21
David In Mipum A Siar
(2 Sam 24:1-25)
1 Satan in Israel parah harsatnak thlenter a duh ruangah David cu thusia a forh ih Israel mipum siar duhnak thinlung a neihter.
2 Curuangah David in Joab le a ralbawi dangdang hnenah, “Israel ram khatlam deng Beersheba ihsin khatlam deng Dan tiang feh uhla mipum siar hnik uh. Minung ziangzat an um ti theih ka duh,” tiah thu a pek.
3 Cutikah Joab in, “ Bawipa in Israel mi pawl cu atu hnakih a let zakhat in karhzaiter hram seh! Ziangzat an va si khalle Bawipa nangmah cu an siangpahrang na si ih an zate in na sal an si ko. Ziangahso an mipum siar cu na duh? An mipum na siarsuak ngaingai asile Israel miphun cu mawhphurtu na canter ding a si!” a ti.
4 Sikhalsehla David in a thu cu a òhin duh cuang lo. Curuangah Joab cu Israel ram pumpi hmuahhmuah ah a feh ih cuih hnuah Jerusalem ah a kir.
5 Siangpahrang David hnen ahcun thu a than ih, “Ralkap òuan thei ding lawnglawng Israel ah million khat le thawng zakhat an um ih, Judah ah thawng zali le thawng sawmsarih an um,” a ti.
6 Joab in David ih thupekmi a lung a kim lo ruangah Levi mi le Benjamin mi pawl cu mipum a siar lo.
7 Cuih thil an tuahmi parah Bawipa cu a lung a awi lo ih Israel pawl cu a hrem.
8 Cutikah David in, “Maw Bawipa, thil òha lo zet ka tuah ih ka sual zo a si. I ngaithiam hram aw. Aat hna ka òuan a si,” a ti.
9 Cule Bawipa in David ih profet Gad hnenah,
10 “Va feh awla David va sim aw; thil hril ding pathum ka pek. Pakhatkhat a hril pei ih cumi cu ka tuahsuak ding,” a ti.
11 Gad cu David hnenah a feh ih Bawipa ih òongmi cu a sim, “Khuimi so na hril ding?
12 Kum thum sung paam maw? Asilole na ral pawl in thla thum sung dawi le hual rero maw? Asilole ni thum sung Bawipa ralnam cu a vancungmi in hmang in Israel ram sungah natsia le thihnak thlenter maw? Pakhatkhat hril awla cumi cu Bawipa ka sim ding,” a ti.
13 Cutikah David in Gad hnenah, “Ka awlok a song tuk lawmmam! Asinan milai kut sungih tlak hnak cun Pathian kut sungih tlak ka duh sawn; ziangahtile Bawipa cu zangfahnak neitu a si,” a ti.
14 Curuangah Bawipa in Israel mi tlunah pulhnat a tlunter ih thawng sawm sarih an thi.
15 Pathian in Jerusalem siatsuah thluh dingah vancungmi a thlah; asinain a thinlung a thlengsal ih vancungmi hnen ahcun, “Cawl aw; tawk thlang seh,” a ti. Cule vancungmi cu Jebus mi Araunah ih fang cilnak puum kiangah a ding.
16 David in a hun zoh tikah van le leilung karlak ah Jerusalem siatsuah dingih namsaupi thlir in vancungmi a din kha a hmu. Cutikah David le Israel mi hotu pawl cu buri puan hruk in an hmai leilung dai tiangin an kuun.
17 David in, “Maw Pathian, a sualtu cu keimah ka si. Mipum siar dingih thu petu cu keimah ka si. Himi pawl in ziangso tuah sual mi an neih? Maw Bawipa, ka Pathian, keimah le ka innsang hi in hrem awla hi na minung, na tuurual hi cu luatter hram aw,” tiah thla a cam.
18 Cule Bawipa ih vancungmi in Gad hnenah, “David cu feh sehla Bawipa ih hrangah Jebus mi Araunah fang cilnak hmunah biakòheng donseh,” tiah thu a pek.
19 Bawipa ih thupekmi cu Gad ih sim vekin David cun a thlun.
20 Araunah le a fapa pali cu sangvut an cil rero. Vancungmi an hmuh tikah a fapa pawl cu an zam ih an relh.
21 Araunah in amah ih lamih siangpahrang David a rat rero kha a hmuh tikah zamrang tein a tlan ih a hmai lei dai in David hmai ahcun a kun.
22 David in, “Na sangvut cilnak hmun hi i zorh aw; Bawipa hrangah biakòheng ka dawl duh a si. Culo cun pulhnat hi a reh lo ding. A man cu na ngenzat ka lo pe ko ding,” a ti.
23 Araunah cun, “Bawipa, la ko aw; na duh vekin hmang aw. Biakòheng parih mei-ur thawinak ah hinah cawcang an um; thing hrangah puum ih donmi zial an um ih thlairawl thawinak hrangah sangvut a um ko. Ka lo pe thluh ding,” a ti.
24 Asinan siangpahrang bawipa cun, “A si lo, a man kim tein ka lo pe ding. Na ta cu a lak in ka la lo ding, keimah ih a man ka pek lomi cu Bawipa ih hnenah pek ka duh lo,” a ti.
25 Cule Araunah cu sui tangka fai zaruk a pek.
26 Cutawkah Bawipa ih hrangah biakòheng a dawl ih mei-ur thawinak le remawk thawinak a pek. Thla a cam ih Bawipa in a theih sak ruangah van ihsin meisa a run thlak ih biakòheng parih a pekmi thawinak pawl cu a kang òheh.
27 Bawipa in vancungmi cu a namsau retsal dingin thu a pe ih a retsal.
28 Cumi cu David in a hmuh tikah Bawipa in ka thlacamnak i theih sak a si, ti a thei ih Araunah fang cilnak hmunih a dawlmi biakòheng parah cun thawinak a tuah.
29 Bawipa ih umnak Puanthlam, Moses in ramòhing ih a sakmi le thawinak pawl an urnak biakòheng cu cuih caan ah Pathian an biaknak hmun Gibeon ah a um laifang a si.
30 Asinan David cu Bawipa bia dingah cutawkah cun a feh ngam lo; ziangahtile Bawipa ih vancungmi ih namsaupi cu a òih tata.