5
Mithiangfai Lo Pawl
Bawipa in Moses hnenah, “Israel mi pawl in anmah lakih phaarnat a tuarmi le a thihnai a dokmi le miruak a dai ruangih a thiangfai lomi hmuahhmuah cu an riahnak hmun ihsin an dawi thluh pei. An hnenih ka umnak an riahnak hmun cu an balhter lonak dingah a thiangfai lomi hmuahhmuah cu nunau siseh, mipa siseh, dawi thluh hai seh,” tiah thu a pek. Bawipa ih thupek bangtukin Israel mi pawl cun an thlun ih mi thiangfai lo pawl cu an riahnak ihsin an dawi thluh.
Sual Ruangih Kuansalnak
Bawipa in Moses hnenah a tanglamih daan pawl cu Israel mi pawl hrangah a pek. Mipa siseh, nunau siseh, midang parah sualnak tuah tahrat in Bawipa hmaiah rin tlak lo a si ahcun, a sualnak cu a phuang pei ih a tisual man cu cupa hnenah kim tein a kuan hlei ah zatek kul a bet pei. Sikhalsehla a tuahmawhmi cu a thi ih a kuanmi saangtu dingah sungkhat suahpi zohman a neih lo a si ahcun puithiam ih hman dingah Bawipa ih hnenah a pek pei. Hi pekmi cu sualthlah thawinak hrangih tuucang a pekmi hlei ah betmi a si pei.Ref 5:8 Pui 6:1-7; Cun Israel mi pawl in Bawipa ih hnenah a hleice ih thawinak an pekmi pohpoh cu a rak saangtu puithiam ih ta a si pei. 10 Puithiam poh in a hnenih an pekmi laksawng cu a co pei.
Nupi Parih Lunghrinnak
11  Bawipa in Moses hnenah, 12 a tanglam daan pawl cu Israel mi hrangah a pek. Pasal neimi nunau in mipa dang thawn a sual ih miborhhlawh ah a cang; 13 asinain a sual cu phuang lo in a thup ringring; a sual lai an kai lo ih a hmutu le an um fawn lo nain a pasal cun zum lonak a nei ih a nupi parah a lung a hring ringring. 14 Culole a nupi cun sualnak zianghman a tuah lo nain a pasal in a zum lo. A nupi a thiik ruangih zum lo men a rak si. 15 Ziangziang a si khalle hibangtuk ih thu a um ahcun a pasal in a nupi cu puithiam hnenah a fehpi pei. Thlairawl thawinak hrangih a òulmi barli sangvut cuai hrek a keng pei ih thawinak a pek pei. Asinan olif siti le frankincense rimhmui cu a toih lo pei. Ziangahtile himi cu lunghringtu a pasal in thudik theih duh ruangih a pekmi thawinak a si.
16 Puithiam in cuih nunaunu cu biakòheng hmaiah a suahpi pei ih Bawipa ih hmai ahcun a dingter pei. 17 Cun puithiam in tlak beel pakhat a lak pei ih a sungah tidai thiangfai tawkfang a ret pei; cule Bawipa umnak Puanthlam sungih leivut a lak pei ih, tidai cu khaa dingin, tidai ah a phulh pei. 18 Cuih hnuah puithiam in nunaunu ih samtom a phoih pei ih nunaunu ih kut sungah thawinak sangvut a ret pei. Amah puithiam in siatserhnak thlentertu tidai cu a beel in a keng pei. 19 Cule puithiam in nunaunu cu, “Mipa dang thawn na sual lo a si ahcun siatserhnak a thlentu hi tidai in lo siatsuah hlah seh. 20 Asinan pasal nei cingin mipa dang thawn nan sual ngaingai a si ahcun, 21  Bawipa in na hmin cu na miphun lakih midang camsiatnak ah hmang seh. Bawipa in na pumpi thlingter sehla na zahmawh carter seh. 22 Hi tidai cu na pum sungah lut in na pumpi cu thlingter ciamco sehla na zahmawh khal carter thluh seh,” tiah siatserhnak a tuahter pei.
Cutikah nunaunu cun, “Si hram seh, Amen,” tiah a sawn pei.
23 Cun cuih siatserhnak cu puithiam in a ngan pei ih a nganmi cu beel sungih thlalet cammi siatti sungah cun a tleuh pei. 24 Tidai cu nunaunu ih pum sungih natnak besia suakter dingin a inter hlanah, 25 puithiam in nunaunu kut sungih a ummi thlairawl thawinak sangvut cu a lak pei ih Bawipa ih hnenah a hun thlir hnuah biakòheng parah a ret pei. 26 Cun thawinak ih pekmi a si, ti langternak ah sangvut cu zatekhat a lak pei ih biakòheng parah a ur pei. Cule netabik ah tidai cu nunaunu a inter pei. 27 Mipa dang thawn an sual ngaingai asile tidai cun a pum a natter dingih a pumpi a òhang vivo dingih a zahmawh khal a car vivo ding. A hmin cu a miphun lakah siatserhmi a si pei. 28 Sikhalsehla a sual lo a si ahcun siatsuahnak a tong lo pei ih fa khal a nei thei ding.
29 Hi daan cu mipa pakhat in a thuneihnak thuaiih a ummi a nupi a thiik ih mipa dang thawn an sual ruangah zum lonak a neih tikah thlun dingmi daan a si. 30 Culole a nupi a thiik men ruangih zum lonak a neih ruangah a si khalle thlun dingmi daan a si. Cutiin biakòheng hmaiah nunaunu cu a dinter pei ih puithiam in hi thawinak cu a tuah pei. 31 A pasal cu mawh a phur lo pei; asinain a nupi cu a sual a si ahcun sualman a tuar pei.