kan ret zo,” tiah an ti.
20 Cutikah zamrang tein siangpahrang Hezekiah cun khuasung upa pawl a kokhawm ih hmunkhat tein Bawipa ih Biakinn ahcun an feh.
21 Siangpahrang innsang le Judah misenpi pawl sual ngaithiamnak le Bawipa ih Biakinn thianhlimternak thawinak hrangah cawcang pasarih, tuucang pasarih, tuufaate pasarih le me pasarih an keng. Cule siangpahrang bawipa in Aaron tesinfa puithiam pawl cu biakòheng parah cuih rannung pawl thawinak ih pek dingah a fial.
22 Puithiam pawl cun hmaisabik ah cawcang an that; cule tuucang, cuih hnuah tuufaate an that ih cuih thisen cu biakòheng ah a sangsang in an theh.
23 Netabik ah me pawl cu an lak ih siangpahrang bawipa le Pathian biatu pawl misenpi in cuih me pawl parah an kut an suang.
24 Cule puithiam pawl in an that ih, siangpahrang bawipa in Israel mi hmuahhmuah hrangah mei-ur thawinak le sual ngaithiam thawinak cu tuah ding a si, tiih thu a pek bangtukin cuih thisen cu misenpi sual ngaihthiam thawinak hrangah biakòheng parah an thlet.
25 Bawipa in Siangpahrang David hrangih profet a rak òuantu profet Gad le profet Nathan hmangin David hnenih a rak pekmi daan pawl cu siangpahrang Hezekiah in a thlun ih Levi mi pawl tla Biakinn sungah darsumsel, òingòang le tingrisit pawl thawn a ret.
26 Levi mi pawl cu siangpahrang David ih a rak hmanmi awnmawi thilri pawl kengin an ding ih puithiam pawl cu tawtawrawt thawn an ding.
27 Cule Hezekiah in mei-ur thawinak pe dingah thu a pe; cutiin thawinak an pek ve tein senpi pawl in Pathian thangòhatnak hla an sak ih awnmawi tumtu pawl in an tawtawrawt le a dang tummi pawl an tum ciamco.
28 Biakinn ih a rami hmuahhmuah in hmunkhat ah Pathian an bia ih an hlasak le an tummi cu thawinak pawl an ur thluh hlan lo cat lo in an tum ringring.
29 Cule siangpahrang bawipa le senpi pawl cu an khuk an bil ih Pathian an bia.
30 Siangpahrang Hezekiah le Judah mi hotu pawl in David le profet Asaf ih nganmi thangòhatnak hla pawl sak dingah Levi mi pawl an fial. An fial vekin lungawi aipuang zet in an sak ih khuk bil tahrat in Pathian an bia.
31 Cun Hezekiah in senpi pawl cu, “Atu cu nan thianghlim zo ih Bawipa ih hnenah lungawi langternak ah thawinak cu Amah ih hnenah pe uh,” tiah a ti. A ti vek cun an tuah ih mi hrekkhat in mei-ur thawinak hrangah lungthote in rannung pawl an pek.
32 An rak kenmi pawl cu cawcang sawmsarih, tuucang zakhat le tuufaate zahnih an si ih Bawipa ih hnenah mei-ur thawinak ah an pek.
33 Cuih tlunah misenpi ih ei dingah cawcang zaruk le tuu thawngthum thawinak ah an pek.
34 Rannung hizat thattu dingah puithiam tlamtling in an um lo ruangah cuih hnaòuan a cem hlan lo Levi mi pawl in an bawm. Cuih tikcu ahcun puithiam tam deuh an thiangfai awter zo. Thianhlimnak thu ahcun puithiam pawl hnakin Levi mi pawl an thu a fek deuh.
35 Mei-ur thawinak an pek hlei ah senpi pawl ih eimi thawinak rannung thau pawl meisa ih ur ding le mei-ur thawinak thawn pek cih mi sabitti pawl thlet ding tla cu puithiam pawl ih òuanvo a si.
Cuticun Biakinn ih Pathian biaknak cu a thar in an thoksal.
36 Pathian bomnak thawngin cuih hnaòuan pawl cu zamrangzet ih an òheh thei ruangah siangpahrang Hezekiah le senpi pawl cu an lung a awi ngaingai.