29
Biakinn Saknak Ah Laksawng
Siangpahrang David in a rakhawmmi hmuahhmuah hnenah, “Ka fapa Solomon cu Pathian ih hrilmi a si; asinain mino a si ih thilti òhang a si hrih lo. A hnaòuan dingmi hi milai umnak siangpahrang inn a si lo ih Bawipa Pathian umnak ding Biakinn a si ruangah a thupi zetmi a si. Ka ti thei tawkin inn saknak thilri cu ka khawl zo: Sui, ngun, dar, thir, thing, lungmankhung le lungvar, mawiternak ah lung phun dangdang le lungto pawl ka khawl thluh zo.Ref 29:1, 2 1 San 22:5; Hi ka khawl cia mi thilri pawl hlei ah Pathian Biakinn hrang ka ruah tuk ruangah, keimah hrimhrim in sui le ngun tampi ka pek. Biakinn phar pawl mawiternak ah le zungthiam pawl òuan dingah sui òha bik pawl cuai thawng sawmnga le thawnghnih, le ngun òha bik pawl cuai thawng zakhat leng lo ka pek zo a si. Nan lakah zoso Bawipa ih hnenah siang zet in a pe ding?” a ti.
Cutikah an hrin ih lubik pawl, an hrin ih hotu le upa pawl, ralkap hotu ralbawi pawl le siangpahrang thilri a kiltu le a zohtu pawl hmuahhmuah in, Biakinn hrangah cun an pek ciamco. An pekmi cu a zate in sui cuai thawng sawmriat le thawngriat, ngun cuai thawng za le sawmsarih le thawngruk, dar phurh thawng hleisarih, thir phurh thawng sawmkua le thawnghnih leng lo a si. Lungmankhung a neitu pawl in Biakinn tangka kiltu Gershom hrin Levi mi Jehiel hnenah lungmankhung an pek. Misenpi pawl cun lungtho zet in an pek ih cu zatzat an pek thei cu an lung a awi zet. Siangpahrang David khal a lung a awi ngaingai.
David In Pathian A Thangòhat
10 David in misenpi hmai ahcun Bawipa a thangòhat ih, “Kan pupa Jakob ih Pathian Bawipa, na hmin cu thangòhat in um ringring seh. 11 Maw Bawipa, nangmah cu cungnungbik, huham neitu, a maksakmi le sunloih bik le a sang bik siangpahrang na si. Lei le van ih thil ummi hmuahhmuah na ta an si ih ziang hmuahhmuah ih tlunah siangpahrang le uktu bawi bik na si.Ref 29:11 Mat 6:13; 12 Thilri neihnak le lennak hmuahhmuah na hnen ihsin a rami an si; na cahnak le na huham thawn ziangzongza na uk òheh; na duh ahcun zohnen khalah thil titheinak le cahnak pe theitu na si. 13 Atu ah kan Pathian, kan lungawinak kan lo sim ih na hmin sunglawi kan thangòhat.
14 “Asinan ka minung pawl le kei hi zianghman kan si lo; kan lo pek taktak thei mi zianghman a um lo; ziangahtile kan neihmi hmuahhmuah cu nangmah ih in pekmi laksawng an si òheh ih na ta a si cia mi kan lo peksalmi lawng an si. 15 Maw Bawipa, nangmah ih in theih vekin, kan pu le kan pa bangtukin nunnak lamzin ahhin ralkaihmi le mikhual vekih a vakvaimi kan si. Kan damsung caan hi a hlosalmi phenthla vek a si ih thihnak in luat dingah ruahsannak kan nei lo. 16 Maw Bawipa kan Pathian, na hmin thianghlim cawimawinak ah hi thilri hmuahhmuah cu kan khawl zo; sikhalsehla na hnen ihsin a rami lawnglawng an si ih a zate in na ta an si òheh. 17 Mi thinlung cu na hniksak ih thinlung tluang a neimi parah na lung a awi, ti ka thei. Thinlung tluang zet le thinlung tak tein hi thil hmuahhmuah hi ka lo pek ih hitawkih a rami pawl khalin lungawi aipuangte in na hnenah an lo pek, ti ka hmu zo. 18  Bawipa, kan pupa Abraham, Isaak le Jakob ih Pathian, cubangtuk pek duhnak thinlung cu na minung pawl ih lung sungah kumkhua in run cakter awla, na hrangah rin tlak minung si dingin run kilkhawi hai aw. 19 Na daan le na thupekmi hmuahhmuah a thlun theinak dingah le a thilri tla ka khawl thluh zo mi Biakinn cu a saksuak theinak dingah ka fapa Solomon hi ruahnak òha le thinlung famkim run pe hram aw,” tiah a ti.
20 Cule David in misenpi cu: “ Bawipa nan Pathian cu thangòhat uh,” a ti hai ih misenpi pawl cun Bawipa, an pupa ih Pathian cu an thangòhat. An lu an kun, leilung ah an bok ih Bawipa Pathian le an siangpahrang hnenah upatnak an pek.
21 A thai sun ah rannung an that ih Bawipa ih hnenah thawinak le mei-ur thawinak pawl an pek. Cawcang thawngkhat, tuucang thawngkhat le tunote thawngkhat an that ih Israel misenpi hrang inmi thawinak sabit an pek ih thawinak dang tla tampi tla an pek. 22  Bawipa ih hmai ahcun an in an ei ih lungawi zet in cuih ni cu an hmang.
Cule David fapa Solomon cu siangpahrang ah a vei hnihnak an tuah. Bawipa ih hmin in an siangpahrang ah hriak an culh ih Zadok khal puithiam ah an culh ve. 23 Cuticun Bawipa ih a hngehtermi siangpahrang tohkham ahcun a pa David ih ai ah Solomon cu an toter a si. Siangpahrang hna cu hlawhtling zet in a òuansuak ih Israel misenpi in a thu an ngai.Ref 29:23 2 Siang 2:12; 24 Bawi le upa hmuahhmuah le ralkap pawl le David fapa dangdang pawl tla in Solomon cu an siangpahrang dingah upatnak thukam an pek. 25 Solomon cu an ram pumpi in an òihzah ih Israel ram a uktu siangpahrang hmuahhmuah lakah sunloih bikmi siangpahrang ah Bawipa in a tuah.
David Uknak A Tawi Zawngin
(2 Siang 2:10-12)
26 Jesse ih fapa David in Israel ram pumpi cu, 27 kum sawmli sung a uk. Hebron khua in kum sarih sung a uk ih Jerusalem khua ihsin kum sawmthum le kum thum sung a uk.Ref 29:27 2 Sam 5:4, 5; 1 San 3:4; 28 Milian zet le mi ih upat zetmi si in tar zet in a thi ih a fapa Solomon in a ai a run awh. 29 Siangpahrang David ih thuanthu cu a hramthokin a cem net tiang profet pathum Samuel, Nathan le Gad ih thuanthu khumnak sungah kim tein an ngan. 30 Ram a uk daan, huham a neih zia, a parih a ra thlengmi thuhla pawl le Israel le an kiangkap ram pawl hnenih a cangmi thuhla pawl tla kim tein an ngan a si.