22
Profet Mikaiah In Ahab Ralrinnak A Pek
(2 San 18:2-27)
1 Israel le Siria karlak ah kum hnih sung ral a dai.
2 Asinan a kum thumnak ah Judah siangpahrang Jehoshafat cu Israel siangpahrang Ahab tong dingah a feh.
3 Cule Ahab in a kuthnuai bawi pawl hnenah, “Ziangahso Gilead ram ih Ramoth khua cu Siria siangpahrang kutsung ihsin a lak kan tum lo? Kanmah ih ta a sisi!” a ti.
4 Cun Jehoshafat hnenah, “Ramoth ka do dingih i bawm pei maw?” tiah a sut.
Jehoshafat in, “Ka lo bawm ding. Ka ralkap pawl le ka rang ralkap pawl khal an tiar aw ko.
5 Asinan hmaisabik ah Bawipa kan ron hnik pei,” tiah a ti.
6 Curuangah Ahab in profet pawl a ko ih an zate in zali an ra. An hnenah, “Ramoth ka do pei maw?” tiah a sut.
Annih in, “Do aw. Bawipa in nehnak a lo pe ding,” tiah an ti.
7 Asinan Jehoshafat in, “ Bawipa kan ron theinak dingah profet dang an um nawn lo maw?” tiah a sut.
8 Ahab in, “A dang pakhat a um hrih. Amah cu Imlah fapa Mikaiah a si. Asinan anih cu ka hua. Ziangahtile ka hrangah thu òha a òong dah lo. Thusia lawnglawng a sim òheu,” a ti.
Jehoshafat in, “Cuticun òong hlah aw,” a ti.
9 Curuangah siangpahrang Ahab in zamrangte ih Mikaiah va ko dingah a zungih bawi pakhat a fial.
10 Siangpahrang pahnih, Ahab le Jehoshafat cu an siangpahrang thuam hruk in Samaria khuapi kulhnak hauhruang kotka lengih fang rialnak hmunah siangpahrang tohkham parah an to ih, an hmai ahcun profet pawl cu profet òong in an òong rero.
11 Anmah lak ih profet pakhat, Khenaanah ih fapa Zedekiah in thir ki a tuah ih Ahab hnenah, “ Bawipa in, “Hi ki hin Siria pawl nan do dingih an ci nan hmit thluh ding,” a ti,” tiah a sim.
12 Profet dang pawl khalin cuvek thotho in an sim òheh. “Ramoth khua do uhla nan neh ding, Bawipa in nehnak a lo pe ding,” tiah an ti cio.
13 A culai ah Mikaiah ko dingih thlahmi bawi in Mikaiah cu, “Profet dang pawl in kan siangpahrang ih neh ding thu lawng an sim a si. Nang khal cutiin sim ve aw,” tiah a forh.
14 Asinan Mikaiah in, “ Bawipa ih hmin in ka sim: Bawipa ih sim ding i fialmi lawng ka sim ding a si,” tiah a ti.
15 Mikaiah cu siangpahrang hmaiih a thlen tikah siangpahrang bawipa in, “Mikaiah, siangpahrang Jehoshafat le keimah in Ramoth khua kan do pei maw, do lo so, sim hnik?” tiah a ti.
Mikaiah in, “Do aw he! Na neh ding. Bawipa in nehnak a lo pe ding,” tiah a sawn.
16 Asinan Ahab in, “ Bawipa hmin saal in ka hnenih thu na sim tikah thudik lawnglawng i sim aw, tiah vei ziangzatso ka lo ti ding?” tiah a kawk.
17 Cutikah Mikaiah in, “Israel mi pawl cu khaaltu nei lo tuurual bangin tlang parah vakvai in an um òheh ka hmu. Bawipa in, “Hi misenpi pawl hi hotu an nei lo; an inn ah tlung thluh hai seh,” a ti,” tiah a sim.Ref 22:17 Mat 9:36; Mar 6:34;
18 Cule Ahab in Jehoshafat hnenah, “Hi pa cu ka hrangah thuòha a òong dah lo, ka lo ti tho lo maw? Thusia lawnglawng a sim òheu a si,” a ti.
