10
Ahab Tefa Pawl An That
1 Siangpahrang Ahab tefa pawl cu Samaria khuapi sungah sawmsarih an um. Jehu in ca pakhat a ngan ih khuapi uktu pawl, ramsung upa pawl le Ahab tefa kilkhawitu upa pawl hnenah a kuat. Cuih a ca sungah cun,
2 “Siangpahrang tefa kilkhawitu le an hrangih òuanvo neitu nan si. Ralhruang kulhmi khuapi pawl, hriamnam pawl, rang le rangleng pawl nan nei òhepòhep. Hi ca nan ngah ve tein,
3 siangpahrang tefa pawl lakih a tlak bik nan timi hril uhla siangpahrang rak òuanter uh; cule amah ih lamah òangin ral nan do pei,” tiah a ti.
4 Cutikah Samaria uktu pawl cu an thin a phang ngaingai. Siangpahrang Joram le siangpahrang Ahaziah hman in an neh lomi Jehu cu kannih in ziangtinso kan do thei ding?” tiah an ti.
5 Curuangah siangpahrang inn uktu bawi, khuapi uktu, ramsung upa pawl le siangpahrang tefa kilkhawitu upa pawl in Jehu hnenah thu an cah ih, “Kannih cu na sal kan si ih na simmi hmuahhmuah kan tuah òheh ding. Asinan zohman, “Nang siangpahrang si aw” tiah kan ti lo ding. A òha bik na timi cu tuah ko aw,” an ti.
6 Cule Jehu in ca dang pakhat a ngansal ih, “Ka lam òangtu nan si ih ka thupekmi thlun nan tum a si ahcun, siangpahrang Ahab tefa pawl ih lu cu ka umnak Jezreel khua ahhin thai sun atu tikcu ah rak keng uh,” tiah a ti.
Siangpahrang Ahab tefa sawmsarih pawl cu Samaria khuapi sungih ummi upa hotu pawl in an kilkhawi ih an zoh.
7 Cule Jehu ih cakuat an ngah tikah khuasung ih upa pawl in Ahab tefa sawmsarih pawl cu an that. An lu cu bawm sungah an ret ih Jezreel khua Jehu hnen ahcun an kuat.
8 Ahab tefa ih lu pawl a ra thleng ti kha Jehu an sim tikah anih in cuih lu pawl cu khuapi kotka hmun hnih ah a pen ih a thaizing tiang cutawkih taan dingah thu a pek.
9 A thaizing ah Jehu cu khuapi kotka ah a feh ih cutawkih a rak ummi misenpi hnenah, “Siangpahrang Joram a phiartu le a thattu cu keimah ka si; cuih thu ah nannih ih mawhnak zianghman a um lo. Asinan hi pawl hi zo ih thahmi so an si?
10 Himi cu Ahab tefa pawl parih Bawipa ih òongkam a kim, ti langternak a si. Bawipa amah in a profet Elijah hnenih thu a kammi cu a tuah zo a si,” tiah a ti.
11 Cuticun Jezreel khuasung ih a ummi Ahab ih sungkhat pawl, a kuthnuai bawi pawl, a rualpi òha pawl le a puithiam pawl cu an zate in Jehu in a that òheh; pakhat hman hrelh lo in a that òheh a si.Ref 10:11 Hos 1:4;
Ahaziah Sungkhat Pawl An That
12 Jehu cu Jezreel in a suak ih Samaria khua ah a feh. Lamzin ah, “Tuukhal Pawl Riahhmun,” an timi a thlen tikah,
13 Judah siangpahrang Ahaziah ih sungkhat pawl a tong. “Zoso nan si?” tiah a sut.
Annih in, “Ahaziah ih sungkhat kan si! Jezreel ah siangpahrang bawinu Jezebel ih faale pawl le siangpahrang sungkhat pawl tong dingah le upatnak pe dingah kan vung fehta ding kan ti,” tiah an ti.
14 Cutikah Jehu cun, “A nungin kai òheh hai uh,” tiah a ralkap pawl cu thu a pek. An kai hai ih cutawkih khur pakhat kiangah Jehu in an zate in a that òheh; minung sawmli le pahnih an si ih pakhat hman tang lo in a that òheh a si.
A Taangmi Ahab Sungkhat Pawl An That
15 Jehu cu a fehsal ih lamzin ah Rekhab fapa Jonadab in a rak hmuak. Jehu in a cibai ih a hnenah, “Ka lo òan vekin na thinlung tak tein i òan maw?” a ti.
“Ka lo òan,” tiah anih in a ti.
Cutikah Jehu in, “Cuti asile na kut i hun saan aw,” a ti. A kut a hun saan ih Jehu in rangleng parah a vun dirh.
