2
Thlairawl Thawinak
1 Mi pakhat in Bawipa ih hnenah thlairawl thawinak a tuah tikah hmaisabik ah a fang cu a rial dip thluh pei ih sangphut ah a cang ding. Cuih hnuah olif siti le rimhmui a toih pei ih,
2 Aaron hrin puithiam pawl ih hnenah a keng pei. Rialdip cia mi sangphut cu puithiam in zatekhat in a la pei ih, siti le rimhmui pawl thawn Bawipa ih hnenah pekmi a si, ti langternak ah biakòheng parah a ur pei. Cutiih fang urmi rim cu Bawipa ih hrangah rimthaw a si.
3 A tangmi sangphut cu puithiam pawl ih ta a si. Bawipa ih hnenah pekmi sangphut sung ihsin lakmi a si ruangah a thiangmi a si.
4 Bawipa ih hnenah an pekmi thlairawl thawinak cu rawhnak ih rawh cia mi sangrawh a si ahcun thilnu rawi lomi a si pei. Olif siti thawn rawimi a sah zetmi sang, asilole olif siti hnihmi a paa zetmi sang a si pei.
5 Cun an pekmi sang cu uhkang ih reumi sang a si ahcun olif siti thawn rawimi sangphut ih tuahmi a si pei; thilnu tel lomi thotho a si pei.
6 Bawipa ih hnenah nan pek tikah sangreu cu nan nuai dip thluh pei ih siti nan toih pei.
7 An pekmi cu beelih kanmi sang a si ahcun sangphut le olif sitiih tuahmi a si pei.
8 Bawipa ih hnenah rak keng uhla puithiam hnenah pe uh; cule puithiam in biakòheng ah a fehpi pei.
9 A zate in Bawipa ih hnenah pekmi a si, ti langternak dingah puithiam in sang malte in a la pei ih biakòheng parah a ur pei. Cutiih urmi rawlrim cu Bawipa ih hrangah rimthaw a si.
10 Thlairawl thawinak sung ihsin a tangmi pawl cu Aaron le a fapa pawl ih ta a si; Bawipa ih hnenah pekmi rawl sung ihsin lakmi a si hrangah a thiang zetmi a si.
11 Bawipa ih hnenah thlairawl thawinak nan pekmi hmuahhmuah cu thilnu rawi lomi an si thluh pei. Bawipa ih hnenah mei-ur thawinak nan pekmi cu thilnu siseh, khuaitizu siseh, rawi lomi hlir an si pei.
12 Kumtin tein thlaithar nan pek tikah Bawipa ih hnenah nan rak keng pei; asinain biakòheng parah nan ur lo pei.
13 Thlairawl thawinak ih nan pekmi fang hmuahhmuah cu ci nan phulh thluh pei; ziangahtile ci cu Pathian le nanmah karlak ih thukamnak nan tuahmi khihhmuhnak a si. Thawinak nan pekmi hmuahhmuah ci phulh òheh uh.
14 Thlaithar hmaisabikmi thlairawl thawinak Bawipa ih hnenah nan pek tikah nan kan cia mi, asilole nan den cia mi a si pei.
15 Cuih tlunah olif siti nan toih pei ih rimhmui tla nan toih pei.
16 Bawipa ih hnenah mei-ur thawinak pekmi a si, ti langternak dingah nan pekmi sangphut hrekkhat le siti le rimhmui hmuahhmuah cu puithiam in a ur òheh pei.