19 Mikaiah in a hun peh ih, “Atu Bawipa ih òongkam rak ngai aw! Bawipa cu vancung a Siangpahrang tohkham parah to in a vancungmi pawl a kiang vorhlam le kehlam ah an din kha ka hmu.Ref 22:19 Job 1:6; Isa 6:1;
20 Cule Bawipa in, “Ahab cu Ramoth khua ah feh in thihnak a tonnak dingah zoso a vung bum ding?” a ti. Vancungmi hrekkhat in thu pakhat an sim; a dang in thudang an sim.
21 Netabik ah thlarau pakhat in Bawipa cu a hei naih ih a hnenah, “Keimah ka vung bum pei,” a ti. “Ziangtinso na bum ding?” tiih Bawipa ih a sut tikah,
22 anih in, “Ka vung feh pei ih Ahab ih profet hmuahhmuah thuphan ka perter òheh ding,” a ti. Cutikah Bawipa in, “Vung feh awla vung bum aw. Na ti thei ngaingai ding,” a ti,” tiah a ti.
23 Mikaiah in a hun peh bet ih, “A ti vekin a si ngaingai hi! Bawipa in na profet pawl na hnenah thuphan a perter òheh a si. Bawipa amah rori in na parah siatsuahnak thleng dingin lai a rel zo a si,” tiah a ti.
24 Cutikah Zedekiah in Mikaiah cu a hun naih ih a hnakhang ah a beng ih, “Ziangtinso Bawipa ih thlarau cu na hnen òong dingah ka hnen ihsin a ra cer?” a ti.
25 Mikaiah in, “Inn dunglam khaan sungih na relh rero tikah cuih thu cu na thei leh ding,” a ti.
26 Cule siangpahrang Ahab in a kuthnuai bawi pakhat hnenah, “Mikaiah hi kai awla khuapi uktu Amon le ka fapa Joash hnenah hei hruai aw.
27 Va sim awla himdam teih ka rakirsal hlan lo thawng ah rak thla hai sehla sang le tidai rak pe hai seh,” tiah a ti.
28 Cutikah Mikaiah in, “Himdamteih na rakir a si ahcun keimah hmangin Bawipa a òong lo a si ding. Mi hmuahhmuah in ka òongmi hi i theihpi uh,” tiah a ti.
Ahab Ih Thihnak
(2 San 18:28-34)
29 Israel siangpahrang Ahab le Judah siangpahrang Jehoshafat cu Gilead ram Ramoth khua do dingah an suak.
30 Ahab in Jehoshafat hnenah, “Ral kan do tikah kei cu midang vekah ka tuah aw dingih nang cu siangpahrang vekin na thuam aw pei,” a ti. Cuticun Israel siangpahrang cu midang vekih tuah aw in raldonak ahcun a feh.
31 Siria siangpahrang in Israel siangpahrang siar lo a dang zohman do lo dingin a rangleng ralkap hotu sawmthum le pahnih pawl cu thu a pek.
32 Cule siangpahrang Jehoshafat an hmuh tikah Israel siangpahrang a si hmang tiah an ruat ih an do ciamco. Asinan Jehoshafat a au tikah,
33 Israel siangpahrang a si lo ti an thei ih an cawl.
34 Siria ralkap pakhat in batmi nei cuang leem lo in a conkiang a hei sai men ih a vanduainak ah siangpahrang Ahab cu daar ih tuahmi a ralthuam ih pehawknak ongte in a hei ngah. Cutikah Ahab cu, “In hriam ee!” tiah a au ih, a rangleng mawngtupa cu, “Zamrang in i tlanpi aw,” tiah thu a pek.
