11
Pathian Hnen Ihsin Solomon A Pial
Siangpahrang Solomon in ramdang nunau tampi a ngai. Izipt siangpahrang fanu a òhit tlunah, Hit nunau, Moab nunau, Ammon nunau, Edom nunau, le Sidon nunau pawl tla a òhi.Ref 11:1 Daan 17:17; Israel mi pawl in khawzing dangdang an rian pang ding ti phan ah, ramdangmi pawl òhi lo dingin Israel mi pawl cu Pathian in thu a pe nain, Solomon in cuih miphun ih nunau pawl cu a òhi thotho.Ref 11:2 Suah 34:16; Daan 7:3, 4; Solomon in nupi za sarih a nei ih an zate in siangpahrang phun lawnglawng an si. Cuih tlunah nusun zathum a nei fawn. Cuih a nupi pawl in Solomon cu Pathian hnen ihsin an pialter ih, patar a si tikah cun ramdang khawzing biaknak ah an hruaisuak. A pa David vek si lo in Solomon cu a thinlung khawzing dangdang hnen a pan ih Bawipa a Pathian hmaiah rin tlak lo a si. Sidon mi pawl ih khawzingnu Astartes a biak ih, Ammon mi pawl ih fihnungza khawzing Milkom khal a biak. Bawipa ih parah a sual ih thil òha lo a tuah; a pa David vekin Pathian hmaiah dik tein a nung lo. Jerusalem ihsin nisuahnak lam tlang parah Moab mi pawl ih fihnungza khawzing Khemosh biaknak hrangah hmun pakhat a dawl ih Ammon mi pawl ih fihnungza khawzing Molek biaknak hrang khalah hmun pakhat a dawl. Ramdangmi a nupi pawl in rimhmui an ur ih an khawzing hnenih thawinak an pek theinak dingah biaknak hmun tampi a tuah fawn.
9-10 Israel ih Pathian Bawipa cu Solomon hnenah vei hnih a lang ih ramdang khawzing biak lo dingah thu a pe nain, Bawipa ih thu cu Solomon in a ngai cuang lo ih a lamzin ihsin a pial a si. Curuangah Bawipa cu Solomon parah a thin a heng ih, 11 a hnenah, “Ka hnenih na thukammi cu tumhrim in na siatsuah ih, ka thupekmi khal na thlun lo ruangah hitiin ka lo sim: Na ram uknak cu ka la dingih na kuthnuai bawi pakhatkhat hnenah ka pe ding. 12 Sikhalsehla na pa David ih ruangah cumi cu na nun sungah cun ka tuah lo ding. Na fapa ih san ah ka tuah ding a si. 13 Cuhman ah a uknak zate cun ka lak sak lo ding. Ka siahhlawh David le ka ta ih ka tuah zomi Jerusalem khuapi ruangah, a hnenah hrin hrinkhat cu ka taan ding,” tiah a ti.
Solomon Ih Ral Pawl
14  Bawipa in Edom siangpahrang ih sungkhat a simi Hadad cu Solomon do dingah a fial. 15-16 Hlanlaipi ah David in Edom ram a rak neh tikah a ralkap pawl hotu Joab cu Edom ram ih a thimi pawl ruak phum dingah a rak feh. Culai ah Joab le a ralkap pawl cu Edom ram ah thla ruk an rak um. Cuih sungah Edom mi mipa hmuahhmuah cu, 17 Hadad le a pa ih hnenum pawl hrekkhat siar lo, an rak that òheh a si. Hadad le a pa ih hnenum pawl cu Izipt ram ah an rak tlan ih, culai ahcun Hadad cu nauhakte a rak si. 18 Midian ihsin an pok ih Paran ah an feh. Cutawkah mipa hrekkhat pawl in an bet ih, cuticun Izipt ram an va thleng. Izipt siangpahrang hnenah an feh ih, Izipt siangpahrang in Hadad cu leiram le inn le rawl tla a rak pek. 19 Hadad in Izipt siangpahrang ih thinlung a tong ih rualpi òha zet ah an cang. Curuangah siangpahrang in a nupi Tahpenes ih unau cu a nupi dingah Hadad a pek. 20 A nupi thawn Genubath timi fapa an nei ih siangpahrang bawinu in siangpahrang inn ahcun a cawm ih siangpahrang fapa pawl thawn an òhang tlang.
21 Izipt ram a umnak ihsin Hadad in David a thi zo ih David ih ralkap hotu Joab khal a thi zo ti thuthang a rak theih tikah Izipt siangpahrang hnenah a feh ih, “Ka khua le ka ram ah i kirter thlang aw,” tiah a dil.
22 Cutikah Izipt siangpahrang in, “Ziangahso kir cu na duh? Na duhmi ka lo pek thei lo ruangah maw a kir cu na duh?” tiah a sut.
