THUFIM
(Proverbs)
Thuhmaihruai
Thufim cabu hi biaknak lam le nuncan ziaza lam zirhawknak finkhawm in phungthluk le òongòhimnak pawl an nganmi a si. A tam bik cu nitin nunnak ih kan hmanmi an si. “Fimthiamnak nei thei dingin Bawipa upat aw,” timi thawn thuforh a thok ih biaknak lamih nuncan ziaza òha neih ding lawng hman si lo in mah le mah theih awk ding le umtu ziaza ralrin ding ti tiang a sim. A dikmi òongòhimnak tawitete pawl tla hin hlanlai Israel zirhtu pawl kha thu pakhatkhat a um tikah mifim cun ziangtin a ti ding tithu a langter. Hi thu hrekkhat pawl cu innsang thawn a peh aw mi le a dang cu sumsaw lam thu ah a si, a hrek cu misenpi lakih um tikah ziangtiih um ding, tile ziangtiih um tikah a mawi tithu tla an si. A hrek cu mah le mah sup awk a òulnak thu tla an si. Tangdornak lungput, thinsaunak le mifarah upatnak le mah ih rualpi òha parih zum tlak ih um a òhat daan khal tampi a sim.
1
Thufim Sunlawinak
1 David fapa, Israel siangpahrang,Ref 1.1 2 Siang 4:32;
Solomon ih thufim tla:
2 Fimnak, ruahnak òha le
thudik simmi theih theinak
na neih theinak dingah
a lo bawm theitu ding
thufim a um a si.
3 Cuih thufim cun
umtlan thiamnak le dingnak,
Fimkhur zet le tlaitluang zet ih
nun theinak a lo zirh ding.
4 Ruahnak mal pawl kha
a fimter thei ih,
Mino pawl kha theihthiamnak le
ruahthiamnak a pek.
5 Hi thufim in mifim pawl kha
an fimnak a karhter dingih,
Mithiam pawl khal
lam a hruai ding a si.
6 Curuangah mifim pawl ih
an suahpi mi thufim
simfiangnak thukzet pawl le,
Thu harsa pawl kha an thei suak ding.
Mino Pawl Ruahnak Pekmi
7 Pathian òihzah cu fimnak ih
hramthoknak a si,
Mi-aa pawl in fimnak le zirnak kha
ziang an siar lo.Ref 1.7 Job 28:28; Saam 111:10; Thuf 9:10;
8 Ka fapa, na nu le na pa ih
simmi thu kha òha tein ngai aw.
9 An lo zirhmi thu in
na nuncan ziaza a òhatter dingih
na lu hrangah lupawng mawi zet le,
na hngawng hrangah
òhi mawi an si ding.
10 Ka fapa, misual pawl in
an lo lemsiah tikah lung aw hlah.
11 Annih in, “Ra awla mi pakhat tal
that dingah hawl uh si,
Sualnak a nei lotu pawl kha
bawh thup uh si!
12 Mithi khua in mi a dolh bangin
an nungcung in dolh uh si,
Sualnak an nei lo nain khur sungih
a vung tla bangtuk si hai seh.
13 Thilri mankhung pawl kha
kan lak dingih,
Kan inn pawl kha thilri
mankhung thawn khatter uh si!
14 Kan hnenah ra tel ve awla,
kan firmi pawl kan lo zem ve ding,”
tiah an lo ti tikah,
15 Ka fapa, cuvek mi pawl hnenah
feh aw hlah,
An lamzin kha va hrial aw.
16 Thil òha lo tuah ding ahcun
an zam a rang ih,
Mi that dingah an ralring cia ringring.
17 Vate hmuh cingih suurthang kam cu
zianghman a òhahnem lo ding.
18 Asinan hivek miòha lo pawl in
anmah le anmah
thang an kam aw ih,
Cuih thangkammi sungah cun
an awk that aw leh ding.
19 Neh lon ih mi thil a longtu pawl cun
cubangtuk in thihnak
an hawlh aw òheu.
Fimnak Ih Kawhnak
20 Ngai hnik uh! Lamzinpi le
thil zuarnak hmun ihsin
fimnak au aw cu!
21 Khuapi kotka le mi tonkhawmnak
hmun ihsin napi in a au.Ref 1.20, 21 Thuf 8:1-3;
22 Mi-aa pawl, ziangtik tiang so
nan at hrih ding?
Ziangtik tiang so fimnak hmuhsuam hi
nuam nan ti dingih,
Fimnak hi nan huat hrih ding?
23 Nun ka lo sim lai ah
òha tein ngai uh,
Ruahnak òha ka lo pe dingih,
ka fimnak kha ka lo seu ve ding a si.
24 Ka hnenah ra dingin ka lo ko nain
nan ra duh lo;
Ka kut ka lo zaap ih nan ngaisang lo.
25 Ruahnak òha ka lo pekmi pawl tla
ziangsiar lo in nan um ih,
Nan nuncan ziaza remsak ding khal
nan duh lo.
26 Curuangah harsatnak nan ton tikah
ka lo hnihsan dingih
òihnung rapthlak in
a lo tlunhnawh tikah
ka hni thup ding.
27 Harsatnak cu thlisia bangin
a ra thlen tik le,
òihnungza in phusing bangin
a lo nuai tikah,
Vansang le thinlung rethei in
na um ding.
28 Cutikah cun in ko ding,
Asinan ka lo sawn lo ding;
Hmunkip ah in hawl ding nain
in tong lo ding.
29 Thutheihnak cu nan hua ih,
Bawipa òihzah cu nan hril lo a si.
30 Ruahnak ka lo pekmi pawl tla
nan duh lo ih,
Nun ka lo sim tikah
nan ngai duh fawn lo.
31 Curuangah nanmah ih
òuanmi vekin nan ngah leh ding,
Nan tuahmi pawl in
natnak a lo pe ding a si.
32 Ruahnak mal deuh pawl in
fimnak an hnon ruangah an thi,
Mi-aa pawl cu an daithlannak in
a siatsuah a si.
33 Asinan ka thu a ngaitu pawl cu
an him dingih,
òihphannak zianghman an nei lo ding.