2
Nehemiah Jerusalem Ah A Feh
1 Siangpahrang Artakzaksis in siangpahrang a òuannak kum kulnak kum, Nisan thla ah, veikhat cu siangpahrang bawipa rawl a ei lai ah sabitti cu ka pek. Hi hlan ahcun mithmaisia ih ka um i hmu dah lo.
2 Curuangah, “Ziangahso na riah a siat? Na dam lo a si lo ahcun na lung a dam lo a si hi!” tiah i ti.
Cutikah ka thin a phangzet ih,
3 “Maw Siangpahrang bawipa, na nunkhua sau hram seh. Ka pupa pawl an phumawknak khuapi siatbal thluh in le a kotka pawl ur ciam thluh ih a um lai ahhin ziangtinso riahsia lo cun ka um thei ding?” tiah ka ti.Ref 2:3 2 Siang 25:8-10; 2 San 36:19; Jer 52:12-14;
4 Siangpahrang bawipa cun, “Ziang tuah so na duh?” tiah i sut.
Cutikah Van ih Pathian hnenah thla ka cam hnuah,
5 siangpahrang hnen ahcun, “Maw siangpahrang bawipa, ka parah na lung a awi ih ka lo dilmi i pe ding a si ahcun Judah ram, ka pupa pawl an rak phumawknak khuapi ah i thlah hram aw; cuih khuapi dinsal ka duh a si,” tiah ka ti.
6 Siangpahrang bawinu cu a kiangah a to ih siangpahrang bawipa cun, “Ziang can so na rei ding? Ziangtikah so na rakirsal thei ding?” tiah i sut. Ka rei ding can cu ka sim ih thlah dingah a lung a kim.
7 Cule siangpahrang hnen ahcun, “Bawipa, na lung a kim a si ahcun Judah ram tiang ka feh suak theinak dingah Eufrates Nitlaknak lam pengih ram uktu Mangki bawi pawl hnenah ca i ngan sak hram aw. Judah ram ka thlen hlan lo anmah in tluang tein in fehter ding.
8 Cun siangpahrang ih tupi thing pawl kiltu Asaf hnen ihsin Biakinn hauhruang kotka hrang, khuapi kulhnak phar hrang le ka umnak inn hrangah zanthing i pek theinak dingin a hnenah ca i ngan sak hram aw,” tiah ka dil. Mi zangfahnak neitu Pathian kut cu ka hnenih a um ruangah, ka dilmi hmuahhmuah cu siangpahrang bawipa in i pek òheh a si.
9 Siangpahrang bawipa in keimah thlahtu ah ralbawi hrekkhat pawl le rang ralkap pawl a fial ih Eufrates Nitlaknak ram lam ahcun ka feh. Ka thlen tikah cuih peng uktu Mangki bawi pawl hnenah siangpahrang bawipa ih ca cu ka pek.
10 Asinan Beth Horon khuami Sanballat le Ammon mi bawi pakhat Tobiah in, Israel mi pawl òhatnak le thawvennak ngaihtuah dingah mi pakhat a ra, ti an theih cun thin nuam lo zet in an um.
11 Cun Jerusalem khuapi ah ka va thleng ih ni thum sung ka cawl.
12 Jerusalem hrang hnaòuan dingah Pathian in ka thinlung sungih i simmi cu zohman ka sim lo. Cule zan ah ka tho ih ka rualpi mi malte thawn kan feh. Zianghman kan keng lo; ka tomi rang pakhat lawng kan keng.
13 Nitlaknak lam Phairawn Kotka in ka suak ih thlanglam ah suk in Rulhreng Cerhti ka lan ih Hnawm Kotka ka thlen ah zan a si lai. Ka feh phah ah khuapi kulhnak phar pawl a siatmi pawl le mei ih an ur thluhmi kotka pawl cu ka zoh phah vivo.
14 Cun ka so ih Cerhti Kotka le Siangpahrang Tili ka thleng. Ka tomi rang cun a cimmi lung le thing lakah lamzin a hmu thei lo.
15 Curuangah Kidron phairawn sungah ka òum ih rang par in phar pawl cu ka zoh phah vivo. Ka pawhnak hmun ka thlengsal ih Phairawn Kotka cun khuapi sungah ka lutsal.
16 Bawi pawl pakhat hman in khuitawk ka feh ti le ziang ka tuah, ti an thei lo. Judah mi pawl, puithiam pawl, an hotu pawl, an bawi pawl le hnaòuannak ih a teltu ding pawl pakhat hnen hmanah zianghman ka òong hrih lo.
17 Atu lawngah an hnenah hitiin ka sim: “Jerusalem khua cu a siat thluh ih kotka pawl tla ur thluh a si ruangah ziangtluk vansannak sungah so kan um, ti cu nan hmu. Khuapi kulhnak phardawl cu dinsal uhsila kan thangsiatnak hi rehter uh si,” tiah ka ti.
18 Cule Pathian ka hnenih a um zia le i bomnak pawl ka sim ih siangpahrang bawipa ih òongmi pawl tla ka sim òheh.
Cutikah, “Tho uhsila dinsal uh si,” an ti. An tim an tuah ih hnaòuan cu an thok lohli.
19 Sikhalsehla Sanballat, Tobiah le Arabia mipa Geshem an timi in kan thil tuah tummi cu an theih tikah in hnihsan ih, “Ziang kan tuah, tiah so nan ruah? Siangpahrang kan dodal ding nan ti maw si?” ti tiangin in hmuhsuam.
20 Cule kei in, “Van ih Pathian in hlawhtlinnak in pe ko ding. Kannih cu a siahhlawh kan si ih a siatmi saksal ding cu kan òuan ko ding. Asinan nannih cu Jerusalem ahhin covo nan nei lo; thu nan nei lo ih ham ding zianghman nan nei lo,” ka ti hai.