19
Jesuh Le Zakia
1 Jesuh cu Jerikho khua a thleng ih khuasung in a feh vivo.
2 Cutawkah siahkhongtu upa pakhat, a lian zetmi, Zakia timi a um.
3 Jesuh kha zo a si, ti hmuh a duh zet nain amah cu mi niamte a si ih tlunah mi an tam zet ruangah a hmu thei hrimhrim lo.
4 Curuangah mipi hmaiah a tlan ih cutawk lamih a feh vivotu Jesuh hmuh duh ah theipi kung parah a kai.
5 Jesuh cutawk hmun a thlen tikah a tlunlam a hun zoh ih, “Zakia, zamrang in rung òum aw, tuih sun na inn ah ka tlung ding,” tiah a ti.
6 Zakia cu zamrang in a òum ih Jesuh kha a inn ah lungawi zet in a tlunter.
7 Cumi a hmutu hmuahhmuah cu an phunzai hmurhmo ih, “Hi pa hi misualpa ih inn ah a tlung ual!” tiah an ti.
8 Zakia cu a ding ih Bawipa ih hnen ahcun, “ Bawipa, i ngai hnik! Ka neihmi ih hrek cu mifarah ka pe ding; cule ka bummi an um ahcun a let li in ka samsal ding,” tiah a ti.
9 Jesuh in a hnenah, “Tuih sun ah hi pa ih inn ah rundamnak a ra thleng zo, ziangahtile hi pakhal hi Abraham ih tesinfa a si ve.
10 Milai Fapa cu a hlomi hawl ding le rundam dingah a ra,” tiah a ti.Ref 19.10 Mat 18:11;
Sui Tangka Tahòhimnak
(Mat 25:14-30)
11 Cutiih a simmi a rak ngaitu mipi hnenah Jesuh in tahòhimnak pakhat a sim. Amah cu Jerusalem a thleng zik thlang ih mipi cun Pathian Uknak a ra thleng zik thlang tiah an ruat.
12 Curuangah hitiin a sim: “Veikhat ah bawi pakhat a um ih amah cu ram hlapi ah feh tahrat in siangpahrang ih canter a si hnuah inn ih ra tlunsal a tum.
13 Cutiih a feh hlanah a hnenum pahra kha a ko ih sui tangka fangkhat fingfing a pek hnuah, ‘Himi thawn sum rak tuah hnik uh; ka rakir tikah ziangzat nan ngah, kan zoh hnik pei,’ tiah a ti.
14 A ram sungmi pawl in cuih an bawipa cu an hua ih curuangah ‘Hi pa hi cu kan siangpahrang dingah kan duh lo,’ tiah a simtu dingah palai an thlah.
15 “Cupa cu siangpahrang a can hnuah a ra tlungsal. A thlen ve tein sum ziangzat an ngah ti theih duh ah a hnenum pahra cu a hnenah a ko.
16 Pakhat pa cu a ra ih, ‘ Bawipa, sui tangka fangkhat i pekmi in sui tangka fanghra a miat ka ngah,’ tiah a ra ti.
17 A bawipa in, ‘A òha, nang hi hnenum òha na si. Thil fate parih rin tlak na si ruangah khuapi pahra uktu ah ka lo re ding,’ tiah a ti.
18 Pahnihnak pa a ra ih, ‘ Bawipa, sui tangka fangkhat i pekmi in fang nga a miat ka ngah,’ tiah a ti.
19 Cupa cu ‘Khuapi panga uktu ah ka lo ret ding,’ tiah a ti.
20 “A dang hnenum pakhat a ra ih, ‘ Bawipa, hinah na sui tangka cu a um. Pavua in ka tuam ih ka ret.
21 Nang cu mi tifekfek na si ruangah ka lo òih. Na ta a si lomi tla na lak òheu ih thlaici na vorh lomi khal na khawm òheu,’ tiah a ti.
22 Cutikah a bawipa in, ‘Hnenum òha lo! Nangmah hnonnak dingah hin nangmah ih òong lala ka hmang ding! Mi tifekfek ka si cu na thei ih ka ta a si lomi tla ka lak ih ka vorh lomi khal ka khawm cu na thei.
23 Cuti asile ziangahso ka tangka cu tangka retnak zung ah na rak ret lo? Rak ret cila ka ra kirsal tikah tangka òhang thawn ka ngah ding a sisi!’ tiah a ti.
24 Cule cutawkih a dingmi pawl hnenah, ‘A sui tangka cu la uhla sui tangka fanghra a neitu hnenum hnenah pe uh,’ tiah a ti.
