12
Saklam Hrin Pawl Ral An Tho
(2 San 10:1-19)
1 Rehoboam cu amah siangpahrang canter dingih Israel mi pawl an tonkhawmnak Shekhem ah a feh.
2 Cuih thu cu siangpahrang Solomon òih ah Izipt ram ih a tlantu Nebat fapa Jeroboam hnenah a thleng. Cule Jeroboam cu Izipt ram ihsin a kir.
3 Israel mi pawl in amah cu an sawm ih an zate in siangpahrang Rehoboam hnenah an feh ih,
4 “Na pa Solomon in, in hrem ih kan phur a rihter a si. Hi kan thilrit pawl na zaanter ih nunnuam deuh ih in tuah ding a si ahcun nangmah a lo riantu kan si ding,” an ti.
5 Rehoboam in, “Nithum hnuah rasal uhla nan thu cu ka lo let ding,” a ti. Cutiin an tlung.
6 Cule Rehoboam in a pa Solomon ih thuron òheumi patar pawl cu a ron ih, “Hi Israel misenpi pawl hi ziangtinso ka sawn ding?” tiah a sut.
7 Annih in, “Hi misenpi pawl hi òha teih uk na duh a si ahcun, tuih sun ah an hrangah òha tein hnaòuan awla, an lo dil vekin ti sak hai awla, cuticun rin tlak ih a lo riantu ringring ah an cang ding,” tiah an ti.
8 Sikhalsehla Rehoboam in an ruahnak cu zianghman ah a siar sak lo. Amah thawn a òhang tlangmi a thuron òheumi mino pawl sawn hnenah a feh ih,
9 “Nan ruahnak in sim hnik uh. “Na pa in kan parah a retmi thilrit cu zaangter hram aw” tiih i diltu pawl hi ziangtinso ka sawn ding?” tiah a sut.
10 Cutikah annih in, “Ka hngete hi ka pa ih tai hnakin a tum sawn!
11 Ka pa in nan thil a ritter; kei khalin ka ritter sinsin ding. Ka pa in nuangfung in a lo vua, kei in varngen tawpir thawn ka lo hrem hai ding,” va ti aw,” tiah an ti.
12 A tiam vekin ni thum hnuah Jeroboam le Israel mi pawl cu Siangpahrang Rehoboam hnenah an ra ih,
13 Rehoboam in a rak zawt ciamco hai. Patar pawl ih ruahnak pekmi cu la lo-in,
14 a rualpi mino pawl ih ruahnak pekmi sawn a la ih, “Ka pa in nan thil a ritter; kei khalin ka ritter sinsin ding. Ka pa in nuangfung in a lo vua; kei in varngen tawpir thawn ka lo hrem hai ding,” tiah a ti.
15 Rehoboam in Israel mi pawl ih dilmi a elnak cu Bawipa ih forhnak ruangah a si. Profet Ahijah hmangin Jeroboam hnenih thu a kam zomi kimternak dingah a si.
16 Siangpahrang in an dilmi zianghman ih a siar lo kha Israel mi pawl in an theih tikah an au ih:
“David le a sungkhat pawl hnenin
ziang covo so kan neih?
Kan hrangah òhatnak ziangtal
tuahmi an nei dah maw?
Israel mi pawl, nan inn ah
tlung thluh uh,
Rehoboam cu amah tein
taal men seh,” an ti.
Cuticun Israel mi pawl cu ral an tho ih,Ref 12:16 2 Sam 20:1;
17 Rehoboam cu Judah ram sungih a ummi miphun lawng uktu siangpahrang ah a cang.
18 Cutikah Rehoboam in hramhram hnekcop hnaòuantu pawl hotu Adoniram cu Israel pawl hnenah a hei thlah; asinain Israel mi pawl in Adoniram cu lungto in an rak den that. Cuve tein Rehoboam cu a rangleng a to ih zamrang tein Jerusalem ah a tlan.
19 Cuih thokin Israel ram timi saklam ram pawl in David tesinfa pawl ih ram uknak cu an engtai ringring a si.
20 Israel misenpi pawl in Izipt ram ihsin Jeroboam a ra kirsal zo a si, ti kha an theih tikah misenpi tonkhawmnak ah an sawm ih amah cu Israel siangpahrang ah an tuah. Judah hrin lawnglawng David tesinfa pawl riantu ah an tang a si.
21 Rehoboam cu Jerusalem khuapi a thlen tikah hril feekfeek mi ralkap thawng zakhat le thawng sawmriat, Judah hrin le Benjamin hrin sungin a kokhawm ih saklam ram Israel hrin dang ram pawl laksal ding a tum.
22 Sikhalsehla Pathian in profet Shemaiah cu,
23 Judah siangpahrang Rehoboam hnenah a thlah ih, Rehoboam le Judah miphun le Benjamin miphun pawl thu a simter.
24 A feh ih an hnenah, “ Bawipa in, “Nan unau Israel mi pawl cu do hlah uh! Nan zate in nan inn ah tlung òheh uh. Ziangahtile hitiih thil a um hi keimah ih tuahmi a si,” a ti sokhaw,” tiah a sim. Bawipa ih thupekmi cu an ngai ih an inn ah an tlung òheh.
Pathian Lamzin In Jeroboam A Pial
25 Israel siangpahrang Jeroboam in Efraim tlangpar ram ih a ummi Shekhem khuapi cu ralhruang in a kulh ih cutawkah tikcu malte sung a um. Cuih hnuah cutawk ihsin a suak ih Penuel khuapi cu ralhruang in a kulhsal.
26-27 A thinlung sungin, “Atu vek a si ringring ih ka minung pawl Jerusalem Biakinn ah feh tahrat in Bawipa ih hnenah thawinak an pek ringring a si ahcun an thinlung cu Judah Siangpahrang Rehoboam lamah a her aw dingih kei cu in that leh ding,” tiah a ruat.
28 Rei nawn a ruat awk hnuah, sui in cawcang lem pahnih a tuah ih a minung pawl hnenah, “Pathian biak dingih Jerusalem ih nan fehnak hi a rei thlang. Maw Israel mi pawl, Izipt ram ihsin a lo suahtu nan pathian pawl cu hinah an um,” tiah a ti.Ref 12:28 Suah 32:4;
29 Cuih cawcang lem pakhat cu Bethel ah a ret ih a dang pakhat cu Dan ah a ret.
30 Cuticun Israel mi pawl cu sui cawcanglem biak dingah Bethel le Dan ah an feh ih misual ah an cang.
31 Jeroboam in khawzing biaknak hmun khal tlangbol kipah a tuah ih, Levi hrin a si lomi sungin puithiam tla a hril.
32 Cuih tlunah Jeroboam in Judah ram ih biaknak puai a um vekin thla riat thla ni hleinga ni ah biaknak puai pakhat a thok ve. Bethel ih sui cawcanglem a retnak biakòheng parah Jeroboam in thawinak pawl a pe ih an khawzing biaknak hrangih a hrilmi puithiam pawl tla a ret.
33 Amah in Israel mi pawl hrangih a thokmi puai, amah in a bunmi ni, thla riat thla, ni hleinga ni ahcun Bethel ah a feh ih, puai a tuah ih biakòheng parah thawinak a pek. Ref 12:32-33 Pui 23:33, 34;