28
A Tikcu Caan Ih Thawinak Pekmi Pawl
(Suah 29:38-46)
1-2 Israel mi pawl in rimthaw mi rawlhun thawinak pawl Bawipa ih hnenah a tikcu kim tikih an pek dingah sim dingin Bawipa in Moses hnenah thu a pek.
3 Bawipa ih hnenah rawlhun thawinak nan pek dingmi pawl cu hihi an si: Nitin mei-ur thawinak hrangah raitluanmi kum khat ti tuucangte pahnih;
4 tuucangte pakhat cu zinglam ah, a dang pakhat cu zanlam ah, nan pek pei.
5 Cumi thawinak thawn hmunkhat ah fanghun thawinak tla nan pek pei ih olif siti òha bik khuat khat thawn rawimi sangphut reltan a si ding.
6 Bawipa ih hnenah rimthaw thawinak pekmi a si ih Sinai Tlang parih hmaisabik nan rak thawi bangtukin hi thawinak cu nitin tein meisa urmi thawinak a si.
7 Cumi pakhatnak tuucangte pekmi thawn inmi thawinak khal nan pek pei ih sabit khuat khat biakòheng ah nan toih pei.
8 Zinglam thawinak nan pekmi bangtukin pahnihnak tuucangte cu zanlam ah nan pek pei ih inmi thawinak khal nan pek pei. Himi cu rawlhun thawinak a si ih Bawipa ih hrangah rimthaw a si.
Sabbath Ni Thawinak
9 Sabbath ni ah kum khat ti raitluan tuucangte pahnih, thlairawl thawinak hrangah olif siti thawn rawimi sangphut reel khat cu inmi thawinak thawn nan pek pei.
10 Hi mei-ur thawinak cu nitin tein pekmi fanghun thawinak le inmi thawinak hlei ah Sabbath nitin pekmi thawinak a si pei.Ref 28:9, 10 Mat 12:5;
Thlatin Ni Hmaisabik Ah Thawinak
11 Thlatin ni hmaisabik ah Bawipa ih hnenah a tanglam pawl cu nan pek pei: Cawcangte pahnih, tuucang pakhat, kum khat ti tuucangte pasarih, an zate in raitluan an si pei.
12 Cuih tlunah olif siti thawn rawimi thlairawl thawinak, cawcang pakhat ah sangphut reel khat le a tan, tuucang pakhat ah sangphut reel khat thawn,
13 kum khat ti tuucangte pakhat ah sangphut reel tan thawn nan pek pei. Hi mei-ur thawinak pawl cu rawlhun thawinak an si ih Bawipa ih hrangah rimthaw an si.
14 Fel zet ih inmi thawinak pekmi a si ahcun cawcang pakhat ah sabit khuat hnih, tuucang pakhat ah khuat khat le a hrek, kum khat ti tuucangte pakhat ah khuat khat nan pek pei. Kum khat sung thlatin ni hmaisabik ih mei-ur thawinak pek tikah thlun ding daan an si.
15 Cun nitin mei-ur thawinak ah sabitti an telh ih hlei ah sualthlah thawinak hrangah mecang pakhat pek a si pei.
Thilnu Rawi Lo Puai Ih Thawinak
(Pui 23:5-14)
16 Bawipa ih upat cawimawinak ih tuahmi Lantak Puai cu thla hmaisabik ni hleili ni ah tuah a si pei.Ref 28:16 Suah 12:1-13; Daan 16:1, 2;
17 Ni hleinga ni ihsin biaknak puai a thok pei ih ni sarih sung a si pei. Cuih sung hmuahhmuah cu thilnu tel lo sang nan ei pei.
18 Puai ni hmaisabik ni ahcun ziang hnaòuan hman nan òuan lo pei. Pathian biak dingah nan pumkhawm sawn pei.
19 Mei-ur thawinak pek uhla cumi cu Bawipa ih hnenah pekmi rawlhun thawinak a si pei: Cawcangte pahnih, tuucang pakhat, kum khat ti tuucangte pasarih, an zate in raitluan nan pek pei.
20 Fanghun thawinak fel tein tuah uhla olif siti thawn rawi uh; cawcang pakhat ah sangphut reel khat le a tan, tuucang pakhat ah reel khat,
21 tuucangte pakhat ah reeltan a si pei.
22 Cuih tlunah sualthlah thawinak hrangah mecang pakhat nan pek pei ih cuticun misenpi thianhlimnak hrangah mawhnak thawinak cu tuah a si pei.
23 Himi cu nitin tein tuahmi mei-ur thawinak hlei ah nan pek pei.
24 Cubangtuk òhiamòhiam in ni sarih sung Bawipa ih hnenah rawlhun thawinak, a hrangih rimthaw mi cu nan pek pei. Himi cu nitin tein nan pekmi mei-ur thawinak le inmi thawinak hlei ah nan pek pei.
25 Ni sarih ni ah a thianghlim mi pumkhawmnak nan nei pei ih zianghman nan òuan lo pei.Ref 28:17-25 Suah 12:14-20; 23:15; 34:18; Daan 16:3-8;
Rawllak Puai Ih Thawinak
(Pui 23:15-22)
26 Nan Rawllak Puai ni hmaisabik Bawipa ih hnenah fangthar nan pek tikah Pathian biak dingah nan pumkhawm pei ih zianghman hna nan òuan lo pei.
27 Bawipa hrangah rimthaw, mei-ur thawinak nan pek pei ih, cawcang pahnih, tuucang pakhat, le kum khat ti tuucangte pasarih, an zate in raitluan an si pei.
28 Cumi thawn olif siti rawimi, felteih tuahmi thlairawl thawinak nan pek pei ih cawcang pakhat ah sangphut reel khat le a tan, tuucang pakhat ah reel khat le,
29 kum khat ti tuucangte pakhat ah reel tan a si pei.
30 Cuih tlunah sualthlah thawinak ah mecang pakhat nan pek pei ih cuticun misenpi thianhlimnak hrangih sualthlah thiannak cu nan tuah pei.
31 Hi thawinak pawl le inmi thawinak cu nitin nan tuahmi mei-ur thawinak le thlairawl thawinak hlei ah nan pek pei.Ref 28:26-31 Suah 23:16; 34:22; Daan 16:9-12;