35 An doawknak a nasa ngaingai ih siangpahrang Ahab cu a rangleng parah do cop in Siria ralkap pawl òannak lam hoi in a um. An hriamnak hma ihsin a thi a luang ih a rangleng zial cu a thisen in a khat òheh. Cule zanlam ah a thi.
36 Ni a liam zawng ah Israel ralkap pawl hnenah, “Nan khua le nan ram ciar ah tlung thluh uh,” tiah thu an than.
37 Cuticun siangpahrang Ahab cu a thi. A ruak cu Samaria khua ah an phur ih an phum.
38 A rangleng cu Samaria tili ah an tleuhfai ih Bawipa ih a rak sim cia vekin a thisen cu uico in an liak. Cutawk cu hlawhhlang pawl tla ti an bual òheunak a si.
39 Siangpahrang Ahab ih tuahmi dang hmuahhmuah, vuiho ih ceimawimi a siangpahrang inn thu le khua a dinmi pawl ih thu cu Israel Siangpahrang Pawl Ih Thuanthu Cabu sungah kim tein an ngan a si.
40 A thih tikah a fapa Ahaziah in siangpahrang a run òuan.
Judah Siangpahrang Jehoshafat
(2 San 20:31-21:1)
41 Israel siangpahrang Ahab in ram a uknak kum li kum ah Asa ih fapa Jehoshafat cu Judah siangpahrang a cang.
42 Culai ah amah cu kum sawmthum le kum nga a si ih, Jerusalem ihsin kum kul hluannga sung ram a uk. A nu cu Shilhi ih fanu Azubah a si.
43 A pa Asa vekin Bawipa ih mithmuh ah thil òha a tuah. Asinan khawvel pawl ih milem biaknak hmun pawl cu a siatbal lo; curuangah mi tampi in cuih biaknak hmun pawl cu raithawinak ah an hmang thotho.
44 Jehoshafat in Israel siangpahrang thawn remnak a tuah.
45 Jehoshafat ih tuahmi dang hmuahhmuah, a raldonak le a ralòhatnak pawl thawn, Judah Siangpahrang Pawl Ih Thuanthu Cabu sungah an ngan.
46 A pa Asa san ihsin a tanglaimi, an khawzing biaknak ih hlawhhlang hna a òuantu pawl hmuahhmuah, nunau siseh, mipa siseh, a that òheh hai a si.
47 Culai ah Edom ram cu uktu siangpahrang a nei lo. An ram uktu cu siangpahrang bawmtu lawng an si ih Judah siangpahrang ih hnaòuan pekmi an si.
48 Siangpahrang Jehoshafat in Ofir ram ihsin sui leinak dingah tipi thuanthum feh thei tangphawlawng tampi a tuah. Asinan Ofir ah an feh thei lo, ziangahtile Ezion-geber ah an lawng pawl a siat.
49 Cule Israel siangpahrang Ahaziah in a milai tipi thuanthum khual tlawng pawl le Judah siangpahrang Jehoshafat ih milai tipi thuanthum khual tlawng pawl khual tlawng tlang dingah a sawm. Asinan Jehoshafat in a el.
50 Jehoshafat cu a thi ih David khuapi siangpahrang pawl phumnak hmun ah an phum. Cule a fapa Jehoram in siangpahrang a run òuan.
Israel Siangpahrang Ahaziah
51 Judah siangpahrang Jehoshafat in an ram a uknak kum hleisarih kum ah Ahab ih fapa Ahaziah cu Israel siangpahrang a cang ih Samaria khuapi ihsin kum hnih sung a uk.
52 A pa Ahab, a nu Jezebel le siangpahrang Jeroboam ih sualnak lamzin a thlun ih Bawipa ih parah a sual ve. Ahab le Jezebel le Jeroboam cu Israel mi sualnak sungih a hruailuttu an si.
53 A pa ih a rak tuah zo vekin Ahaziah khalin Baal khawzing a bia ih a hna a òuan; cuticun Bawipa Israel ih Pathian cu a thin a hengter.