17
Israel Siangpahrang Hoshea
1 Siangpahrang Ahaz in Judah ram a uknak kum hleihnih kum ah Elah ih fapa Hoshea cu Israel siangpahrang a cang ih Samaria khua ihsin Israel ram kum kua sung a uk.
2 Bawipa ih parah sualnak a tuah; asinain a hlanih Israel a uktu siangpahrang pawl tluk cun a sual lo.
3 Assiria siangpahrang Shalmaneser in a do ih Hoshea a sun ruangah kumtinte in Shalmaneser hnenah siah a pek.
4 Asinan veikhat cu Hoshea in Izipt siangpahrang So hnenah mi thlah in bomnak a dil ih kum dang vekin Assiria siangpahrang hnenah siah a pe lo. Cumi cu Shalmaneser in a theih tikah Hoshea cu a kai ih thawng ah a thlak.
Samaria An Lak
5 Assiria siangpahrang Shalmaneser in Israel ram a do ih Samaria khuapi a kulh òheh. Kum thum sung a kulh ih a kum thumnak,
6 Hoshea in Israel ram a uknak kum kuanak ah Assiria siangpahrangj 17:6 Assiria siangpahrang: timi hi Shalmaneser a si nawn lo; anih cu Samaria an lak hlanah a thi ih Sargon pahnihnak siangpahrang in a ai a awh. Samaria latu cu siangpahrang Sargon pahnihnak a si. A lak kum hi BC 722-1 a si. in Samaria khuapi cu a lak. Israel mi pawl cu Assiria ah sal ah a hruai hai; a hrekkhat cu Halah khua ah a umter, a hrek cu Gozan peng Habor Tiva kiangah a umter ih a hrek cu Media ih khuapi pawl ah a umter hai.
7 Israel mi pawl cu Izipt siangpahrang kut sungin a runsuaktu le Izipt ram in a hruaisuaktu Bawipa an Pathian parih an sual ruangah Samaria khuapi cu ral pawl in an lak a si. Khawzing dang pawl an biak ih,
8 Bawipa ih a dawihlomi miphun pawl ih daan an thlun ih Bawipa ih duh lomi, Israel siangpahrang pawl ih tuahcopmi daan an thlun.
9 Israel mi pawl in Bawipa an Pathian ih lungkim lomi thil tampi an tuah. An khuatin ah khua fate in khuatum bik tiang khawvelmi pawl ih khawzing biaknak biakinn pawl an sak ih,
10 tlangzim kip le thingpi niim hnuai kipah an khawzing lungphun an phun ih Asherah khawzingnu ih lem an ret.Ref 17:10 2 Siang 14:23;
11 Bawipa ih a dawihlomi miphun pawl ih thiltuah daan cawngin khawzing biaknak biakòheng parah rimhmui an ur. An thiltuahmi a siatvat tuk ruangah Bawipa ih thin an hengter;
12 milem nan biak lo pei, tiih Bawipa ih thukham pawl cu an siatbal òheh.
13 Bawipa in Israel mi le Judah mi pawl hnenah a palai pawl le profet pawl a thlah ih, “Thil òha lo nan tuahmi tanta uhla nan pipu hnenah ka phuanmi le ka palai profet pawl hmangin nan hnenih ka lo pekmi ka thukham le ka Daan pawl cu thlun uh,” tiah ralrinnak vei tampi a pek.
14 Sikhalsehla an ngai duh lo; Bawipa an Pathian a rak rinsan lotu an pupa pawl vekin an thinlung cu a ruh.
15 A thupekmi pawl an thlun duh lo; an pupa pawl thawn thukamnak a tuahmi an hngetter lo ih a ralrinnak pekmi zianghman ah an siar lo. A òhahnem lomi milem pawl an biak ih mi òhahnem lo ah an cang. An kiangkap ih ummi miphun pawl ih thiltuah daan pawl an cawng ih, “Nan cawng lo pei,” tiih Bawipa ih thupek an el.
16 Bawipa an Pathian ih pekmi Daan hmuahhmuah an balsiat òheh ih daar ih tuahmi cawcang pahnih an biak. Cuih tlunah khawzingnu Asherah ih lem an tuah, arsi an biak ih Baal khawzing an rian.Ref 17:16 2 Siang 12:28;
17 Khawvel pawl ih khawzing hnenah an fanu le an fapa pawl mei-ur thawinak ah an pek; pol pawl le kutòial zohthiam pawl an leeng ih Bawipa hmaiih thil òha lo an theihmi hmuahhmuah kim tein an tuah. Curuangah Bawipa ih thin an hengter a si.Ref 17:17 Daan 18:10;
18 Bawipa cu Israel mi parah a thin a heng ih a hmuh lonak ram ah a dawihlo hai a si; curuangah Judah ram lawng a zuah.
19 Asinan Judah mi pawl tla in Bawipa an Pathian ih daan pawl an thlun lo; Israel mi ih thiltuah daan an zir ve.
20 Bawipa in Israel mi pawl cu a hnong, a hrem ih mi zangfah nei lo an ral pawl ih kut ah a pek hai; netabik ah a hmuh lonak ram ah a dawihlo hai a si.
