7
1 Cutikah Elisha in, “ Bawipa ih thusimmi hi ngai uh! Thaisun atu tikcu ah Samaria khua ih dawr ahhin sangvut òha bik cuai khat, asilole barli sangvut cuai hnih cu ngun tangka fangkhat in nan lei thei ding a si,” a ti.
2 Siangpahrang thluntu bawi pakhat in Elisha hnenah, “Thil cang thei a si lo, Bawipa amah in van tukvirh ong in fang run thla ciamco hmansehla a cang thei zik lo!” tiah a sawn.
Cule Elisha in, “A cang dingih na mit rori in na hmu ding; asinain nang cun na ei ngah lo ding,” tiah a let.
Siria Ralkap An Tlan
3 Phaarnat a tuartu mina pali cu khuapi kotka ah an um ih pakhat le pakhat hnenah, “Ziangahso kan thih thlak tiang hitawkih kan um duh rero ding?
4 Khuasung ih kan vungluh khalle a òhahnem lo, rawl lo in kan thi ko ding; hitawkih kan um khalle kan thi thotho ding. Curuangah Siria ralkap pawl ih riah hmunah kan va feh sawn pei. In thah asile kan va thi ko pei; asinain that lo in, in zuah khal a si thei men sokhaw,” tiah an ti aw.
5 Curuangah khua a thim zawng ah Siria ralkap pawl riahhmun ahcun an va feh. Asinan an va thlen ngaingai tikah pakhat hman an rak um nawn lo.
6 Bawipa in Siria ralkap pawl ih hnathlam sungah thawmvang a thanter ih cuih thawmvang cu ralkap tam ngaingai, rang le rangleng tampi thawmvang vek a si. Israel siangpahrang in Hit siangpahrang le Izipt siangpahrang, an ralkap pawl thawn a sawm ih in ra do tum a si hi, tiah Siria ralkap pawl cun an ruat.
7 Curuangah thih òih ah Siria ralkap pawl cu lusam hman mang lo in an tlan ih, an puanthlam, an rang le an laak pawl khal cuh man lo in an riahhmun cu amah keel in an taan.
8 Miphaar pali cu riahhmun an thlen tikah puanthlam pakhat sungah an lut ih puanthlam sungih ummi rawl cu an ei an in hnuah an tonmi sui, ngun le hnipuan pawl cu zamrang in an cuh ih anmah ih hrangah an thup. An rakir ih puanthlam a dang pakhat sungah an lut ih cuti thotho in an tuah.
9 Cutikah anmah le anmah, “Hitiih kan tuahmi hi thildik a si lo. Thuthang Òha kan nei a si ih kanmah ih hrang lawngah siseh, ti ding a si lo. Thaizing tiang kan hngah asile mawh kan phur tengteng ding. Atu rori ah kan feh pei ih siangpahrang kuthnuai ih bawi pawl kan va sim pei,” tiah an ti aw.
10 Curuangah Siria ralkap pawl ih riahhmun cun an suak ih Samaria khuasung ah an lut ih kotka kiltu pawl hnenah, “Siria ralkap pawl ih riah hmunah kan va feh ih zohman kan hmu lo, a òhing. An rang le an laak pawl hri hman an suut ta lo! An puanthlam pawl khal Siria ralkap pawl ih an tlansan vek rori in an um lai a si,” tiah an sim.
11 Cuih thu cu kotka kiltu pawl in siangpahrang hnenah an vung sim.
12 Zan asinain siangpahrang bawipa cu a tho ih a kuthnuai bawi pawl hnenah, “Siria ralkap pawl ih tummi ka lo sim ding. Khuasung ih rawl a um lo hi an thei. Curuangah an riahhmun ihsin an suak ih hramlak ah an thup aw a si. Rawl hawl ah khuasung ihsin an ra suak dingih cutikah a nungin kan kai òheh dingih an khuapi khal kan la suak ding a si, tiah an ruat a si,” a ti.
13 Cutikah a kuthnuai ih bawi pakhat in, “Ziang a si hmanah kan hlanih a thi zomi pawl vekin hi khuasung ih a ummi hmuahhmuah cu kan thi thluh thotho ding a si. Curuangah thil umdan ziangvek ngaingai so a si, ti kan theihnak dingah a nung hrihmi rang panga thawn mi hrekkhat kan hei thlah hnik pei,” tiah a ti.
14 Curuangah milai hrekkhat an hril ih Siria ralkap pawl khui ah an si, ti zoh dingah siangpahrang in rangleng pahnih in a thlah.
15 An feh ih Jordan an thleng. Lamzin tluanah Siria ralkap pawl in an tlan phah ih an thlaumi an hnipuan le an hriamnam pawl an hmu. An rakir ih cuih thu cu siangpahrang an sim.
16 Cutikah Samaria khuasungmi mi burpi pawl cu pah that aw thluh zik in an ra suak ih Siria ralkap pawl ih riahhmun cu an va ram ciamco. Cule Bawipa ih òongmi vek cekci in sangvut òha bik cuai khat, asilole barli sangvut cuai hnih ah ngun tangka fangkhat in an zuar ngaingai.
17 Cuih òum ngelcel ah Israel siangpahrang in amah a rak thlun òheutu a kuthnuai ih bawi cu kotka kiltu pawl hotu ah a ret. Cule misenpi pawl Siria ralkap riahhmun lamih an nor awk ciamco tikah cuih hotupa cu an pal that; Elisha tong dingin siangpahrang a feh òum ih Elisha ih òong vekin cupa cu a thi ngaingai.
18 Elisha in siangpahrang hnenah, “Thaisun atu tikcu ah Samaria khua ih dawr ahhin sangvut òha bik cuai khat, asilole barli sangvut cuai hnih cu ngun tangka fangkhat in an zuar ding,” a rak ti tikah,
19 cuih siangpahrang thluntu bawi cun, “A cang thei mi a si lo, Bawipa amah in hmakhat teah van tukvirh ong in fang run thla ciamco hmansehla a cang thei zik lo,” tiah a rak sawn. Cule Elisha cun, “A cang dingih na mit rori in na hmu ding; asinain nang cun na ei ngah lo ding,” tiah a rak let.
20 A ti vekin a parah a thleng ngaingai; misenpi in khuapi kotka ah an pal that a si.