11
David Cu Judah Le Israel Siangpahrang A Cang
(2 Sam 5:1-5)
1 Israel mi pawl cu an zate in David umnak Hebron ah an ra ih, “Kannih cu na thi le na sa kan si.
2 A fehzo mi tikcu caan, Saul kan siangpahrang a si lai hmanah Israel mi pawl cu raldonak ah na hruai ih cutiih hruai dingah le anmah uktu si dingah Bawipa na Pathian in thu a lo tiam zo a si,” tiah an ti.
3 Cuticun David hnenah Israel mi hotu pawl cu Hebron ahcun an ra òheh. Cule Bawipa ih mithmuh ah David thawn thukamnak an tuah ih Samuel hnenin Bawipa ih thutiam vekin David cu Israel siangpahrang ah hriak an culh a si.
4 Cun siangpahrang David le Israel mi pawl cu an zate in an feh ih Jerusalem khuapi an do. Jerusalem khuapi cu culai ahcun Jebus an ti; a rak um hmaisabik Jebus mi pawl cu cutawkah an um lai.Ref 11:4 Jos 15:63; Thuò 1:21;
5 Jebus mi pawl in David cu, “Kan khuapi sungah cun na lut thei dah lo ding,” an ti. Asinan Zion ih an ralhruang cu David in a lak ih an khuapi cu “David Khuapi,” ah a cang.
6 David in, “Jebus mi a that hmaisabiktu cu ka ralkap hotu bawi a si ding,” a ti. Zeruiah fapa Joab ho in an do ih amah cu ralkap hotu bawi ah a cang ngaingai.
7 Ralhruang sungah David cu a feh ih a umta ruangah, “David Khuapi,” tiah an ko tata.
8 Cuih ralhruang ih nisuahnak lam Millo an tinak hmunih thokin khuapi kimvel ralhruang cu David in a rem ih khuapi sung cu Joab in a rem.
9 A hnenih Ziangkimtithei Bawipa a um ruangah David cu ni khat hnu ni khat a cak deuhdeuh.
David Ih Ralkap Hminthang Pawl
(2 Sam 23:8-39)
10 David ih ralkap hminthang pawl cu a tanglam pawl hi an si. Anmah in Israel midang pawl thawn siangpahrang cang dingah David cu an bawm ih, Bawipa ih thutiam vekin, a uknak cu cak sinsin in an tuah.
11 Hmaisabik cu Hakmon hrin Jashobeam a si ih amah cu, “Ralòha Pathum,”n 11:11 Ralòha Pathum: 2 Sam 23:8 tla ah Ralòha Pathum ti in a um. Asinan Hebru Ca Thianghlim sungah cun Sawmthum ti in a um. lakah hotu a si. Jashobeam in an ral minung zathum kha a feipi thawn a do ih òum khat ah an zate in a that òheh.
12 Hi “Ralòha Pathum Pawl,” lakih a pahnihnak cu Ahoh hrin Dodo ih fapa Eleazar a si.
13 Pas Dammim an timi hmunah Filistin ral pawl cu David thawn an do. Barli sangvut lo sungah òanhmun khuar ih Israel ralkap pawl an tlan rero lai ah,
14 Eleazar le a ralkap pawl cu lo sungah cun an òang ih Filistin pawl cu an do ciamco. Bawipa ih thawngin an ral cu nasa zet in an neh.
15 Veikhat ah Filistin ral pawl cu Refaim phairawn ih an um lai ah, an hmin a thang zetmi Israel ralbawi sawmthum sungin pathum cu Adullam lungpuk kiang lungto lakih David a um lai ah a hnenah an feh.
16 David cu ralhruang kulhmi tlang parah a um ih culai ah Bethlehem cu Filistin mi pawl in an lak zo.
17 Cutikah David cu inn a ngai ngaingai ih, “Aw, Bethlehem kotka kiang tikhur ih tidai kha in dingah pakhatkhat in i pe hai sehla ka va duh so e!” tiah a ti.
