6
Sabbath Ni Thusuhnak
(Mat 12:1-8; Mar 2:23-28)
1 Jesuh cu Sabbath ni ah lo lakin a feh. A dungthlun pawl in sangvut vui an zuut phah ih an zaphak sungih an nuai hnuah a fang cu an ei.Ref 6.1 Daan 23;25;
2 Farasi mi òhenkhat pawl in, “Kan Daan in Sabbath ni ah tuah lo ding, timi cu ziangahso nan tuah?” tiah an sut.
3 Jesuh in an hnenah, “David le a ralkap pawl an ril a rawn tikah David in ziang a tuah ti kha nan siar dah lo maw?Ref 6.3-4 1 Sam 21:1-6;
4 Pathian inn sungah lut tahrat in Pathian hnenih pekmi sang a lak ih a ei; cule a ralkap pawl tla a pek a si. Puithiam pawl siar lo cuih sang ei cu kan Daan in a duh lo a si kha!” tiah a ti.Ref 6.4 Pui 24:9;
5 Cule Jesuh in a netnak ah, “Milai Fapa cu Sabbath ih Bawi a si,” tiah a ti.
Kutzeng Pa Ih Thu
(Mat 12:9-14; Mar 3:1-6)
6 Veikhat ah Sabbath ni ah Jesuh cu sinakok ah a feh ih thu a zirh. Cunah cun a kut vorhlam a zengmi pa pakhat a um.
7 Farasi mi òhenkhat pawl le Daanthiam òhenkhat pawl in Jesuh ih sual hawl an duh ruangah Sabbath ni ahhin a damter pei maw, tiah cat lo in an zoh.
8 An ruahnak cu Jesuh in a theih ruangah mipa cu, “Tho awla hmailam ahhin ra suak aw,” tiah a ti. Kutzengpa cu a tho ih hmai ahcun a ra ding.
9 Cule Jesuh in an hnenah, “Thu ka lo sut hai ding: Kan Daan in Sabbath ni ih tuah dingah ziangso in on? Mi bom ding maw, mi tuahmawh ding so? Mi nunnak humhim ding maw, siatsuah ding so?” tiah a ti.
10 Cule cupawl cu a zohhliah vivo hnuah kutzengpa hnen ahcun, “Na kut hawi aw,” a ti. A kut cu a hawi ngaingai ih a dam ngah.
11 Farasi le Daanthiam pawl cu an thin a heng tuk ih Jesuh an siatsuah theinak dingah thu an ron aw ciamco.
Tirhthlah Hleihnih A Hril
(Mat 10:1-4; Mar 3:13-19)
12 Culai ah Jesuh cu thlacam dingin tlang parah a kai ih Pathian hnenah zanvar thla a cam.
13 Khua a hung vaan tikah a dungthlun pawl a ko khawm ih anmah sungin mi hleihnih a hril; cupawl cu ‘Tirhthlah pawl’ tiah a ko.
14 An hmin cu Simon (Piter tiah a kawhmi) le a nau Andru, Jeim le Johan, Filip le Bartholomeo,
15 Matthai le Thomas, Alfias ih fapa Jeim le Simon (Phunòantu tiih kawhmi),
16 Jeim ih fapa Judas le Jesuh phiar lehtu Judas Iskariot tla an si.
Jesuh In Thu A Zirh, Mi A Damter
(Mat 4:23-25)
17 Jesuh cu a dungthlun pawl thawn tlangpar ihsin an rung suk ih a thluntu tampi pawl thawn hmun rawn ah an ding. Mitampi cutawkah cun an ra; Judea ram pumpuluk ihsin siseh, Jerusalem khua in siseh, tipikap ih a ummi Taiar le Sidon khuapi tla in an ra.
18 Jesuh thusimmi ngai duh ah le an natnak tla dam duh ah an ra. Thlarau thiang lo pawl ih zonzaihtermi pawl tla a damter.
19 Mi hmuahhmuah in amah kha tham an duh; ziangahtile a sung ihsin huham a suak ih a damter òheh hai ruangah a si.
Lungawinak Le Riahsiatnak
(Mat 5:1-12)
20 Jesuh in a dungthluntu pawl a zoh hai ih,
“Mifarah pawl cu mi thluasuak nan si,
Pathian Uknak cu nanmah ih ta a si!
21 “Atu lai ih rilrawng pawl cu
mi thluasuak nan si,
nan khopkham leh ding a si!
“Atu lai ih mitthli a tlami pawl cu
mi thluasuak nan si,
nan lungawi in nan hni leh ding.
22 “Mi in an lo hua, an lo hnong ih Milai Fapa ruangah an lo hmuhsuam, an lo relsiat asile mi thluasuak nan si!Ref 6.22 1 Pit 4:14;
23 Cubangtuk a si tikah nan thin nuam in um uhla lungawi in laam uh; ziangahtile nan hrangah tuarman tampi vancung ah ret cia in a um zo.Ref 6.23 2 San 36:16; Tirh 7:52; Cubangtuk cu an pupa pawl khalin profet pawl parah an rak tuah zomi a si.
24 “Atu ih milian pawl cu zangfakza nan si;
nunnuam nan comi a cem zo!
25 “Atu ih a khopkham pawl cu
zangfakza nan si;
rilrawng in nan vakvai leh ding.
“Atu ih a hni rero pawl cu
zangfakza nan si;
nan òap nan ai leh ding.
26 “Mikip ih porh le fakmi cu
zangfakza nan si;
Ziangahtile an pupa pawl khalin
cuvekin profet deu pawl kha
an rak porh dah a si.
