10
Nadab Le Abihu Sualnak
1 Aaron ih fapa Nadab le Abihu in meiling laknak thirkheng an lak veve ih meiling an ret ih rimhmui an paih hnuah Bawipa ih hnenah an pek. Asinan hi meisa cu a thiang lomi a si, ziangahtile annih ih tuah dingah Bawipa ih thupekmi a si lo.
2 Hmakhat teah Bawipa ih hmai ihsin meisa alh a suak ih meisa cun a kang hai ih an thi.
3 Cutikah Moses in Aaron hnenah, “ Bawipa in, “Ka hna a òuantu hmuahhmuah in ka thianhlimnak an upat pei; ka miphun pawl hnenah ka huham ka langter ding,” a ti tikah a ti duhnak cu himi sokhaw a si,” a ti. Sikhalsehla Aaron cu zianghman a òong lo.
4 Cutikah Moses in Aaron ih paseu Uzziel ih fapa Mishael le Elzafan a ko ih, “Ra uhla nan unau ruak pawl hi Puanthlam thianghlim ihsin la uhla riahnak lengah va ret uh,” tiah a ti.
5 A ti vek cun an ra ih ruak pawl cu an hnipuan in an khai ih Moses ih thupek bangtukin riahnak lengah an ret.
6 Cutikah Moses in Aaron le Aaron ih fapa Eleazar le Ithamar pawl hnenah, “Mithi ngai tahrat in nan hnipuan thlek in nan sam khal hriat lo in um hlah uh. Nan sam tla nan hriat lo ih nan hnipuan nan thlek a si ahcun nan thi dingih Bawipa cu Israel miphun zate parah a thin a heng ding. Sikhalsehla Bawipa ih thlentermi meisa in a kang thatmi mithi pawl hi nan phunpi Israel midang pawl cun an ngai thei ding.
7 Puanthlam sangka ihsin suak hlah uh; nan suah ahcun nan thi tengteng ding; ziangahtile Bawipa ih hriakculhnak siti thawn thianhlimtermi nan si zo,” tiah a ti. Moses ih sim vek cun an tuah.
Puithiam Pawl Hrangah Daan
8 Bawipa in Aaron hnenah,
9 “Sabitti siseh, zu siseh, in tahrat in ka umnak Puanthlam sungah nangmah le na fapa pawl nan lut lo pei. Nan lut asile nan thi ding. Hi daan cu nan tesinfa hmuahhmuah in an thlun pei.
10 Bawipa ih ta a simi le senpi ih hmantlang dingmi thil pawl cu nan thleidan thiam a òul a si; thil thiang le thil thiang lo khal nan theihthiam a òul a si.
11 Moses hnen ihsin ka lo pekmi daan hmuahhmuah cu Israel mi pawl na zirh thluh pei,” a ti.
12 Moses in Aaron le a nunglaimi a fapa pahnih Eleazar le Ithamar hnenah, “ Bawipa ih hnenah pekmi rawl sung ihsin a tangmi thlairawl thawinak cu la uhla cumi cun thilnu tel lo sang tuah in biakòheng kiangah ei uh, ziangahtile himi cu a thiang zetmi thawinak a si.
13 Hmun thianghlim sungah ei uh; Bawipa ih hnenah pekmi rawl sung ihsin nanmah le nan fapa pawl ih covo a si. Himi cu Bawipa in ka hnenih thu i pekmi a si.Ref 10:12, 13 Pui 6:14-18;
14 Asinan nanmah le nan sungkhat pawl cun puithiam pawl hrangih Bawipa ih hnenah a hleice ih pekmi pawl, a kawng le a ir cu nan ei thei ding. Cumi cu a thiannak hmun ah nan ei pei. Israel mi pawl in remnak thawinak an pekmi sung ihsin nanmah le nan tefa pawl covo ah himi cu an pek zo a si.
15 Bawipa ih hnenah thawinak an tuah ih a thau pawl tla an pek tikcu ah a kawng le a ir cu a hleice ih pekmi ah an rak keng pei. Bawipa ih thupekmi bangtukin hi nan covo pawl cu nanmah le nan tefa pawl in a kumkhua in nan co ding a si,” tiah a ti.Ref 10:14, 15 Pui 7:30-34;
16 Sualthlah thawinak ding hrang timi me thu cu Moses in a suh tikah meisa in an ur zo ti kha a thei. Cutikah Aaron ih fapa pahnih Eleazar le Ithamar parah Moses cu a thin a heng ngaingai ih,
17 “Ziangahso sualthlah thawinak sa cu hmun thiang sungah nan ei lo? Israel miphun an sualthlahnak hrangah Bawipa in nan ei dingah a lo pek zomi a si ih a thianghlim zetmi a si.Ref 10:17 Pui 6:24-26;
18 A thisen cu Puanthlam thianghlim sungih kenmi a si lo hrangah ka lo sim cia vekin hi thawinak sa cu hmun thianghlim ih nan ei ding hrimhrim a si,” tiah napi in a kawk hai.
19 Aaron in, “Israel mi pawl in tuih sun ah Bawipa ih hnenah an sualthlah thawinak le an mei-ur thawinak pawl an pe zo. Ka parah hivek thusia a thlen lai ahhin sualthlah thawinak sa cu kei in rak ei ningla Bawipa cu a lung a awi cuang ding maw?” tiah a ti.
20 Cumi Moses ih a theih tikah a lung a kimsal.