7
Israel Ih Nuncan Òhat Lo zia
A va poi so! Rilrawng zet in thingkung parah thingrah hawl ih zianghman a ngah lotu le sabit hri parah sabit rah hawl ih a tong lotu ka bang. Theipi rah thawthaw le sabit rah hmuahhmuah cu an rak lo òheh zo. Hi ram sungah hin mifel pakhat hman an um lo; Pathian rinsantu pakhat hman an um lo. Mi thahnak tikcu lawng an bawh. Pakhat le pakhat zuarthlai aw dingin an bawh aw fingfing a si. Thil òha lo tuahnak lam ahcun rin tlak hlir an si. Hotu bawi le thuòhentu pawl in nawhthuh an dil. Thil tithei pacang pawl in an duhmi an sim ih cuticun thil òha lo cu an rel tlang. An lakih miòha bik hman hling vek a si ih mifel bik an timi cu so bangtuk a si.
Profet hmangin Pathian in ralrinnak a sim zo bangin a minung pawl a hremnak tikcu a ra thleng ding. Atu ah an buai celcel zo. Na innhnen khal rinsan hlah; na rualpi khal zum hlah. Na nupi hnenih na òongmi hman ralring aw. Cuvek tikcu ahcun fapa pawl in an pale pawl cu mi-aa ah an ruat dingih, fanu pawl in an nule pawl cu an dodal ding. Mo pawl cu an ni thawn an to aw dingih zozo khal an ral cu anmah ih innsangmi an si ding.Ref 7.6 Mat 10:35, 36; Luk 12:53;
Sikhalsehla kei cun Bawipa ka thlir ding. Thlangamtein i runtu Pathian cu ka hngak dingih amah in i hum ding. Ka Pathian cun ka aw a ngai ding.
Bawipa In Runnak A Ratpi
Kan ral pawl in kan parah direm ding zianghman an nei lo. Kan bah zo, asinain kan thosal ding. Thimnak sungah kan um, asinain Bawipa in tleunak in pe ding. Bawipa ih parah kan sual zo ih tikcu tawkfang sung cu a thinhennak kan tuar ding. Sikhalsehla a netnak ahcun amah in, in òan dingih kan tlunih thil dik lo an tuahmi cu dingnak thawn thu a òhen leh ding. Khawtleu ah amah in, in suahpi dingih in runnak kha kan hmu ding. 10 Cutikah kan ral pawl, “ Bawipa nan Pathian cu khuiahso a si?” tiih in nautat rerotu pawl in an hmu dingih ningzak in an um ding. Kan ral pawl an sung dingih lamzin ah ciarbek bangih pal cih an si kha kan hmu ding.
11 Maw Jerusalem mi pawl, nan khuapi saksalnak tikcu a ra thleng zik thlang. Cuih tikcu caan ah nan ram cu kauhter sinsin a si ding. 12 Nan minung pawl khuazakip in nan hnenah an rakir ding: Nisuahnak lam Assiria ihsin, thlanglam Izipt ram ihsin le lam hlat zet tifinriat le tlang sangpipi ihsin an rakir ding. 13 Asinan cuih leiram pawl cu a parih umtu pawl ih sualnak le òhat lonak ruangah ramòhing ah a cang ding.
Bawipa In Israel A Zangfah
14 Maw Bawipa, na hrilmi na minung pawl hi tuu bangin na kianghrol thawn khal hai aw. An kiangkap ram pawl cu ramòha zetzet an si nain annih ih umnak cu ramòhing a si ih cutawkah anmah lawng an um. Ram òhatnak Bashan le Gilead ah feh hai sehla hlanlaipi ih an rak um bangin khopkham in umsal hai seh.
15 Maw Bawipa, Izipt ram ihsin in suahpi lai caan ih na rak tuah bangin kan hrangah mangbangza tuah hram aw. 16 Miphun dang pawl in cumi cu an hmuh tikah ziangtluk ih micak an si hmanah an ning a zak ding. Beidong in an hmur an hup dingih an hna an phit ding. 17 Leivut lakah rul bangin an vak ding; leilung ih a vakmi cucik kharbok bangin! An ral òannak ralhruang ihsin khur thlohthlo in an ra suak ding. Òihnak thawn Bawipa kan Pathian hnenah an kir ding.
18 Maw Bawipa, nangmah vek Pathian zoso a um! A tangsun na minung pawl cu an sualnak na ngaidam a si. Kumkhua in na thin a heng lo; a hmunmi na duhdawtnak cu an parah na langter ringring. 19 Atu khalah kan parah zangfah lainatnak na neisal ko ding. Kan sualnak cu na ke tangah na pal dingih tifinriat ih tawne ah na hlonhlo ding. 20 Khuahlan lai ah kan pupa Abraham le Jakob hnenih thu na rak kam cia bangin an tesinfa, na minung Israel mi hnen ahcun rinsan tlak na si zia le a hmunmi na duhdawtnak cu na langter ding a si.