Nan Ral Pawl Duhdaw Uh
(Mat 5:38-48; 7:12a)
27 “Sikhalsehla ka thu a theitu nannih pawl: Nan ral duhdaw uh; a lo huatu pawl parah òhatnak tuah uh;
28 a lo camtu pawl khi thluasuah pe uhla a lo hremtu pawl hrangah thlacam uh.
29 Mi pakhatkhat in na biang a lo beng asile khatlam khal tun hrih aw; mi pakhatkhat in na kawt angki lenghruk a lak ahcun na angki sunghruk khal pe cih aw.
30 Na thilri pakhatkhat a lo diltu an um ahcun va pe aw; cule mi pakhatkhat in na thil an lak le va dilsal nawn hlah.
31 Na hrangah tuah hai sehla ti na duhmi kha midang hrangah va tuah aw.Ref 6.31 Mat 7:12;
32 “Nangmah a lo duhdawtu lawng na duhdawt a si ahcun ziangahso thluasuah malsawm ngah ding cu na zum? Misual pawl khalin anmah a duhdawtu cu an duhdawt ve a sisi!
33 Nangmah parah òhatnak a tuahtu hrang lawngah òhatnak na tuah ve ahcun ziangahso thluasuah malsawm ngah ding cu na zum? Misual pawl hman in cuvek cu an tuah ve a sisi!
34 Ka ngahsal ding tiih na zummi hnen lawng ih na coih ahcun ziangahso thluasuah malsawmnak ngah ding cu na beisei? Misual pawl hman in an ngahsal ding ahcun misual dang pawl hnenah an coih ve a sisi!
35 Cutiin a si lo! Nan ral pawl duhdaw uhla an parah òhatnak tuah uh. Coih uhla ngahsal ding ruat duh hlah uh. Cuticun òhatman tampi nan ngah dingih Cungnungbik Pathian ih fa nan si ding. Ziangahtile amah cu miòha lo le lungawi hna hman a thiam lomi par khalah a òha a si.
36 Nan Pa cu mi zangfah thiam a si vekin nannih khal mi zangfah thiam va si ve uh,” tiah Jesuh in a ti.
Midang Va Soisel Hlah
(Mat 7:1-5)
37 Mi va soisel hlah, Pathian in a lo soisel ve lo ding. Midang va hnong hlah, Pathian in a lo hnong ve lo ding. Midang ngaidam awla Pathian in a lo ngaidam ve ding.
38 Midang hnenah thil òhen aw, Pathian in a lo òhen ve ding. Tam zet in, liam thluahthlo in, na kut sungah pek na si dingih na zawi thei nawn lo tiangin burh na si ding. Midang parih na hmanmi tahnak khi Pathian in na parah a hmang ve ding,” tiah a ti.
39 Cule Jesuh in hi tahòhimnak hi a sim: “Mitcaw pakhat in a dang mitcaw a hruai thei lo ding. A hruai asile an pahnih in korhrum sungah an tla ding.Ref 6.39 Mat 15:14;
40 Tlawngta cu a saya hnakin a thiam sawn dah lo; asinain tlawngta cu a zirnak a òheh tikah cun a saya bangtuk a si ding.Ref 6.40 Mat 10:24-25; Joh 13:16, 15:20;
41 “Nan mit sungih thingtum a ummi sawn hman ruat lo in ziangahso na unau mit sungih mithnawm fate lehlam na zoh?
42 Na unau hnenah ‘Unau, zangfah tein na mit sungih mithnawm kha ka lo coih sak pei,’ tiah ziangtinso na ti thei? Nangmah mit sungih thingtum hman na hmuh thei si lo! Mi titer aw pawl! Hmaisabik ah nan mit sungih thingtum kha suahta uhla cuih hnuah nan unau mit sungih mithnawm kha coih dingah òha tein nan hmu ding,” tiah a ti.
Thingkung Le A Rah
(Mat 7:16-20; 12:33-35)
43 Thingkung òha in rahsia a rah dah lo; thingkung òha lo in rah òha khal a rah thei ve lo.
44 Thingkung hmuahhmuah khi an rah in theih thei an si: Hlingkung par ihsin thei rah nan lo dah lo; cuvekin theihmu kung ihsin sabit rah nan lo fawn lo.Ref 6.44 Mat 12:33;
45 Miòha in a thinlung sungih a ummi thil òha kha a suahter; miòha lo in a thinlung sungih a ummi thil òha lo pawl kha a suahter ve. Ziangahtile minung cu a thinlung sungih a ummi kha a kaa in a suak a si,” tiah a ti.Ref 6.45 Mat 12:34;
Inn Saktu Pahnih
(Mat 7:24-27)
46 Jesuh in, “Ziangahso ‘Bawipa, Bawipa,’ tiah in tiih ka lo simmi cu nan tuah fawn lo?
47 Ka hnenah ra in ka thusimmi a ngai ih a thluntu pawl cu mi ziangvek an si, ti ka lo hmuh hnik ding.
48 Cupa cu lungpi parah khur thukpi lai in òhuam a bun ih inn a saktupa bangtuk a si. Tiva a hung lian ih cuih inn cu a sawh ciamco nain a hnin thei lo; ziangahtile fek teih sakmi inn a si.
49 Sikhalsehla ka thusimmi a thei nain a thlun lotu pa cu òhuam òha teih phun lo in leilung men ih inn a saktupa vek a si. Tilian in a cuih inn cu a run pah tikah hmakhat teah inn cu a tlu ih ziangtluk òihnungza so a si!” tiah a ti.