2
An Hrin Ciar In An Um
1 Bawipa Pathian in Moses le Aaron hnenah a tanglam bangtukin thu a pe,
2 “Israel mi pawl in an riahbuk an sak tikah zozo khal anmah ih hrin ciar hnenah le anmah ih thantar hnuai ciar ah an um pei. An riahbuk cu Bawipa ih umnak Puanthlam ih kimvel ah an sak pei,” a ti.
3-9 Nisuahnak lamah Judah ih thantar hnuai ah a tanglam bangtukin anmah ih hotu ciar thawn a bur a bur in an um pei:
Judah hrin ah Amminadab fapa Nahshon ho in thawng sawmsarih thawngli le zaruk an si;
Issakhar hrin ah Zuar fapa Nethanel ho in thawng sawmnga thawngli le zali an si;
Zebulun hrin ah Helon fapa Eliab ho in thawng sawmnga thawngsarih le zali an si;
An zate komah thawng zakhat thawng sawmriat thawngruk le zali an ti.
Judah thantar hnuai ih ummi pawl cu hmaisabik ah an feh pei.
10-16 Thlanglamah Reuben ih thantar hnuai ah a tanglam bangtukin anmah ih hotu ciar thawn a bur a bur in an um pei:
Reuben hrin ah Shedeur fapa Elizur ho in thawng sawmli thawngruk le zanga an si;
Simeon hrin ah Zurishaddai fapa Shelumiel ho in thawng sawmnga thawngkua le zathum an si;
Gad hrin ah Deuel fapa Eliasaf ho in thawng sawmli thawngnga zaruk le sawmnga an si.
An zate komah thawng zakhat thawng sawmnga thawngkhat zali le sawmnga an si.
Reuben ih thantar thuaiih ummi pawl cu a pahnihnak ah an feh pei.
17 Cule a hmaisa burhnih le a dungih burhnih karlak ah Puanthlam a phurtu Levi mi pawl an feh pei. Cuih a bur a bur in a fehtu Israel mi pawl cu anmah ih thantar hnuai ciar ah an riahnak ih an umdan vek thotho in an feh pei.
18-24 Nitlaknak lamah Efraim ih thantar hnuai ah a tanglam bangtukin anmah ih hotu ciar thawn a bur a bur in an um pei:
Efraim hrin ah Ammihud fapa Elishama ho in thawng sawmli le zanga an si;
Manasseh hrin ah Pedahzur fapa Gamaliel ho in thawng sawmthum thawnghnih le zahnih an si;
Benjamin hrin ah Gideoni fapa Abidan ho in thawng sawmthum thawngnga le zali an si;
An zate komah thawng zakhat thawngriat le zakhat an si;
Efraim thantar thuaiih a ummi pawl cu a pathumnak ah an feh pei.
25-31 Saklam ah Dan ih thantar hnuai ah a tanglam bangtukin anmah ih hotu ciar thawn a bur a bur in an um pei:
Dan hrin ah Ammishaddai fapa Ahiezer ho in thawng sawmruk thawnghnih le zasarih an si;
Asher hrin ah Okhran fapa Pagiel ho in thawng sawmli thawngkhat le zanga an si;
Naftali hrin ah Enan fapa Ahira ho in thawng sawmnga thawngthum le zali an si;
An zate komah thawng zakhat thawng sawmnga thawngsarih le zaruk an si.
Dan ih thantar hnuai ummi pawl cu netabik ah an feh pei.
32 A bur a bur ih an homi Israel mi pawl cu an zate komah thawng zaruk thawngthum zanga le sawmnga an si.
33 Asinan Moses hnenih Bawipa ih thupek bangtukin Israel mi pawl lakah Levi hrin pawl cu siar cih an si lo.
34 Bawipa in Moses hnenih thu a pekmi bangtuk cun Israel mi pawl in an tuah thluh. An riah tikah anmah ih thantar hnuai ciar ah an riak ih an feh tik khalah anmah ih hrin ciarin an feh.