18
Mikaiah In Ahab Ralrinnak A Pek
(2 Siang 22:1-28)
1 Judah siangpahrang Jehoshafat cu milian zet le mi hminthang zet a hung can tikah a sungkhat hrekkhat pawl le Israel siangpahrang Ahab ih sungkhat pawl thawn òhit-umnak in pehtlaih awknak a tawlrel.
2 Cuih hnu kum reipi hnuah Jehoshafat cu Ahab tlawng dingin Samaria khua ah a feh. Jehoshafat le a thluntu pawl upatnak ah Ahab in puai tumpi a tuah ih caw le tuu tampi a that. Cule Ahab in Gilead ram ih Ramoth khua do dingah Jehoshafat cu a sawm.
3 Ahab in, “Ramoth ka do dingih na tel thei ve pei maw?” tiah a ti.
Jehoshafat in, “Ka lo òanpi ding. Na man tikah i sim awla kei le ka ralkap pawl kan pok ding.
4 Asinan hmaisabik ah Bawipa kan ron ta pei,” tiah a ti.
5 Curuangah Ahab in profet zali tluk a ko ih, “Ramoth ka do ding maw, do lo ding so?” tiah a sut hai.
Profet pawl cun, “Do aw. Pathian in nehnak a lo pe ding,” an ti.
6 Sikhalsehla Jehoshafat in, “ Bawipa kan ron theinak dingah Bawipa ih profet pakhat tal an um lo maw?” tiah a sut.
7 Cutikah Ahab in, “A dang pakhat a um hrih. Imlah fapa Mikaiah a si. Asinan Mikaiah cu ka hua; ziangahtile ziangtik hmanah ka hrangah thuòha a phuang dah lo; a simmi cu thuòha lo a si ringring,” tiah a ti.
Jehoshafat cun, “Cuvek òong cu siangpahrang na hmurka in suakter hram hlah aw,” tiah a ti.
8 Curuangah siangpahrang Ahab in a kuthnuai bawi pakhat a ko ih Mikaiah zamrangih ko dingah a fial.
9 Cule Ahab le Jehoshafat cu an siangpahrang thuam in an thuam aw ih Samaria khuapi kotka leng fangrialnak hmunah siangpahrang tohkham veve ah an to ih an hmai ahcun profet pawl cu profet òong in thu an sim rero.
10 Profet pawl lakah pakhat Khenaanah ih fapa Zedekiah in thir in tuuki pawl a tuah ih Ahab hnenah, “ Bawipa in, ‘Hibangtuk ki pawl thawn Siria mi nan do dingih nan neh ding,’ a ti,” tiah a sim.
11 Profet dang khalin cubangtuk in an sim ciar. “Ramoth do dingah feh awla na neh mai ding. Bawipa in nehnak a lo pe ding a si,” an ti.
12 Cu sungah Mikaiah kawh an fialmi pa cun Mikaiah hnenah, “Profet dang hmuahhmuah in siangpahrang ih neh dingah an sim ciar. Nang khal an sim vekin na sim le a òha ding,” a ti.
13 Asinan Mikaiah cun, “ Bawipa ih hmin saal in ka lo sim: Ka Bawipa ih i simtermi lawnglawng ka sim ding,” tiah a sawn.
14 Mikaiah cu Ahab siangpahrang hmaiih a thlen tikah siangpahrang in, “Mikaiah, siangpahrang Jehoshafat le keimah in Ramoth kan do ding maw, do lo ding, i sim aw?” tiah a ti.
Cutikah Mikaiah in, “Do hnik hmen uh! Nan neh men ding! Bawipa in nehnak a lo pe ko ding,” tiah a sawn.
15 Cutikah Ahab in, “ Bawipa ih hmin in ka hnenih na òong tikah thudik na òong pei tiah vei ziangzatso ka lo sim ding?” tiah a ti.
16 Cule Mikaiah cun, “Israel ralkap pawl cu fing le tlang parah khaaltu nei lo tuu pawl bangin suk le so ah an vakvai ka hmu. Cule Bawipa in, ‘Himi pawl cu hotu an nei lo; dai tein an inn ah tlung hai seh,’ a ti,” tiah a sim.
