3
Remnak Thawinak
1 Mi pakhat in remnak hrangih thawinak tuah dingah a caw a pek asile cawcang asilole cawpi raitluan a si pei.
2 A caw ih lu parah a kut a suang pei ih Bawipa ih umnak Puanthlam ih sangka ahcun a caw cu a that pei. Cule Aaron hrin puithiam pawl in biakòheng ih kap li ah caw thisen cu an theh pei ih,
3 a dang sa pawl cu Bawipa ih hnenah an pek pei: A sungril parih a kopmi thau pawl,
4 a kaileng pawl le a parih ummi thau pawl le a thinhnun parih a ummi thau pawl an si pei.
5 Hi pawl hmuahhmuah cu mei-ur thawinak ih pekmi pawl thawn puithiam pawl in biakòheng parah an ur pei. Hi mei-ur thawinak rim cu Bawipa ih hrangah rimthaw a si.
6 Remnak thawinak hrangah tuu siseh, me siseh, an pek tikah a nu khal a si thei ih a cang khal a si thei; asinain raitluanmi tengteng a si pei.
7 Mi pakhat in tuu a pek a si ahcun,
8 a tuu ih lu parah a kut a suang pei ih Puanthlam ih sangka ah a that pei. A tuu ih thisen cu Aaron hrin puithiam pawl in biakòheng ih kap li ah an theh pei.
9 Cule a hnuailam ih sa pawl cu Bawipa ih hnenah an pek pei: A sungih a ummi a hlap hmuahhmuah, a sungril parih a ummi thau hmuahhmuah,
10 a kaileng pawl le a parih a ummi thau pawl le a thinhnun parih ummi thau hmuahhmuah an si pei.
11 Hi hmuahhmuah Bawipa ih hnenah pekmi pawl cu puithiam in biakòheng parah a ur pei. Himi cu Bawipa ih hnenah mei-ur thawinak ih pekmi rawl a si.
12 Mi pakhat in me a pek asile,
13 a me ih lu parah a kut a suang pei ih Puanthlam ih hmaiah a that pei. Cule puithiam pawl in a thisen cu biakòheng ih kap li ah an theh pei ih,
14 a tanglam ih sa pawl cu Bawipa ih hnenah an pek pei: A sungril parih ummi thau hmuahhmuah,
15 a kaileng pawl le a kaileng parih ummi thau pawl le a thinhnun parih ummi thau hmuahhmuah an si pei.
16 Himi hmuahhmuah cu Bawipa ih hnenah urmi rimthaw si dingah puithiam in biakòheng parah a ur pei. Himi cu Bawipa ih hnenah mei-ur thawinak ih pekmi rawl a si. A thau hmuahhmuah cu Bawipa ih ta a si.
17 A thau siseh, a thisen siseh, Israel mi cun nan ei hrimhrim lo pei; himi cu san khat hnu san khat, khuitawk hmunih nan um khalle nan thlun dingmi daan a si.