18 Curuangah ralkap hminthang pathum cu an feh ih Filistin ralkap pawl umnak lakin an nor suak ih cuih tikhur ihsin tidai an khai ih David cu an ra pek. Sikhalsehla David cun a in lo; Bawipa ih hnenah hlanmi tidai ah tiah a thlet ih,
19 “Ziangtinso hi tidai cu ka in thei ding! An nunnak hman ruat lo ih an khaimi tidai a si hrangah hi tidai in cu an thisen in vek a si ding,” a ti. Curuangah cuih tidai cu a in lo. Ralkap hminthang Pathum Pawl ih hnaòuan òha pawl lakah himi cu pakhat a si.
20 Cun Joab unau Abishai cu “Hminthang Sawmthum Pawl,” lakah mi hminthang a si. A feipi thawn minung zathum a do ih a that òheh. Cutiin hminthang sawmthum lakah hminthang a si.
21 Sawmthum Pawl lakih hminthang bik a si ruangah an hotu ah a cang; asinain “Ralòha Pathum,” tluk cun a hmin a thang lo.
22 Kabzeel khua mi Jehoiada fapa Benaiah cu ralkap hminthang zet a si. Ralòha zet ih a hnaòuan mi tampi a um; Moab ralbawi cak zetzet pahnih tla a that. Veikhat cu vur tampi a tlak ni ah kuahrum sungah a vung òum ih kiosa a that.
23 Cule mitum zet le misang zet: Pi sarih le a hrek a saangih feipi thiamtleeng tia a kengtu Izipt mipa khal a that. Benaiah cun talhtum thawn a zon ih Izipt pa kut ih feipi rori long tahrat in cupa thahnak ah a hmang.
24 Cumi pawl cu Benaiah ralòha zet ih hnaòuannak pawl an si; amah cu, “Sawmthum Pawl,” lakah pakhat a si ve.
25 “Sawmthum Pawl,” lakah cun hminthang pakhat a si; asinain “Pathum Pawl,” cu a tluk lo. David in amah kilvengtu pawl hotu ah a ret.
26-47 A tanglam pawl hi ralkap hminthang an si:
Joab unau Asahel
Bethlehem ihsin
Dodo ih fapa Elhanan
Harod ihsin Shammoth
Pelet ihsin Helez
Tekoa ihsin Ikkesh ih fapa Ira
Anathoth ihsin Abiezer
Hushah ihsin Sibbekai
Ahoh ihsin Ilai
Netofah ihsin Maharai
Netofah ihsin Baanah ih fapa Heled
Benjamin ram Gibeah ihsin
Ribai ih fapa Ithai
Pirathon ihsin Benaiah
Gaash kiang hmunrawn ihsin Hurai
Arbah ihsin Abiel
Bahurum ihsin Azmaveth
Shaalbon ihsin Eliahba
Gizon ihsin Hashem
Harar ihsin Shagee ih fapa Jonathan
Harar ihsin Sakhar ih fapa Ahiam
Ur ih fapa Elifal
Mekherah ihsin Hefer
Pelon ihsin Ahijah
Karmel ihsin Hezro
Ezbai ih fapa Naarai
Nathan unau Joel
Hagrit ih fapa Mibhar
Ammon ihsin Zelek
Beeroth ihsin Naharai.
Naharai cu Joab hriamnam
phurtu a si.
Jattir ihsin Ira le Gareb
Hit mi Uriah
Ahlai ih fapa Zabad
Shiza ih fapa Adina.
Adina cu Reuben hrin sungah
hminthang a si ih ralkap sawmthum
a neitu a si.
Maakah ih fapa Hanan
Mithan ihsin Joshafat
Ashterah ihsin Uzzia
Aroer ihsin Hotham ih fapa
Shamma le Jeiel
Tiz ihsin Shimri ih fapa Jediael le Joha
Mahavah ihsin Eliel
Elnaam ih fapa Jeribai le Joshaviah
Moab ihsin Ithmah
Zobah ihsin Eliel, Obed le Jaasiel.