15
Asa In A Tharsuah
(2 Siang 15:12-15)
1 Pathian ih thlarau cu Oded ih fapa Azariah parah a rung thleng ih,
2 siangpahrang Asa hnenah a feh ih, “Siangpahrang Asa, Judah le Benjamin mi pawl, i ngai hnik uh! Bawipa lamih nan òan sung cu Bawipa in a lo òan ve a si. Amah nan hawl a si ahcun ton theih in a um ding; asinain nan dungtun a si ahcun a lo dungtun ve ding.
3 Israel mi pawl cu caan reipi Pathian dik nei lo, zirhtu puithiam nei lo le daan nei lo in an um.
4 Sikhalsehla harsatnak an ton tikah Bawipa, Israel ih Pathian hnenah an kirsal. Bawipa cu an hawl ih an tong òheu.
5 Culai caan ah khuazakip ah òihphannak le remlonak a um ruangah khui hmanah zohman an suakvak ngam lo.
6 Pathian in an parah harsatnak le vansannak a thlenter ruangah ramkhat le ramkhat, khuakhat le khuakhat an rem aw lo.
7 Sikhalsehla nannih cu cak zet le ralòha zet in nan um pei ih nan hnaòuan man nan co ding,” tiah a ti.
8 Asa in Oded ih fapa profet Azariah ih thuphuanmi a theih tikah a tha a tho zet. Judah le Benjamin ram le Efraim tlangpar ram an lakmi khuapi hmuahhmuah sungih a ummi milem pawl cu a hlon sak òheh. Cule Biakinn tualih a ummi Bawipa ih biakòheng tla a rem.
9 Efraim ram, Manasseh ram le Simeon ram ihsin minung tampi Asa hnenah an ra ih a ram sungah an um; ziangahtile a hnenah Bawipa a um ti an hmu. Asa in cuih a rami pawl le Judah mi le Benjamin mi pawl cu a kokhawm.
10 Asa siangpahrang a òuan kum hleinga kum, thla thumnak ah Jerusalem ah an tongkhawm aw.
11 Cuih ni ahcun an ral pawl hnenin an lonmi hransaw sungin caw zasarih le tuu thawngsarih Bawipa ih hnenah thawinak ah an pek.
12 An pupa ih Pathian Bawipa cu an thinlung le an thazang zate thawn bia dingah an zate lungkim in thukam an tuah.
13 Zozo khal, mino siseh, upa siseh, nunau mipa tilo in, Bawipa a bia lotu cu thah si dingin thu an kam aw.
14 Bawipa ih hmin in cuih an thukam cu thlun dingah ring zet in siat an cam ih tawtawrawt le tuucangki tum in napi in an au ciamco.
15 An thinlung tak tein thukam an tuah ruangah Judah mi hmuahhmuah cu an lung a awi ngaingai. Pathian an biaknak parah lunghmuinak an nei. Pathian ih pommi miphun ah an cang ih khuazakip ah daihnak a pek.
16 Cun siangpahrang Asa ih pi Maakah in khawzingnu Asherah lem a tuah ruangah siangpahrang bawinu ih nu a sinak in Asa in a hlon a si. Asa in milem cu a hauthluk ih a tan seksek hnuah Kidron Horkuam ah meisa in a ur.
17 Asa cun Israel ram sungih khawhrum biaknak hmun hmuahhmuah cu a siatbal thluh lo nain a damsung hmuahhmuah ah Bawipa rinsan in a nung.
18 Pathian hnenah a pa Abijah ih pekmi thilri pawl le amah ih pekmi sui le ngun in tuahmi bungbeel pawl cu Bawipa ih Biakinn sungah a ret òheh.
19 Judah ram a uknak kum sawmthum le kum nga sung cu a ram sungah doawknak a um lo.