21 Bawipa in Israel ram cu Judah ram ihsin a òhensuak tikah Nebat fapa Jeroboam cu Israel mi pawl in an siangpahrang ah an tuah. Jeroboam ruangah an Bawipa cu an tlansan ih tuksumza sualnak sungah a hruailut hai a si.
22 Jeroboam an thlun ih sualnak a tuahmi cu an tuah ve ringring;
23 netabik ah, profet a sal pawl hnenin, “Ka tuah ding,” tiih ralrinnak a pek vekin, a hmuh lonak hmunah a dawihlo hai a si. Cuticun Israel mi pawl cu Assiria ram ah hruai òheh an si ih atu khalah cutawkah an um lai.
Israel Ram Ah Assiria Mi An Um
24 Assiria siangpahrang in Babilon, Kuth, Ivvah, Hamath, le Sefarvaim khuasungmi pawl a suahter hai ih thawngih a thlakmi Israel mi pawl ai ah Samariak 17:24 Samaria: Samaria khuapi a ti duhnak si nawn lo in Israel ram ai ah a simmi a si. ram khuapi pawl ahcun a umter hai. Cuih khuapi pawl cu an luah ih an um.
25 An um pek ahcun Bawipa an bia duh lo; curuangah Bawipa in kiosa pawl a thlah ih minung tawkfang an deh.
26 Cumi thu cu Assiria siangpahrang an sim ih Samaria khuapi pawl sungih a umtermi pawl in cuih ram khawzing ih daan an theih lo ruangah an khawzing in kiosa a thlah ih a deh hai a si, tiah a thei.
27 Curuangah Assiria siangpahrang in, “Thawng ih kan thlakmi an puithiam lakih pakhat cu kuatkir uh; kir in vung um sehla cuih ram khawzing ih daan cu cuih khuasung ih mi pawl hnenah zirh seh,” tiah a ti.
28 Curuangah Samaria in an rak hruai ih Assiria ram ih thawng an thlak mi puithiam pakhat cu an fehter ih Bethel ah a um; cutawkah cun Bawipa biakdan pawl a zirh.
29 Asinan Samaria ih a ummi pawl cun an rak biakmi khawzing lem cu an tuah cio ih Israel mi pawl ih an rak sakmi khawzing biakinn sungah cun an ret. An umnak ciar khuapi sungah cun an hrin ciar in milem an tuah;
30 Babilon mi pawl in an khawzing Sukkoth Benoth lem an tuah; Kuth mi pawl in an khawzing Nergal lem an tuah; Hamath mi pawl in an khawzing Ashima lem an tuah;
31 Ivvah mi pawl in an khawzing Nibhaz le Tartak lem an tuah; Sefarvaim mi pawl in an khawzing Adrammelek le Anammelek pawl hnenah an faale pawl cu mei-ur thawinak ah an pek.
32 Annih in Bawipa tla an bia ve thotho ih an khawvel khawzing biaknak hmunih puithiam òuantu dingah le an hrangih thawinak petu dingah anmah lak ihsin miphun dangdang an hril.
33 Cuticun Bawipa biak le anmah ih khawzing ciar biak cu an cem; an rak ratnak khua le ram ih thiltuah daan cu an thlun thotho.
34 Tuih sun tiangah hin cuih an thiltuah daan hlun cu an thlun lai. Bawipa cu an bia nawn lo; Bawipa in Jakob tesinfa pawl Israel tiih a kawhmi hnenih a pekmi daan le thukham pawl tla an thlun lo.Ref 17:34 Sem 32:28; 35:10;
35 Bawipa in Israel mi thawn thukamnak a rak tuah tikah an hnenah, “Khawzing dangdang nan bia lo pei; an hmaiah nan kuun lo pei ih nan rian lo pei; thawinak tla nan pe lo pei.Ref 17:35 Suah 20:5; Daan 5:9;
36 Izipt ram ihsin huham le baan thacak thawn a lo suahtu Bawipa keimah lawng hi in òihzah pei. Keimah hnenah thawinak pawl nan pek pei ih ka hmaiah nan kuun pei.Ref 17:36 Daan 6:13;
37 Nan hrangih ka nganmi daan le thukham hmuahhmuah nan thlun ringring pei. Khawzing dang pawl ih thu nan thlun lo pei;
38 nanmah thawn ka tuahmi thukam cu nan hngilh lo pei.
39 Bawipa nan Pathian keimah cu in òihzah pei ih nan ral pawl ih kut sung ihsin ka lo runsuak hai ding,” tiah thu a rak pek.
40 Sikhalsehla hi miphun pawl cun an ngai lo; an thiltuah daan hlun sawn an thlun ringring.
41 Cuticun hi miphun pawl in Bawipa biak le an milem pawl biak cu an cem; tuih sun tiangin an tesinfa pawl in cuticun an tuah ringring a si.