13
Thlingthlatu Pawl
(Daan 1:19-33)
1 Bawipa in Moses hnenah,
2 “Israel miphun hleihnih sungin phunkhat ah hruaitu pakhat ciar hril awla ka pek hai dingmi Kanaan ram zoh dingah le thlingthla dingah thlah aw,” a ti.
3 Bawipa ih thupek vekin Moses cun a tuah ih a tanglam Israel mi lakih hruaitu pawl cu an riahhmun Paran in a thlah hai:
4 Reuben hrin in Zakkur ih fapa Shammua,
5 Simeon hrin in Hori ih fapa Shafat,
6 Judah hrin in Jefunneh ih fapa Kaleb,
7 Issakhar hrin in Josef ih fapa Igal,
8 Efraim hrin in Nun ih fapa Hoshea,
9 Benjamin hrin in Rafu ih fapa Palti,
10 Zebulun hrin in Sodi ih fapa Gaddiel,
11 Manasseh hrin in Susi ih fapa Gaddi,
12 Dan hrin in Gemalli ih fapa Ammiel,
13 Asher hrin in Mikhael ih fapa Sethur,
14 Naftali hrin in Vofsi ih fapa Nahbi, le
15 Gad hrin in Makhi ih fapa Geuel, pawl an si.
16 Hi pawl cu Moses in Kanaan ram zoh dingih a thlahmi an si. Nun fapa ih hmin Hoshea cu Joshua ah Moses in a thleng sak.
17 Cutiin Moses ih a thlah tikah an hnenah, “Kanaan ramsung thlanglam ah hung feh uhla, cuih hnuah an tlangram ah hung feh uh.
18 An ram cu ziangbangtuk ram a si, minung ziangzat an um, a ummi pawl cu micak an si maw si lo, ti pawl òha tein nan zingzoi pei.
19 An ram cu ramòha a si maw si lo, ti le mi pawl cu khuate ah maw ralhruang kulhmi khuapi ah so an um, ti pawl;
20 cule an ram cu a leilung a òha maw, cun tupi teh a um maw, asilole lenkolh a tam maw, ti pawl òha tein nan zoh pei. Cun an ram ih a rahmi thingrah hrekkhat cu nan run keng tengteng pei,” tiah thu a cah. Cuih tikcu cu sabit rah hmin tikcu a si.
21 Israel hruaitu pawl cu an feh ih Kanaan ram cu an hung zoh. An ram thlanglam ih a ummi Zin timi nelrawn ihsin saklam ih Hamath Tlangkawn kiangih Rehob tiang an feh.
22 Cuih sin an feh lala ih Anakim timi mitum zetzet pawl ih cithlah Ahiman, Sheshai le Talmai pawl ih sungkhat pawl an umnak Hebron khua an thleng. Hebron cu Izipt ram ih Zoan khua an tlak hlan kum sarih ih tlakmi a si.
23 Cule Eshkhol Phairawn an thleng ih cutawkah bawr khat a rahmi sabit cu a hnge in an tan ih a rih zet ruangah minung pahnih in fung in an zawn. Taleti le thei khal an lo ih an phur.
24 Cutawk hmun cu Israel hruaitu pawl ih sabit bawr khat an sahnak a si ruangah Eshkhole 13:24 Eskhol: ti cu Hebru òong a si ih Sabit bawr tican a si. Phairawn tiah hmin an sak.
25 Kanaan ram cu ni sawmli sung an zoh hnuah,
26 Moses le Aaron le Israel misenpi rak umnak Paran nelrawn ih an riahnak hmun Kadesh ahcun an ra thleng. An hmuhmi hmuahhmuah cu an sim ih an rak phurhmi thingrah pawl cu an hmuh.
27 Moses hnenah, “Zoh dingih in thlahmi ram cu kan va zoh ih cawhnawi le khuaitizu in a khatmi ram a si. Thingrah pawl tla hinah kan rak keng.
28 Asinan cutawkih a ummi pawl cu micak zet an si. An khuapi tla cu an tum zetzet ih ralhruang ih kulhmi fekfek an si. Cuih tlunah mikei vekih mitum zetzet pawl tla kan hmu.
29 Amalek mi pawl cu an ram thlanglam ah an um. Hit mi, Jebus mi le Amor mi pawl cu tlangpar ram ah an um ih Kanaan mi pawl cu Mediterranean Tifinriat kiangah le Jordan Tiva kap tluanah an um,” tiah an ti.
30 Cule Moses hmaiah misenpi pawl cu an phunzai ciamco. Cutikah Kaleb in dai ko in a tuah hnuah, “Cumi pawl cu atu rori ah kan do pei ih an ram cu kan lak mai ding. Anmah neh ding ahcun kan cak zet pam a si,” tiah a ti.
31 Sikhalsehla Kaleb thawn a feh vemi Israel hruaitu pawl cun, “Si hlah ee, annih do dingah kan cak lamlam lo; kannih hnakin an cak deuh ngaingai a si,” an ti.
32 Cutiin an va zohmi ram thu cu Israel misenpi hnenah thinnau dingin a dik lo zawng in an sim. Annih in, “Kan hung thlingthlakmi ram cu an ramsung minung pawl hman a dolhthluhtu ram a si.
33 Kan hmuhmi minung hmuahhmuah cu mitum le misang zetzet an si ih Anak ih tesinfa pawl tla cu mikei an si ko. Kannih tla cu an hnen ahcun kharbok tluk fang kan si ih annih ih in hmuhnak khalah cu thotho kan si ko ding,” tiah an ti.Ref 13:33 Sem 6:4;