24
Judah Siangpahrang Joash
(2 Siang 12:1-16)
1 Joash cu kum sarih a ti in Judah siangpahrang a òuan ih Jerusalem in kum sawmli sung ram a uk. A nu cu Beersheba khuami Zibiah a si.
2 Puithiam Jehoiada a dam sungah cun Joash in Bawipa ih hmaiah thilòha a tuah ih Bawipa ih lung a awiter.
3 Siangpahrang Joash hrangah Jehoiada in nupi pahnih a hrilsak ih fanu le fapa tampi an hrin.
4 Caan malte sung siangpahrang a òuan hnuah Joash in Bawipa ih Biakinn rem a tum.
5 Puithiam pawl le Levi mi pawl cu Judah ramsung khuakip ah a thlah ih kumtin Biakinn remnak hrangih a òulmi paisa khuan dingah thu a pek. Zamrangte ih tuah dingah a fial nain Levi mi pawl cun zamrang tein an tuah lo.
6 Curuangah an hotu Jehoiada cu a ko ih, “ Bawipa umnak Puanthlam zohnak ah senpi pawl in ngunkhuai an pek pei, tiah Bawipa ih siahhlawh Moses in thu a tanta mi cu ziangahso Judah le Jerusalem mi pawl hnen ihsin Levi mi pawl na khuanter lo?” tiah a sut.Ref 24:6 Suah 30:11-16;
7 Misual nu Athaliah le a thluntu pawl in Bawipa ih Biakinn cu tampi an siatsuah ih thilri thianghlim tampi tla Baal khawzing biaknak ah an rak hmang.
8 Cutikah siangpahrang bawipa ih a fial vekin Levi mi pawl in paisa retkhawmnak ding thingkuang pakhat an tuah ih Biakinn kotka ah an ret.
9 Pathian siahhlawh Moses in hmaisabik ngunkhuai cu hramlak ih a rak khuan bangtukin Bawipa ih hnenah ngunkhuai pe dingin Jerusalem le Judah ramsung hmuahhmuah ah thu an than.
10 Cuih an thuthanmi an theih tikah misenpi le an hotu pawl an lung a awi ngaingai ih an ngunkhuai cu an pek ciamco ih thingkuang an tuahmi cu a khat.
11 Nitin tein òuanvo neitu siangpahrang kuthnuai ih bawi pakhat hnenah cuih kuang cu Levi mi pawl in an hei phur òheu. Thingkuang a khat zo ti an hmuh tikah paisa cu siangpahrang bawipa ih sungòuan le Puithiam Sang ih palai pa in an lak ih thingkuang cu an retnak keel ah an retsal. Cuticun paisa tam ngaingai an khawl.
12 Cun siangpahrang Joash le puithiam Jehoiada in Biakinn rem hnaòuan hotu pawl hnenah paisa cu an pek ih annih in Biakinn remtu ah lungsertu, zungthiam le thir tuahtu pawl an lak.
13 Hnaòuantu hmuahhmuah in taima zet in an òuan ih Biakinn cu an sak pek vekin òha zet le fek zet in an rem theisal.
14 An rem òheh tikah a hleimi sui le ngun pawl cu siangpahrang bawipa le puithiam Jehoiada hnenah an khirhsal ih annih in Biakinn hrangih a òulmi beelkheng pawl tuahnak ah an hmang.
Jehoiada a damsung cu Biakinn ah cat lo in thawinak an tuah.
15 Jehoiada cu tarkun tiang a nung ih kum za le sawmthum a ti ah a thi.
16 Israel misenpi hrang, Pathian hrang le Bawipa ih Biakinn hrangih thilòha tuahtu a si ruangah Jehoiada cu David khuapi, Jerusalem khawhlun siangpahrang thlan ah an phum.
Jehoiada Hnaòuanmi An Phiat
17 Jehoiada a thih hnu ahcun Judah hotu pawl in siangpahrang Joash cu an forh ih anmah ih thu thlun in a nung.
18 Curuangah misenpi in Bawipa ih Biakinn ah an pupa ih Pathian biak nawn lo in milem le Asherah khawzingnu pawl an biak. Cutiih an sual ruangah Judah le Jerusalem parah Bawipa ih thinhennak a thleng.
19 Bawipa in a hnenih kirsal dingah an hnenah profet pawl a thlah nain an thu an ngai duh lo.
20 Cule Pathian ih thlarau cu puithiam Jehoiada fapa Zekhariah hnenah a thleng ih misenpi in an hmuh theinak hmunah ding tahrat in an hnenah, “ Bawipa in, ‘Ziangruangah ka thukham nan thlun lo ih, nan parah siatsuahnak nan thlengter?’ tiah thu a lo sut a si. Bawipa nan dungtun ruangah a lo dungtun ve,” tiah a au.
21 Cutikah siangpahrang Joash le misenpi in an phiar ih Zekhariah cu Biakinn tualah siangpahrang thupek in lung in an deng that.Ref 24:20, 21 Mat 23:35; Luk 11:51;
22 Zekhariah pa Jehoiada in a rak zangfah ih a rak kilkhawi reronak cu siangpahrang Joash in a theih nawn lo ruangah Zekhariah a that a si. Cule Zekhariah in a hnukcah zawng ah, “Nan thilti mi hi Bawipa in hmu hram sehla nan parah phu la hram seh,” tiah a au.
Joash Uknak A Cem
23 Cuih kum òhal caan a hung suak ih Siria ralkap in Judah ram le Jerusalem khua an do. Judah mi hotu pawl hmuahhmuah an that ih thilri le paisa tampi an lak hnuah Damaskas khua ah an phur.
24 Siria ralkap cu an malte nain Judah mi pawl in an pupa ih Pathian Bawipa an dung tun ruangah Bawipa in a tam zetmi Judah ralkap pawl cu a nehter a si. Siangpahrang Joash in Bawipa ih hremnak a tong ngaingai.
25 Ral an donak ahcun besia zet in hma a pu ih, an ral pawl an kirsal hnuah, a kuthnuai ih bawi pahnih in an phiar ih puithiam Jehoiada ih fapa an thahmi phulaknak ah a ihkhun parah an that. David khuapi ah an phum ih cuticun siangpahrang thlan ih phum hman a tong lo.
26 Joash a phiartu cu Ammon nunau Shimeath ih fapa Zabad le Moab nunau Shimrith ih fapa Jehozabad an si.
27 Siangpahrang Thuanthu Cabu Simfiangnak sungah a fapa pawl ih thuanthu, amah ih hrang profet thuphuan mi pawl le Biakinn a remnak pawl cu an ngan a si. Cuih hnuah a fapa Amaziah in a ai ah siangpahrang a run òuan.