Hadad in, “Ziangkhal sisehla i thlah ko aw,” tiah a let. Curuangah Hadad cu a ram ah a kir.
Hadad cu Edom siangpahrang a cang ih miòha lo a si ruangah Israel mi pawl ih ral òihnung bik ah a cang.
23 Cuih tlunah Eliada fapa Rezon khal Bawipa in Solomon dodaltu ah a tuah. Rezon cu a bawipa Zobah siangpahrang Hadadezer hnen ihsin a tlan ih, 24 miòha lo raltho pawl hotu ah a cang. Himi cu David in Hadadezer a neh ih Hadadezer òantu Siria ralkap pawl a thah thluh hnu ih a cangmi a si. Rezon le a homi pawl cu an feh ih Damaskas khua ah an va um. Cutawkah amah cu a milai pawl in Siria siangpahrang ah an tuah. 25 Solomon nun sung hmuahhmuah ah Rezon cu Israel mi pawl ih ral pakhat ah a cang.
Jeroboam Hnenin Pathian Thukam
26 Siangpahrang Solomon a dodaltu pakhat cu Efraim ram Zeredah khua ih Nebat fapa Jeroboam a si. A nu cu nuhmei a si ih a hmin Zeruah a si. 27 An ralawknak thu cu hitiin a si.
Solomon cun Jerusalem ihsin nisuahnak lamah leilung khahsilh tahrat in Millo khua a dinsuah ih khuapi kulhnak phardawl khal a remsal vivo. 28 Culai ah Jeroboam cu tlangval cak zet a si ih, a hnaòuan fel zia kha Solomon in a hmuh tikah Manasseh le Efraim hrin pawl ih umnak ram sungah hramhram ih hnaòuan an fialmi pawl ih hotu ah a ret. 29 Nikhat ah Jeroboam cu Jerusalem ihsin a suak ih amah lawng a feh lai ah hramlak ah Shiloh khua ih profet Ahijah in a rak tong. Ahijah cu korfualpi thar hruk in a ra. 30 Cuih a korfualpi thar cu a hlit ih òhen hleihnih ah a thlek hnuah, 31 Jeroboam hnen ahcun, “Na hrangah òhenhra hi la aw. Ziangahtile Bawipa Israel ih Pathian in na hnenah, “Ram uknak cu Solomon kut sung ihsin ka la dingih na hnenah miphun phun hra ka lo pe ding. 32 Ka siahhlawh David ruangah le Israel ram pumpi sung ihsin ka ta dingih ka hrilmi Jerusalem khuapi ruangah Solomon in miphun phunkhat cu a co ve ding. 33 Solomon in i hnong ih Sidon khawzingnu Astartes le Moab khawzing Khemosh le Ammon khawzing Milkom pawl a biak ruangah a parih hibangtuk thil ka tuah tumnak a si. Solomon in ka thu a ngai lo. Thilsual a tuah ih ka daan le ka thupekmi pawl cu a pa David vekin a thlun lo a si.
34 Sikhalsehla a ram pumpi cun ka long lo ding. Ka rak hrilmi, ka daan le ka thupekmi pawl a thluntu ka siahhlawh David ruangah Solomon cu a nunsung hmuahhmuah ah thuneitu ka siter ding. 35 Solomon fapa san ihsin a ram cu ka long dingih na hnenah miphun phun hra ka lo pe ding. 36 Solomon fapa cu miphun phunkhat ka coter ve dingih, cuticun ka hmin in kawhnak dingih ka hril cia mi Jerusalem khuapi ah ka siahhlawh David ih tesinfa pakhatkhat tal cu ram uktu ah ka ret ding. 37 Nangmah Jeroboam cu Israel siangpahrang ah ka lo tuah dingih na duhzat ram na uk ding. 38 Ka siahhlawh David vekin ka thu na ngai ih ka daan pekmi in na nung ih ka thupekmi na thlun ih ka lung i kimter a si ahcun na hnenah ka um ringring ding. David vekin nangmah cu Israel siangpahrang ah ka lo tuah dingih na tesinfa pawl khal na hnuah siangpahrang ah ka tuah vivo ding. 39 Solomon ih sualnak ruangah David ih tesinfa pawl parah hremnak ka thlenter ding, asinain kumkhua cun a si lo ding,” a ti a si,” tiah a sim.
40 Cule Solomon in Jeroboam cu thah a tum nain Izipt siangpahrang Shishak hnenah a tlan ih cutawkah Solomon a thih hlan lo a um.
Solomon Ih Thihnak
(2 San 9:29-31)
41 Solomon hnaòuannak le a thuhla dang pawl le a fimnak thu pawl cu Solomon Thuanthu Cabu sungah an ngan òheh a si. 42 Jerusalem ihsin Israel ram pumpi kum sawmli sung a uk. 43 A thi ih Jerusalem ah an phum. Cule a fapa Rehoboam in siangpahrang a run òuan.