25 Asinan annih in, ‘ Bawipa, anih cun fanghra a nei zo si!’ an ti.
26 An bawipa cun, ‘Fiang tein ka lo sim: Thil a neitu hnenah a dang khal belh a si ding; asinain thil a nei lotu hnen ihsin a neihsun malte hman kha lak sak hrih a si ding.Ref 19.26 Mat 13:12; Mar 4:25; Luk 8:18;
27 Cun an siangpahrang dingih i duh lotu ka ral pawl cu hinah ratpi uhla ka mithmuh ahhin that uh,’ a ti,” tiah Jesuh in a sim.
Jerusalem Ah Sunglawi Zet In A Lut
(Mat 21:1-11; Mar 11:1-11; Joh 12:12-19)
28 Jesuh in hi thu a sim hnuah an hmaiah Jerusalem ah a feh.
29 Cule Olif tlang ih Bethphage le Bethani khua kiang a thlen tikah a hmaiah a dungthluntu pahnih kha a thlah ih,
30 hitiin thu a cah. “Nan hmaiih a ummi khuasung ahkhin va lut uhla zohman ih an to dah hrih lomi laak note pakhat hri in an khihmi kha nan hmu ding. A hri phoih uhla hinah rak hruai uh.
31 Zokhal in ziangahso nan phoih, tiah an lo sut asile Bawipa in a hai tiah va sim uh,” a ti.
32 An va feh ih Jesuh in a sim vek cekci in ziang hmuahhmuah cu an hmu.
33 Laak note cu an phoih rero lai ah a neitu pawl in, “Ziangahso nan phoih?” tiah an ti.
34 Annih in, “ Bawipa in a hai,” tiah an let.
35 Cule laak cu Jesuh hnenah an hei hruai. Cun laak parah cun an puan an dam ih Jesuh cu an toter.
36 Laak par cun a feh ih a fehnak lamzin ahcun mipi in an puan an phah vivo.
37 Jerusalem khua kiang lamzin Olif Tlang ihsin a vung suhnak zawn an thlen tikah a thluntu miburpi pawl cun Pathian an thangòhat ih, thil mak zetzet tampi an hmuh ruangah cun an aw neih patawp in an au ciamco.
38 “ Bawipa ih hmin in a rami siangpahrang parah Pathian thluasuahnak um ko seh! Van ah daihnak um sehla Pathian hnenah sunlawinak cu um ko seh!” tiah an ti.Ref 19.38 Saam 118:26;
39 Cule miburpi lakih a ummi Farasi òhenkhat pawl in Jesuh cu, “Sayapa, na dungthlun pawl hi dai tein um hai seh, sim aw!” tiah an ti.
40 Jesuh in, “Fiang tein ka lo sim: Annih pawl dai teih an um asile hi lungto pawl hi an hung au ciamco ding a si,” tiah a ti.
Jerusalem Ruangah Jesuh A Òap
41 Jerusalem khuapi cu a hei naih vivo ih a hmuh ngah tikah Jesuh cu a òap:
42 “Tuih sun ahhin daihnak hrangah ziangso a òul, tihi thei thei cila maw! Asinan cucu na hmuh thei lo dingin thuh a si!
43 Nan ral pawl in an lo kulh òheh dingih an lo kham òhehnak le khuazakip in an lo fuuknak caan a ra thleng ding.
44 Nangmah siseh, na phar dawlmi sungih a ummi na minung pawl siseh, an that òheh ding. Nangmah rundam dingih Pathian a rat tikcu na theih lo ruangah lungto pakhat hman suang aw in a tangmi an um lo ding a si!” tiah a ti.
Biakinn Ah Jesuh A Feh
(Mat 21:12-17; Mar 11:15-19; Joh 2:13-22)
45 Cun Jesuh cu Biakinn sungah a feh ih thil zuartu pawl kha a dawi òheh.
46 “Ca Thianghlim sungah Pathian in ka Biakinn cu thlacamnak inn tiah kawh a si ding a ti. Asinan nannih cun fifir pawl relhnak kua ah nan canter!” tiah a kawk hai.Ref 19.46 Isa 56:7; Jer 7:11;
47 Nitin tein Jesuh cun Biakinn sungah thu a zirh. Puithiam upa pawl, Daanthiam pawl le hotu pawl in Jesuh cu thah an duh.Ref 19.47 Luk 21:37;
48 Asinan an thah theinak ding lamzin an hawl thei lo, ziangahtile mi hmuahhmuah in a thu simmi cu òongfang pakhat hman hrelh lo in ngai an duh.