16 Cule Jehu in, “Ka hnenah hin feh awla Bawipa ih hrangah ziangtlukin so ka taimak, ti cu nangmah tein na hmu ding,” a ti. Cuticun Samaria khuapi ahcun an feh.
17 An thlen tikah Ahab sungkhat pawl cu Jehu in a that òheh; pakhat hman a zuah lo. Bawipa in Elijah hnenih a rak simmi cu a kim òheh a si.
Baal Betu Pawl An That
18 Jehu in Samaria mi pawl cu hmunkhat ah a kokhawm ih an hnenah, “Siangpahrang Ahab in Baal khawzing ih hna cu malte lawng a rak òuan. Kei cun nasa zet in ka òuan ding.
19 Baal profet pawl, amah betu pawl le a puithiam pawl, an zate in kokhawm òheh uh. Ka ra thiam lo ding, a titu zohman um hlah hai seh; ziangahtile Baal khawzing hnenah thawinak nasa zet in ka tuah dingih a ra tel lomi cu thah an si ding,” tiah a ti. (Baal betu pawl thah òheh duh ah Jehu in hitiin a bum a si.)
20 Cun Jehu in, “Baal upatnak ah le amah biaknak ah colh ni tuah uh,” tiah thu a pek. A tivek cun an tuah ih,
21 Jehu in, Israel ramsung khuazakip ah thu a than òheh. Baal betu hmuahhmuah cu an ra òheh; a ra lo pakhat hman an um lo. An zate in Baal biakinn sungah cun an lut ih ke thlaknak hman a lawng lo, an khat òhepòhep.
22 Cule Jehu in korfual kiltu puithiam hnenah, “Korfual pawl rak suah aw,” tiah thu a pek. Anih in a suah ih Baal a betu pawl hnen ahcun a pek.
23 Cuih hnuah Jehu le Rekhab fapa Jonadab cu biakinn sungah an lut ih Jehu cun an hnenah, “Ralring uh; hi biakinn sungah Bawipa a betu zohman nan tel thei lo ding; Baal a betu lawnglawng tel ding a si,” a ti.
24 Cun Jehu le Jonadab cu thawinak le mei-ur thawinak pawl pe dingah an lut. Biakinn lengah ralkap sawmriat a rak ret zo ih an hnenah, “Himi pawl hi nan that òheh pei; himi pawl pakhatkhat a luattertu cu amah ih nunnak in a kuan ding,” tiah thu a rak pe cia zo.
25 Jehu in thawinak a pek òheh ve tein, biakinn kiltu ralkap le bawi pawl hnen ahcun, “Lut uhla that òheh uh; zohman luat hlah hai seh,” tiah a ti. An ralnam zuuk cia in an lut ih an zate in an that òheh ih an ruak pawl cu biakinn lengah an dir. Cuih hnuah an biakinn ih sungta khaan ah an lut ih,
26 cutawkih a ummi Baal lem pawl cu an la ih an ur òheh.
27 Cuticun Baal biakinn le Baal lungphun pawl tla an siatsuah òheh ih zun eek tlannak hmunah an hmang ih tuih san tiangin an run hmang tata.
28 Cuticun Jehu in Israel ram sungih Baal biaknak cu a balsiat òheh.
29 Sikhalsehla Israel a hruai sualtu siangpahrang Jeroboam ih sualnak cu a tuah ve thotho; Bethel le Dan ah sui cawcang lem an biak ih cuih sualnak cu a nunter ringring.Ref 10:29 2 Siang 12:28-30;
30 Cule Bawipa in Jehu hnenah, “Ahab tesinfa pawl ih parah tuah dingih ka lo duh sak mi cu na tuah òheh. Curuangah na tesinfa pawl cu san linak tiang Israel siangpahrang an si ding, tiah thu ka lo kam,” tiah a ti.
31 Asinan Jehu in Bawipa, Israel ih Pathian daan cu a thinlung zate in a thlun lo; Israel a hruaisualtu Jeroboam lamzin cu a tlansan thei lo.
32 Cuih caan ah Bawipa in Israel ram cu a fiakter vivo thlang. Siria siangpahrang Hazael in Israel ram,
33 Jordan in nisuahnak lam hmuahhmuah, Arnon Tiva kapih a ummi Aroer khuapi tiangin thlanglam ah a vun la òheh. Hi a lakmi sungah Gad hrin, Reuben hrin le Manasseh hrin pawl ih umnak Gilead le Bashan ram pawl an tel òheh.
Jehu Ih Thihnak
34 Jehu ih tuahmi, ralòha zet ih a òuanmi dangdang pawl cu Israel Siangpahrang Pawl Ih Thuanthu Cabu sungah an ngan òheh a si.
35 Jehu cu a thi ih Samaria ah an phum. A fapa Jehoahaz in a ai ah siangpahrang a òuan.
36 Jehu in Israel ram cu Samaria in kum kul hluanriat sung a uk.