17 Cutikah Ahab in Jehoshafat hnenah, “Hi pa cun ka hrangah thuòha a sim dah lo, ka lo ti tho lo maw? Ziangtik khalah thusia ringring a sim,” tiah a ti.
18 Cule Mikaiah cun, “ Bawipa ih òong cu ngai hrih uh. Bawipa cu a vancungmi pawl in a kimvel in an kil ih vancung a bawi tohkham parih a to khi ka hmu.Ref 18:18 Mat 9:36; Mar 6:34;
19 Bawipa in, ‘Ahab cu Ramoth ah feh tahrat in thah tong dingah zo in so a vung buum ding? tiah a suh tikah vancungmi hrekkhat in phunkhat an sim; a dang in phundang an sim.
20 Cutikah thlarau pakhat cu hmaiah a ra suak ih Bawipa cu a rak naih ih, ‘Keimah in ka vung buum ding,’ tiah a ti. Bawipa in, ‘Ziangtinso na buum ding?’ tiih a suh tikah,
21 cuih thlarau cun, ‘Ka vung feh pei ih Ahab ih profet hmuahhmuah thuphan ka perter thluh ding,’ tiah a sawn. Bawipa in, ‘Feh awla vung buum aw. Na buum suak thei ding,’ a ti,” tiah a sim.
22 Cule Mikaiah in, “Cuvek cekci in a cang ngaingai a si. Bawipa in na profet pawl hmuahhmuah cu na hnenah thuphan a relter òheh hai. Sikhalsehla Bawipa Amah in vanduainak na tonnak dingah lai a rel zomi a si,” tiah a ti.
23 Cutikah profet Zedekiah cu Mikaiah hnenah a hung feh ih Mikaiah cu a biang ah a beng ih, “Ziangtik in so Bawipa thlarau in i tlansan ih na hnenah thu a lo sim?” tiah a sut.
24 Mikaiah cun, “A thuuk bik khaan sungih na relh tikah na thei leh ko ding,” tiah a sawn.
25 Cule siangpahrang Ahab in a kuthnuai bawi pakhat hnenah, “Mikaiah hi kai awla khuapi uktu bawi Amon le siangpahrang fapa Joash hnenah hei hruai aw.
26 Himdamteih ka ra thlensal hlan lo thawng ah rak thla hai sehla thawngtla rawl, tidai le sang rak pe ve hai seh,” tiah a fial.
27 Cutikah Mikaiah in, “Himdamteih na rakirsal thei a si ahcun Bawipa in ka hnenah a òong lo a si ding. Ka simmi hi mi hmuahhmuah in thei hai seh,” tiah ring zet in a au.
Ahab A Thi
(2 Siang 22:29-35)
28 Cun Israel siangpahrang Ahab le Judah siangpahrang Jehoshafat cu Gilead ram ih Ramoth khuapi do dingah an feh.
29 Cule Ahab in Jehoshafat hnenah, “Ral kan do tikah nang cu na siangpahrang thuam hruk awla kei cu mi menmen vekin ka thuam aw ding,” tiah a ti. Cuticun Israel siangpahrang cu midang vekin tuah aw tahrat in ral a do.
30 Siria siangpahrang in a rangleng ralkap hotu bawi pawl cu Israel siangpahrang bawipa siar lo midang zohman tuahmawh lo dingin thu a pek.
31 Cule siangpahrang Jehoshafat an hmuh tikah Israel siangpahrang ah an ruat ih an nam ciamco. Asinan Jehoshafat cu a au ih Bawipa Pathian in a run ih a hualtu pawl cu an kir.
32 Rangleng ralkap hotu bawi pawl in Israel siangpahrang a si lo kha an theih tikah an dawi nawn lo.
33 Asinan Siria ralkap pakhat pa in bah-mi nei cuca lo in a conkiang a hei sai ih siangpahrang Ahab cu a awmphaw le ralthuam pehawknak a hliah zawnte ah a hei ngah. Cutikah Ahab cu, “In ngah ee!” tiah a au ih a rangleng mawngtupa cu raldonak hmun ihsin tlanpi dingah thu a pek.
34 Cuih ni an do awk cu a nasa ngaingai ih Ahab cu a rangleng parah do cop in Siria ralkap pawl lam hoi in a zau ih nitlak zawng ah a thi.